រាជធានីភ្នំពេញ ៖ បុរសម្នាក់ដែលស្រវឹងស្រា បានបើករថយន្តបុកបង្កាន់ដៃស្ពាន ធ្វើឲ្យរថយន្តខ្ទាតវិះធ្លាក់ទឹកអូរ ហើយប្រាប់សមត្ថកិច្ចថា មកពីស្ពានតូចពេក ពិបាកបើកឆ្លងកាត់ ទើបបុកបែបនេះ ។ ហេតុការណ៍នេះ កើតឡើងកាលពីវេលាម៉ោង៧យប់ថ្ងៃទី៧ ខែវិច្ឆិកា នៅតាមផ្លូវបេតុង ចំណុចស្ពានទួលលៀប ស្ថិតក្នុងភូមិត្រពាំងពោធិ៍ សង្កាត់ឪឡោក ខណ្ឌពោធិ៍សែនជ័យ ។
រថយន្តខាងលើម៉ាកកាមរីគូទហើម ពណ៌ស្លែ ពាក់ផ្លាកលេខ ភ្នំពេញ ២D-៦៣២៣ ធ្វើដំណើរក្នុងទិសដៅពីខាងលិចទៅខាងកើត ជិះគ្នា២នាក់ស្ថិតក្នុងស្ថានភាពស្រវឹង ។ប្រភពព័ត៌មានពីប្រជាពលរដ្ឋនិយាយថា រថ
យន្តនេះបើកបរក្នុងល្បឿនលឿន លុះទៅដល់ចំណុចខាងលើ ស្រាប់តែបុកបង្កាន់ដៃស្ពានអូរទួលលៀបចាស់ បណ្តាលឲ្យបាក់បង្កាន់ដៃស្ពានធ្លាក់ចូលអូរ ។ ចំណែករថយន្តវិញបែកពោងសុវត្ថិភាពនិងខ្ទាតទៅទទឹងផ្លូវ ដោយកង់រថយន្តគងលើស្ពានមួយកំណាត់មុខវិះធ្លាក់ទឹកអូរ ។
ប្រភពព័ត៌មានបន្តទៀតថា ខណៈនោះនគរបាលប៉ុស្តិ៍បានមកដល់ហើយសួរនាំអ្នកបើកបរថា ពីការបុកបង្កាន់ដៃស្ពាន ត្រូវបានប្រាប់ថា ស្ពានធ្វើតូចពេកពិបាកបើកបរណាស់ ។ ចំណែកឯមិត្តភក្តិអ្នកបើកបរវិញនិយាយទៅកាន់សមត្ថកិច្ចថា និយាយច្រើនម្លេ៉ះ ម៉េចចង់វាយមួយស្មើ ។
ដោយដឹងថា ពួកគេស្រវឹងនិយាយលែងដឹងខុសត្រូវបែបនេះ នគរបាលប៉ុស្តិ៍ក៏លែងសួរនាំបន្ត ចៀសវាងមានបញ្ហាមិនល្អកើតឡើង ។ បន្ទាប់មក នគរបាលប៉ុស្តិ៍បានទាក់ទងទៅនគរបាលចរាចរណ៍ខណ្ឌពោធិ៍សែនជ័យ ដើម្បីស្ទូចរថយន្តខាងលើទុកប្រគល់ឲ្យការិយាល័យនគរបាលចរាចរណ៍ផ្លូវគោករាជធានីភ្នំពេញយកទៅរក្សាទុក ដោយនាំទាំងអ្នកបើកបរទៅផង ។
ប្រភពព័ត៌មានបានបន្តថា ខណៈនគរបាលប៉ុស្តិ៍ឃាត់ខ្លួនអ្នកបើកបរថយន្តនោះ គេឃើញមានតំណាងជិះរថយន្ដទំនើប១គ្រឿង បានសុំខាងផ្នែកសណ្តាប់ធ្នាប់រាជធានីភ្នំពេញ ដើម្បីសម្របសម្រួលនៅកន្លែងកើតហេតុកុំឲ្យពិនិត្យជាតិស្រវឹងអី ។
ជាចុងក្រោយ នគរបាលការិយាល័យចរាចរណ៍ផ្លូវគោករាជធានីភ្នំពេញ សម្រេចប្រគល់ឲ្យអាជ្ញាធរមូលដ្ឋានយករថយន្តទៅទុកនៅប៉ុស្តិ៍ដើម្បីធ្វើកិច្ចសន្យាជួសជុលបង្កាន់ដៃស្ពានសងហើយ ចាំប្រគល់រថយន្តឲ្យវិញ ៕
ចែករំលែកព័តមាននេះ