រាជធានីភ្នំពេញ ៖ បុរសម្នាក់ស្រវឹងជោកបានបើកបររថយន្តមួយគ្រឿងក្នុងល្បឿនយ៉ាងលឿនដេញតាមពីក្រោយរថយន្តមួយគ្រឿងទៀតក៏ជ្រុលទៅបុកបុរសម្នាក់ដែលកំពុងដើរតាមផ្លូវបណ្តាលឲ្យរងរបួស។ ហេតុការណ៍នេះកើតឡើងកាលពីវេលាម៉ោង១០និង១០នាទីយប់ថ្ងៃទី១២ ខែវិច្ឆិកា ឆ្នាំ២០១៨ ត្រង់ចំណុចក្បែរហាងដូមីណូភីហ្សា តាមបណ្តោយផ្លូវ២៦១ កែងនិងផ្លូវសហព័ន្ធរុស្ស៊ី ស្ថិតក្នុងសង្កាត់ទឹកល្អក់ទី១…
រាជធានីភ្នំពេញ ៖ បុរសម្នាក់ស្រវឹងជោកបានបើកបររថយន្តមួយគ្រឿងក្នុងល្បឿនយ៉ាងលឿនដេញតាមពីក្រោយរថយន្តមួយគ្រឿងទៀតក៏ជ្រុលទៅបុកបុរសម្នាក់ដែលកំពុងដើរតាមផ្លូវបណ្តាលឲ្យរងរបួស។
ហេតុការណ៍នេះកើតឡើងកាលពីវេលាម៉ោង១០និង១០នាទីយប់ថ្ងៃទី១២ ខែវិច្ឆិកា ឆ្នាំ២០១៨ ត្រង់ចំណុចក្បែរហាងដូមីណូភីហ្សា តាមបណ្តោយផ្លូវ២៦១ កែងនិងផ្លូវសហព័ន្ធរុស្ស៊ី ស្ថិតក្នុងសង្កាត់ទឹកល្អក់ទី១ ខណ្ឌទួលគោក។
តាមប្រភពព័ត៌មានពីកន្លែងកើតហេតុបានឱ្យដឹងថានៅមុនពេលកើតហេតុ គេឃើញបុរសម្នាក់បានបើកបររថយន្តមួយគ្រឿងម៉ាកព្រូស ពណ៌ស ពាក់ស្លាកលេខ ភ្នំពេញ ២AU-៨៩១៧ធ្វើដំណើរតាមបណ្តោយផ្លូវ២៦១ ក្នុងទិសដៅពីត្បូងទៅជើង និងក្នុងល្បឿនយ៉ាងលឿន ដេញតាមពីក្រោយរថយន្តមិនចាំម៉ាកមួយគ្រឿងទៀត តែមិនដឹងថាមានរឿងអ្វីនោះទេ។
លុះមកដល់ចំណុចកើតហេតុ ដោយសាររថយន្តម៉ាកព្រូសខាងលើខ្វះការប្រុងប្រយ័ត្នក៏ជ្រុលទៅបុកពីក្រោយបុរសម្នាក់ដែលជាអ្នកលាងចាននៅហាងផឹកស៊ីមួយកន្លែង ដែលកំពុងដើរតែម្នាក់ឯងនៅលើចិញ្ចើមផ្លូវ ទើបតែចេញពីកន្លែងធ្វើការនៅក្បែរនោះ គោលបំណងដើរត្រឡប់ទៅផ្ទះវិញ។ បណ្តាលឲ្យអ្នកថ្មើរជើងរងរបួសបែកក្បាល និងរយះចង្ការ ចំណែកឯរថយន្តម៉ាកព្រូសបានរងការខូចខាតដាច់កញ្ចក់មើលក្រោយចំហៀងខាងឆ្វេង។ ភ្លាមៗនោះរថយន្តបង្កក៏បានបន្ថែមល្បឿនបើករត់គេចខ្លួនបាត់ស្រមោល។
ដោយឡែកបុរសរងគ្រោះដែលជាអ្នកថ្មើរជើងត្រូវបានសាច់ញាតិដឹកបញ្ជូនយកទៅសង្គ្រោះនៅឯងមន្ទីរព្រះកុសុមះភ្លាមៗផងដែរ ។
មួយស្ទុះក្រោយក៏ស្រាប់តែអ្នកបើកបររថយន្តបង្កបានបើករថយន្តត្រឡប់មកកន្លែងកើតហេតុវិញក្នុងគោលបំណងមកទារសំណងពីជនរងគ្រោះ តែក៏ត្រូវប្រជាពលរដ្ឋទាក់ទងទៅសមត្ថកិច្ចមូលដ្ឋានឲ្យចុះមកជួយអន្តរាគមន៍។
ក្រោយពេលកើតហេតុក៏មានតំណាងភាគីខាងរថយន្តបង្កបានចូលខ្លួនមកធ្វើការដោះស្រាយនិងសម្របសម្រួលជាមួយភាគីរងគ្រោះ ដោយភាគីខាងរថយន្តបង្កបានចេញសំណងចំនួន១៥០ដុល្លារអោយទៅភាគីរងគ្រោះដើម្បីបញ្ចប់រឿងនៅនឹងកន្លែងកើតហេតុ៕
ចែករំលែកព័តមាននេះ