ខេត្តព្រៃវែង ៖ នាព្រឹកថ្ងៃទី១២ ខែវិច្ឆិកា នៅអតីតកំពង់ចម្លងអ្នកលឿងត្រើយខាងកើតស្ថិតក្នុងឃុំព្រែកខ្សាយ«ក» ស្រុកពាមរក៍ ពិធីបំបែកកំណត់ត្រាពិភពលោកត្រូវបានចាត់ធ្វើឡើងយ៉ាងអធិកអធម ។ នេះគឺជាពេលវេលាដ៏វិសេសវិសាលបំផុតសម្រាប់់ប្រជាពលរដ្ឋខេត្តព្រៃវែង ក៏ដូចជាប្រជាជាតិកម្ពុជាទាំងមូលដែលមានមន្ត្រីអ្នកវិនិច្ឆ័យកំណត់ត្រាពិភពលោក (World …
ខេត្តព្រៃវែង ៖ នាព្រឹកថ្ងៃទី១២ ខែវិច្ឆិកា នៅអតីតកំពង់ចម្លងអ្នកលឿងត្រើយខាងកើតស្ថិតក្នុងឃុំព្រែកខ្សាយ«ក» ស្រុកពាមរក៍ ពិធីបំបែកកំណត់ត្រាពិភពលោកត្រូវបានចាត់ធ្វើឡើងយ៉ាងអធិកអធម ។
នេះគឺជាពេលវេលាដ៏វិសេសវិសាលបំផុតសម្រាប់់ប្រជាពលរដ្ឋខេត្តព្រៃវែង ក៏ដូចជាប្រជាជាតិកម្ពុជាទាំងមូលដែលមានមន្ត្រីអ្នកវិនិច្ឆ័យកំណត់ត្រាពិភពលោក (World Guinness Record ) ចុះមកវាយតម្លៃលើទូកងឈ្មោះ«កម្ពោជិកបុត្តាខេមរាតរី» ដែលសហភាពសហព័ន្ធយុវជនកម្ពុជា សហការជាមួយអាជ្ញាធរខេត្តព្រៃវែង បានកសាងឡើងក្នុងគោលបំណងដើម្បីបំបែកកំណត់ត្រាទូកវែងជាងគេលើពិភពលោក ។
តាមការប្រកាសបានឱ្យដឹងថា ក្រោយពីទទួលការវិនិច្ឆ័យពីតំណាងស្ថាប័ន World Guinness Record ដែលធ្វើការត្រួតពិនិត្យវាស់វែង និងវាយតម្លៃរួចមក ក៏បានសម្រេចទទួលស្គាល់ទូក.ងឈ្មោះ«កម្ពោជិកបុត្តាខេមរាតរី» ពិតជាបានបំបែកឯតទគ្គកម្មពិភពលោកថ្មី ដោយជោគជ័យ ដោយជាប់ជាទូក.ងដែលវែងជាងគេបំផុតក្នុងលោក គឺមានប្រវែង៨៧,៤៧ម៉ែត្រ ឈ្នះទូកនាគរបស់ប្រទេសចិន ម្ចាស់ជ័យលាភីមុន ដែលមានប្រវែង៧៧,៨០ម៉ែត្រ ។
ក្នុងពិធីបំបែកឯតទគ្គកម្មពិភពលោកនេះ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ដែលបានអញ្ជើញជាអធិបតី បានថ្លែងនូវការកោតសរសើរដល់យុវជនខ្មែរគ្រប់ស្រទាប់ទាំងអស់ ដែលបានចូលរួមផ្ដួចផ្ដើមគំនិត និងកសាងទូក.ងវែងជាងគេលើនៅពិភពលោក រហូតឈានដល់ការបំបែកបាននូវឯតទគ្គកម្ម World Guinness Record ។
សម្ដេចក្រឡាហោម ស ខេង បានចាត់ទុកថា ការធ្វើទូក.ងដែលវែងជាងគេរហូតបំបែកឯតទគ្គកម្មបាននេះ មិនមែនជារឿងសាមញ្ញនោះទេ ព្រោះបើគ្មានការផ្ដួចផ្ដើមគំនិត គ្មានឆន្ទៈ គ្មានការរួបរួមគ្នា គ្មានការតស៊ូ អត់ទ្រាំចំពោះការលំបាក ហើយគ្មានបុព្វហេតុច្បាស់លាស់ទេនោះ គឺមិនអាចធ្វើទូកនេះបានទេ ។
បើតាមការគ្រោងទុក ទូក.ងដែលវែងជាងគេលើពិភពលោកនេះ នឹងត្រូវយកទៅដាក់បង្ហាញនៅក្នុងព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នៅមុខព្រះបរមរាជវាំង ដើម្បីឱ្យជនរួមជាតិខ្មែរទាំងអស់ ដែលមកកម្សាន្ដបានទស្សនាដោយផ្ទាល់ ក៏ដូចជាភ្ញៀវទេសចរអន្ដរជាតិបានឃើញ ។ នេះក៏ជាការបង្ហាញមួយទាក់ទាញភ្ញៀវទេសចរផងដែរ ឲ្យយល់កាន់តែច្បាស់អំពីប្រវត្តិសាស្ត្រខ្មែរ ។
