រាជធានីភ្នំពេញ៖ អ្នកដឹកនាំកម្មវិធីលោក ចា រិទ្ធី បានឆ្លើយតបទៅកាន់ការរិះគន់ពីមហាជនទៅលើប៊ុត សីហា ដែលខកខានក្នុងពេលលោកត្រូវអញ្ជើញ ឲ្យច្រៀងនៅស្ថានីយទូរទស្សន៍អាស៊ីអាគ្នេយ៍កាលពីសប្តាហ៍កន្លងទៅ ។ លោករិទ្ធី បានចាត់ទុកបញ្ហានេះថា ជារឿងតូចតាចក្នុងពេលដែលលោកធ្លាប់ជួបបញ្ហានេះជាបន្តបន្ទាប់សម្រាប់តារាមួយចំនួនទៀត ។
លោកប៊ុត សីហា ត្រូវមហាជនមួយចំនួនរិះគន់ បន្ទាប់ពីធ្លាយដំណឹងថា លោកមិនគោរពម៉ោងពេលវេលា នៅពេលលោកចា រិទ្ធី ផ្តល់ឱកាសឲ្យឡើងឆាកជាថ្មី បន្ទាប់ពីគេជួបរឿងរ៉ាវដ៏អាក្រក់កន្លងមក និងត្រូវផលិតកម្មហង្សមាសកាត់ផ្តាច់កុងត្រា ។ សំឡេងនៃការរិះគន់នេះបានធ្វើអ្នករៀបចំកម្មវិធីលោកចា រិទ្ធី ចេញមុខបកស្រាយ និងបានចាត់ទុករឿងនេះថាជារឿងតូចតាចមួយ ហើយលោកក៏មិនសូវជាចាប់អារម្មណ៍ និងចាត់ទុករឿងនេះជារឿងធំដោយមិនធ្លាប់ជួបប្រទះនោះទេ ។
កាលពីថ្ងៃទី៨ វិច្ឆិកា ២០១៨ លោកចា រិទ្ធី បានបង្ហោះសារតាមហ្វេសប៊ុកថា «សួស្ដីប្អូនប្រុសប៊ុត សីហាជាស្រលាញ់ បងទើបបានឃើញតាមរយៈបណ្ដាញសង្គមFacebook គេចុះពីបញ្ហាប្អួន និងបង ពេលបងបានអានហើយ បងមានអារម្មណ៍អាណិតប្អូនណាស់ មិនគួរណារឿងតូចសោះបែរក្លាយទៅជារឿងធំ ហើយម្យ៉ាងទៀតបងខ្លាចប្អូនយល់ច្រឡំថារឿងនេះត្រូវបានធ្លាយចេញពីបង ។ បងសូមប្រាប់ប្អូនថា រឿងប្អូនមកច្រៀង ឬមិនមកច្រៀងវាជារឿងតូចណាស់សម្រាប់រូបបង ព្រោះកន្លងមកបងតែងតែជួបរឿងបែបនេះជា រឿយៗ គឺមានតារាចម្រៀងខ្លះដល់ម៉ោងផ្សាយផ្ទាល់ហើយទើបតេមកប្រាប់ថាឈឺមកមិនបាន អ្នកខ្លះខលមកថាជាប់ចរាចរណ៍ អ្នកខ្លះថាធ្វើសក់មិនទាន់ អ្នកខ្លះមកយឺតចង់ហួសម៉ោងផ្សាយផ្ទាល់ហើយទើបមកដល់ ។
បញ្ហាទាំងអស់នេះបងតែងតែអធ្យាស្រ័យហើយដោះស្រាយបញ្ហាចំពោះមុខបានយ៉ាងល្អ ហើយមិនឲ្យប៉ះពាល់ដល់កិត្តិយសតារាចម្រៀងណាម្នាក់ទេ រឿងដែលកើតឡើងកន្លងមកនេះមិនមែនបងតាំងចិត្តធ្វើជាមិនខឹងនោះទេ តែបងជាមនុស្សអ៊ីចឹង ជួបបញ្ហាបងត្រូវតែដោះស្រាយ បងមិនអង្គុយរអ៊ូទេ ហើយម្យ៉ាងទៀតកន្លងមកបងតែងតែជួយបើកឱកាសឲ្យ ប្អូនៗទាំងអស់គ្នា គឺមិនដែលបានបិទ ឬបំផ្លាញកិត្តិយសតារាចម្រៀងណាម្នាក់ឡើយ ។ តែចំណែករឿងរបស់ប្អូនវិញសូម្បីមួយម៉ាត់ក៏បងមិនបាននិយាយ ហើយទុកក្នុងចិត្តដែរ តែបងមិនដឹងថាហេតុអីបានជាមានរឿងបែបនេះកើតឡើងចំពោះប្អូន ឲ្យបងសូមទោស ហើយចូលរួមសោកស្ដាយផង »។
ដោយឡែកប៊ុត សីហា បានបញ្ចេញសារលើហ្វេសប៊ុកឆ្លើយតបការរិះគន់ពីមហាជនមួយចំនួនដែរថា «រឿងខ្លះបងប្អូនកុំតាមតែគេញាក់ពេក ។ អ្នកណាមិនចង់បានលុយ អ្នកណាមិនចង់ឡើងច្រៀង ? ខ្ញុំក៏ចេះហត់ដែរ ហើយអារឿងអ៊ីចេះអ៊ីចុះ រឿងយល់ច្រឡំ ឬរឿងអីហ្នឹងបើអាចសូមកាត់បន្ថយទៅ ។ អ្នកក៏ជាខ្មែរដែរ ហើយខំខមិនជេរខ្ញុំឆ្កែឆ្មាហ្នឹង តើអ្នកជាអ្វី ? អ្នកមានចំណេះដឹងអើយ បើបង អស់លោកត្រូវគេជេរវិញអស់លោកចេះឈឺទេ ? ខ្ញុំត្រូវការអ្នកគាំទ្រ អ្នកស្រលាញ់ អ្នកយល់ចិត្តខ្ញុំមកដល់ខ្ញុំ ឡើងមកបានវិញក៏ព្រោះអ្នកស្រលាញ់ បងប្អូនអ្នកគាំទ្រ និងធីមមរតកមេឌៀដែលជួយខ្ញុំ មិនមែនអ្នកជេរហ្នឹងទេ ? សូមចេះរស់នៅឲ្យមានសុជីវធម៌ផង ចេះមានខួរជាខ្មែរផង កុំចេះតែខាំខ្ញុំពេក ។
បើបងប្អូនស្រលាញ់ខ្ញុំ សូមជួយគាំទ្រក្រុមមរតកមេឌៀចុះព្រោះមានគ្រប់ទម្រង់ដែលជារបស់ខ្មែរ »៕
ចែករំលែកព័តមាននេះ