ខេត្តកំពង់ឆ្នាំង ៖ រហូតមកដល់ពេលនេះ ក្រុមជនកាប់ទន្ទ្រានយកដីក្នុងដែនជម្រកសត្វព្រៃភ្នំឱរ៉ាល់ ស្ថិតក្នុងឃុំជៀប ស្រុកទឹកផុស រយៈកាលកន្លងទៅ នៅមិនទាន់ឃើញមានចំណាត់ការតាមផ្លូវច្បាប់ណាមួយនៅឡើយទេ បើទោះបីមានសារព័ត៌មានជាច្រើនបានចុះផ្សាយ និងមានការព្រមានពីលោកអភិបាលខេត្តយ៉ាងណាក្តី ។ ពិតជាគួរឲ្យរិះគន់ពេកណាស់ ដែលប្រៀបបីដូចជាគ្មានសមត្ថកិច្ចខាងណាទទួលខុសត្រូវ ។
គួររំឭកថា ដីនៅចំណុចជើងភ្នំ និងដីជិតកន្លែងកម្សាន្តទឹកធ្លាក់ជាច្រើនហិកតា ត្រូវបានក្រុមជនខិលខូចកាប់ទន្ទ្រានយក ដែលខ្លះទើបកាប់ថ្មី ខ្លះទៀតទើបដុត និងកន្លែងខ្លះទៀតកាប់អស់ឈូសឆាយក្លាយជាដីស្អាតចែស គ្មានដើមឈើមួយដើមឡើយ ។
ដីព្រៃក្នុងដែនជម្រកសត្វព្រៃភ្នំឱរ៉ាល់នេះ មួយចំនួនត្រូវបានក្រុមឈ្មួញទិញពីក្រុមប្រជាពលរដ្ឋលួចកាប់ព្រៃទន្ទ្រានយកដី ឯដីខ្លះទៀតត្រូវឈ្មួញលួចទម្លាក់ប្រាក់ជួលឱ្យប្រជាពលរដ្ឋលួចកាប់ព្រៃមួយថ្ងៃបន្តិចៗ ដល់ពេលព្រៃឈើងាប់អស់ក៏មកលួចដុតកម្ទេច លុះយូៗទៅក្លាយជាដីវាលហើយដាំដំណាំបន្តិចបន្តួច ធ្វើឱ្យដីដែនជម្រកសត្វព្រៃក្លាយជាដីភូមិទៅវិញ ។
បញ្ហានេះ ធ្វើឱ្យមានការចោទប្រកាន់ដល់មន្ត្រីបរិស្ថាន ពិសេសមន្ត្រីដែលគេឱ្យទៅការពារដែនជម្រកសត្វព្រៃថាបានឃុបឃិតឱ្យមានបទល្មើសនេះកើតឡើងដូចដែលលោកអភិបាលខេត្តធ្លាប់លើកឡើងកន្លងមក។ ទោះជាយ៉ាងនេះក្តី លោក ងិន ហ៊ុន ប្រធានមន្ទីរកសិកម្ម រុកា្ខប្រមាញ់ និងនេសាទខេត្ត បានប្រាប់តាមទូរស័ព្ទកាលពីរសៀលថ្ងៃទី៨ខែវិច្ឆិកាថា រឿងនេះលោកអភិបាលខេត្តបានបង្កើតគណៈកម្មការមួយក្រុមឱ្យចុះស្រាវជ្រាវ។
ពេលនេះក្រុមគណៈកម្មការដែលដឹកនាំដោយមន្ត្រីអធិការកិច្ចសាលាខេត្ត កំពុងស៊ើបអង្កេតពិនិត្យផ្ទៃដីដែលរងការខូចខាត និងរកអត្តសញ្ញាណជនដៃដល់ឱ្យបានច្បាស់។ ពេលស្រាវជ្រាវបានហើយ នឹងធ្វើកំណត់ហេតុដាក់ជូនសាលាខេត្តដើម្បចាត់ការប្តឹងទៅតុលាការ ។
គេនៅចាំថា កាលពីពេលកន្លងទៅ លោក ឈួរ ច័ន្ទឌឿន អភិបាលខេត្ត បានប្រតិកម្មខ្លាំងៗទៅនឹងមន្ត្រីបរិស្ថាន ពិសេសអ្នកទៅការពារដែនជម្រកសត្វព្រៃភ្នំឱរា៉ល់ថា បានបណ្តោយឲ្យគេចូលកាប់ព្រៃយកអុស ធ្វើឡធ្យូង និងកាប់ទន្ទ្រានយកដីធ្វើកម្មសិទ្ធិ ហើយចាំទទួលយកលុយប្រចាំខែ ។ ធ្វើយ៉ាងនេះ គឺខុស កុំចង់បានលុយហើយបំផ្លាញខ្លួនឯង ។
គេឱ្យទៅការពារដែនជម្រកសត្វព្រៃ បែរជាឲ្យគេចូលកាប់ព្រៃដល់ពេលព្រៃរលាយអស់តើសត្វវាទៅរស់នៅឯណា? ត្រង់ចំណុចនេះត្រូវគិតគូរឡើងវិញ បើធ្វើមិនកើតទុកឲ្យគេធ្វើ ដាក់អ្នកថ្មីជំនួសវិញ ៕
ចែករំលែកព័តមាននេះ