រាជធានីភ្នំពេញ ៖ នារីម្នាក់ជាអ្នករួមដំណើរ ចំណែកនារីម្នាក់ទៀតជាអ្នកបើកបររថយន្តក្នុងល្បឿនយ៉ាងលឿន ហើយស្រវឹងតិចតួច ពេលបើកក្នុងល្បឿនយ៉ាងលឿនផង រវល់តែប្រឡែងគ្នាក្នុងរថយន្ត ស្រាប់តែរេចង្កូតជ្រុលទៅបុកជញ្ជាំងផ្ទះប្រជាពលរដ្ឋបណ្តាលអោយបាក់ខ្ទេច ដែលហេតុការណ៍នេះបានកើតឡើងកាលពីវេលាម៉ោង៨និង១៥នាទីយប់ថ្ងៃទី១១ ខែវិច្ឆិកា ឆ្នាំ២០១៨ តាមបណ្តោយផ្លូវជាតិលេខ៦ នៅចំណុចក្បែរនឹងមន្ទីរសាធារណការនឹងដឹកជញ្ជូនស្ថិតនៅក្នុងសង្កាត់ព្រែកលៀប ខណ្ឌជ្រោយចង្វា ។
សាក្សីដែលឃើញហេតុការណ៍បានអោយដឹងថា មុនពេលកើតហេតុ គេឃើញនារី២នាក់ក្នុងនោះនារីម្នាក់ជាអ្នករួមដំណើរ ចំណែកនារីម្នាក់ទៀតជាអ្នកបើកបររថយន្តមួយគ្រឿងម៉ាកព្រូស ពណ៌ស ពាក់ស្លាកលេខ ភ្នំពេញ២Al-៤៤៨៥ បើកបរតាមបណ្តោយផ្លូវជាតិលេខ៦ ក្នុងទិសដៅពីជើងទៅត្បូង ។
លុះពេលបើកមកដល់ចំណុចកើតហេតុខាងលើ ស្រាប់តែរថយន្តរេចង្កូតទៅស្តាំបុកផ្ទះប្រជាពលរដ្ឋជាកន្លែងជួសជុលម៉ូតូពេញទំហឹង បណ្តាលអោយបាក់ជញ្ជាំងផ្ទះមួយផ្ទាំងសង្កត់លើម៉ូតូដែលគេយកមកឲ្យជួសជុលចំនួន៤គ្រឿង ម៉ាស៊ីនម៉ូតូ៣គ្រឿង កង់មួយគ្រឿង និងសម្ភារៈមួយចំនួនទៀត សំណាងល្អដែលនៅក្នុងហេតុការណ៍នេះមិនមានអ្នករងរបួសនោះទេ ។
នារីជាអ្នកបើករថយន្តបាននិយាយប្រាប់ថា មូលហេតុដែលធ្វើអោយគាត់បុកជញ្ជាំងផ្ទះប្រជាពលរដ្ឋគឺមកពីមិត្តភក្តិដែលជិះជាមួយគាត់លេងសើចជាមួយគ្នា និងប្រឡែងគ្នា ហើយមិត្តភក្តិគាត់ទាញដៃគាត់ ទើបធ្វើអោយគាត់រេចង្កូតទៅបុកជញ្ជាំងផ្ទះប្រជាពលរដ្ឋតែម្តង ។
ភ្លាមៗនោះដែរក៏មានលោកទេព ថា ជាអនុសេនីយទោ ទទួលបន្ទុកខាងចរាចរ និងសណ្តាប់ធ្នាប់ម្នាក់ (រហស្សនាម21C)បានមកចុះដោះស្រាយរឿងគ្រោះថ្នាក់ចរាចរ ដោយមិនបានពាក់ឯកសណ្ឋាននោះទេ គឺស្លៀកពាក់ស៊ីវិលទៀត គ្រាន់តែអ្នកសារព័ត៌មានចូលទៅសួរនាំរឿងគ្រោះថ្នាក់ចរាចរសោះ បែរជាមកសម្លុតអ្នកសារព័ត៌មាន ហើយនិយាយថាគាត់មិនដឹងថារឿងហេតុអីនោះទេ ។
ប្រជាពលរដ្ឋនៅកន្លែងកើតហេតុបានលើកឡើងថា អោយតែមានគ្រោះថ្នាក់ចរាចរណ៍នៅក្នុងទឹកដីរបស់គាត់ គឺគាត់តែងតែចុះមកដោះស្រាយ ពេលណាក៏ឃើញតែគាត់ស្រវឹងដែរ ហើយលើកនេះសង្ស័យតែគាត់ស្រវឹងហើយមើលទៅ បានជាចង់បិទបាំងព័ត៌មានមិនអោយអ្នកសារព័ត៌មានដឹងថាគេដោះស្រាយគ្នាយ៉ាងមិចនោះទេ ។
ក្រោយពេលកើតហេតុរថយន្តបង្កត្រូវបានសមត្ថកិច្ចធ្វើការវាស់វែងស្ទូចយកទៅរក្សាទុកនៅការិយាល័យចរាចរណ៍ផ្លូវគោករងចាំដោះស្រាយគ្នានៅពេលក្រោយទៀត ៕
ចែករំលែកព័តមាននេះ