គួរបញ្ជាក់ថា ទូក.ងឈ្មោះ«កម្ពោជិកបុត្តាខេមរាតរី» ត្រូវបានផ្តួចផ្តើមគំនិតកសាងឡើងដោយលោក ស សុខា រដ្ឋលេខាធិការក្រសួងអប់រំ យុវជន និងកីឡា និងលោក ជា សុមេធី អភិបាលខេត្តព្រៃវែង ដោយចាប់ផ្តើមស្ថាបនាឡើងកាលពីអំឡុងខែមេសា ឆ្នាំ២០១៨ និងរួចរាល់ជាស្ថាពរនៅចុងខែតុលា ឆ្នាំដដែល គឺមានរយៈពេល១៩២ថ្ងៃ ដោយប្រើប្រាស់ឈើគគីរម្សៅប្រភេទលេខ១ ជាប្រភេទឈើធន់នឹងទឹក គ្រប់អាយុចំនួន៥ដើម រួមទាំងកំណាត់ឈើមួយចំនួនទៀត ។
ទូក.ង«កម្ពោជិកបុត្តាខេមរាតរី» មានន័យថា «ទូក.ងរបស់កូនខ្មែររស់នៅក្នុងដែនដីកម្ពុជា» មានបណ្តោយប្រវែង៨៧,៤៧ម៉ែត្រ ទទឹងប្រមាណជិត២ម៉ែត្រ ជម្រៅ០,៨០ម៉ែត្រ និងផ្ទុកចំណុះមនុស្សបានចំនួន១៧៩នាក់ ។
បើតាមការអះអាងរបស់គណៈកម្មការធ្វើទូក.ងនេះបានឱ្យដឹងថា ទូក.ង«កម្ពោជិកបុត្តាខេម
រាតរី» ត្រូវបានកសាងឡើងក្នុងគោលបំណងចំនួន៣គឺ ៖ ទី១-ដើម្បីរំឭកឡើងវិញនូវប្រវត្តិដ៏យូរលង់នៃការផលិត និងប្រើប្រាស់ទូក.ងរបស់ខ្មែរ តាំងពីសម័យបុរាណ ជាពិសេសរំឭកឡើងវិញនូវស្នាព្រះហស្តរបស់ព្រះមហាក្សត្រខ្មែរគ្រប់ជំនាន់ ក្នុងការប្រើប្រាស់ទូក.ងជាមធ្យោបាយក្នុងការការពារទឹកដី ។ ទី២-ដើម្បីជួយលើកតម្កើងកិត្យានុភាពជាតិ ដោយបង្ហាញពិភពលោកទាំងមូលឱ្យបានដឹងកាន់តែច្បាស់ថា កម្ពុជាអាចបង្កើតស្នាដៃដ៏អស្ចារ្យមួយ ។ ទី៣-គឺជំរុញស្មារតីស្នេហាជាតិ និងសាមគ្គីភាពនៃយុវជនជាកូនចៅជំនាន់ក្រោយ ក្នុងការថែរក្សា និងអភិរក្សកេរដំណែលពីដូនតាជំនាន់មុន ។
សូមជម្រាបថា ទូក.ងរបស់កម្ពុជាដែលជាប់កំណត់ត្រាពិភពលោក World Guinness Record នេះ ត្រូវបានរចនាឡើងដោយផ្នែកខាងក្បាលទូកធ្វើជាក្បាលនាគ និងកន្ទុយហង្ស ប្រកបដោយក្បូរក្បាច់រចនាល្អប្រណីត ។ យ៉ាងណាក៏ដោយ សម្រាប់ក្រុមអ្នករៀបចំកម្មវិធីនេះ បានចាត់ទុកថា នេះគឺជាមោទនភាពជាតិថ្មីមួយទៀតរបស់កម្ពុជា បន្ទាប់ពីការបំបែកកំណត់ត្រាក្រមាវែងជាងគេនៅលើពិភពលោក កាលពីពេលថ្មីៗនេះកន្លងមក ។
សម្រាប់ពិធីដែលជាមោទនភាពថ្មីរបស់ជាតិ និងប្រជាពលរដ្ឋខ្មែរនេះ ក៏មានការចូលរួមពី លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា លោក ស សុខា អនុប្រធានសហភាពសហព័ន្ធយុវជនកម្ពុជា និងជាប្រធានគណៈកម្មការផលិតទូក.ងវែងជាងគេនៅលើពិភពលោក ព្រមទាំងលោក លោកស្រីជាថ្នាក់ដឹកនាំ និងអ្នកពាក់ព័ន្ធជាច្រើនរូបទៀត ។ ចំណុះទូកនៅក្នុងពិធីដ៏អធិកអធមនេះទាំង១៧៩នាក់ គឺ១០០នាក់មកពីកងទ័ពជើងទឹក និង៧៩នាក់ មកពីនគរបាលជើងទឹក ៕
ចែករំលែកព័តមាននេះ