ខេត្តពោធិ៍សាត់ ៖ លោកឧត្តមសេនីយ៍ត្រីរស់ ប៊ុនណាន ស្នងការរងនគរបាលខេត្ត ទទួលបន្ទុកផែនប្រឆាំងបទល្មើស កាលពីថ្ងៃទី៧ ខែវិច្ឆិកាកន្លងទៅ បានដឹកនាំកម្លាំងនគរបាលខេត្តនគរបាលស្រុកបាកាន និងនគរបាលប៉ុស្តិ៍រដ្ឋបាល…
ខេត្តពោធិ៍សាត់ ៖ លោកឧត្តមសេនីយ៍ត្រីរស់ ប៊ុនណាន ស្នងការរងនគរបាលខេត្ត ទទួលបន្ទុកផែនប្រឆាំងបទល្មើស កាលពីថ្ងៃទី៧ ខែវិច្ឆិកាកន្លងទៅ បានដឹកនាំកម្លាំងនគរបាលខេត្តនគរបាលស្រុកបាកាន និងនគរបាលប៉ុស្តិ៍រដ្ឋបាល ដោយមានការចូលរួមពីអាជ្ញាធរមូលដ្ឋាន និងកម្លាំងប្រជាការពារផង ចុះបង្ក្រាបអ្នកលួចដាំកញ្ឆាក្នុងដីចម្ការ នៅចំណុចទ្រូងខ្លា ស្ថិតក្នុង ភូមិតាំងគោក ឃុំតាលោ ស្រុកបាកាន ។
ក្នុងការចុះបង្ក្រាបនេះ សមត្ថកិច្ចបានរកឃើញការដាំកញ្ឆានៅក្នុងដីចម្ការរបស់ឈ្មោះ នៅ នឿន ភេទប្រុស អាយុ៦២ឆ្នាំ រស់នៅភូមិថ្មី ឃុំតាលោ ស្រុកបាកាន និងដីចម្ការរបស់ឈ្មោះ រី ភេទប្រុស មកពីខេត្តតាកែវ សរុបចំនួន១០កន្លែង ស្មើនឹង៣.៥៦៩ដើម ក្នុងនោះដើមចាស់ចំនួន២.៥៨៦ដើម និងដាំថ្មីចំនួន៩៨៣ដើម ។
ដើមកញ្ឆាទាំងថ្មីទាំងចាស់ ត្រូវបានកាប់និងដុតបំផ្លាញចោលនៅនឹងកន្លែង ព្រមទាំងបានដកហូតកញ្ឆាស្ងួតចំនួន៥គីឡូក្រាម ម៉ាស៊ីនបូមទឹក១គ្រឿង ទុយោ៦ដុំស្មើនឹង៥០ម៉ែត្រ ធុងបាញ់ថ្នាំ១ និងកាំភ្លើងស្នប់ចំនួន២។លោក នៅ នឿន ជាម្ចាស់ចម្ការបានប្រាប់សមត្ថកិច្ចថា កញ្ឆាទាំងអស់នេះគឺឈ្មោះ រី ជាអ្នកដាំ ហើយពេលនេះគាត់គេចខ្លួនបាត់ហើយ ។
លោកស្នងការរង រស់ ប៊ុនណាន មានប្រសាសន៍ថា ដំណាំកញ្ឆាគឺរាជរដ្ឋាភិបាលមិនអនុញ្ញាតឲ្យដាំទេ ព្រោះវាជាសារធាតុញៀនដែលច្បាប់ហាមឃាត់ ។ លោកបានអំពាវនាវដល់បងប្អូនប្រជាពលរដ្ឋ បញ្ឈប់ការដាំកញ្ឆានេះជាបន្ទាន់ ហើយសូមឲ្យសមត្ថកិច្ចនិងអាជ្ញាធរមូលដ្ឋានរួមគ្នាបង្ក្រាបឲ្យបាននៅគ្រប់ទីកន្លែង ដើម្បីអនាគតកូនចៅយើង ។ ម្ចាស់ចម្ការ កញ្ឆាស្ងួត និងវត្ថុតាងមួយចំនួនទៀត សមត្ថកិច្ចបានកសាងសំណុំរឿងបញ្ជូនទៅសាលាដំបូង ដើម្បីចាត់ការបន្តតាមនីតិវិធី ៕
ចែករំលែកព័តមាននេះ