ខេត្តបន្ទាយមានជ័យ ៖ ជីវិតគ្រួសារមួយប្តីប្រពន្ធពិការដូចគ្នាមើលទៅពិតជាកំសត់ពេកក្រៃនាងជាប្រពន្ធស្វឹតជើងទាំង2អង្គុយលើរទេះ រីឯបុរសជាប្តីស្វឹតជើងម្ខាងរុញរទេះប្រពន្ធផងរើសអេតចាយផង ថែមទាំងបណ្តើរកូនស្រីដើរតាមទៀត ។
គ្រួសារដ៏កំសត់នេះបុរសជាប្តីឈ្មោះ សួន ទិត្យ អាយុ30ឆ្នាំ ប្រពន្ធឈ្មោះ ពៅ ធីតា អាយុ29ឆ្នាំ និងមានកូនស្រីម្នាក់អាយុ4ឆ្នាំឈ្មោះ ចាន់ សំណាង ។ គ្រួសារនេះអះអាងថា សុំដីគេសង់ខ្ទមមួយរស់នៅក្នុងភូមិបន្ទាយថ្មី ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
បុរសជាប្តីស្វឹតជើងឆ្វេង ឯនាងជាប្រពន្ធស្វឹតជើងទាំងសងខាងអះអាងថា ស្វឹតតាំងពីកំណើតដោយសារកើតជម្ងឺ ។ ក្រៅពីស្ត្រីពិការលើរទេះរុញក៏មានការ៉ុងផ្ទុកអេតចាយធំមួយនៅពីខាងមុខនាងថែមទៀត ។ បុរសជាប្តីរុញរទេះបណ្តើរើសអេតចាយបណ្តើខណៈកូនស្រីវ័យ4ឆ្នាំដើរតាមរទេះមើលទៅពិតជាគួរឲ្យសង្វែកណាស់ ។
ជួបសម្ភាសផ្ទាល់គ្រួសារមួយនេះអះអាងថា ក្រៅពីរបររើសអេតចាយពួកគេគ្មានរបរអ្វីទៀតឡើយហើយថា ទើបមករស់នៅក្នុងឃុំអូរបីជាន់ 3ទៅ4ខែតែប៉ុណ្ណោះពីមុនរស់នៅឯឃុំអន្លង់វិល ស្រុកសង្កែ ខេត្តបាត់ដំបង ដើររើសអេតចាយដូចគ្នា លុះម្ចាស់ដីគេត្រូវការលក់ពួកគេក៏ចាកចេញ ។
គ្រួសារនេះបន្តថា មុនពេលមកដល់តំបន់ព្រំដែនគ្មានសាហ៊ុយធ្វើដំណើរទេគឺសុំរថយន្តគេជិះជាបន្តបន្ទាប់ ។ អ្វីដែលស្តាប់ទៅមហាកំសត់ទ្វេរដងនោះបុរសជាប្តីថា ខ្លួនជាអ្នកខេត្តបន្ទាយមានជ័យឱពុកម្តាយទៅប្រទេសថៃបាត់ដំណឹងឈឹងជាយូរឆ្នាំហើយ ។ ចំណែកនាងជាប្រពន្ធប្រាប់ថា ជាអ្នកខេត្តកំពង់ឆ្នាំង និងជាក្មេងកំព្រាឱពុកម្តាយស្លាប់ចោលអស់គ្មានបងប្អូន ។
ប្តីប្រពន្ធ1គូរនេះនិយាយថា ការជួបចាប់ដៃគ្នាជាប្តីប្រពន្ធមិនបានរៀបការឬសែនព្រេនអ្វីទេហើយបានគ្នាក្នុងអំឡុងពេលនៅរៀននៃមណ្ឌលអង្គការមួយឯភ្នំពេញ ។
អ្នកស្រុកនិយាយថា គ្រួសារមួយនេះពេលខ្លះត្រូវគេជួយបាយទឹកពេលខ្លះក៏គេជួយជាថវិការគ្រាន់ដោះស្រាយក្រពះមួយគ្រាៗ ។
គ្រួសារខាងលើអំពាវនាវសុំសប្បុរសជនក្នុង និងក្រៅប្រទេសមេត្តាជួយពួកគាត់ផងព្រោះគ្មានអ្វីជាទីពឹងទេក្រៅពីរបរនាំគ្នារើសអេតចាយនេះ ៕
ចែករំលែកព័តមាននេះ