ទីក្រុងប៉េកាំង ៖ យោងតាមរបាយការណ៍របស់រដ្ឋាភិបាលចិនដែលបានចេញកាលពីថ្ងៃអង្គារបានឲ្យដឹងថា ប្រទេសចិនមានគម្រោងបង្កើនការនាំចូលក្នុងវិស័យសេវាកម្មក្នុងអំឡុងពេល៥ឆ្នាំខាងមុខនេះ ដើម្បីជួបនឹងតម្រូវការក្នុងស្រុក និងចូលរួមចំណែកបន្ថែមក្នុងការធ្វើពាណិជ្ជកម្មពិភពលោក ។
របាយការណ៍នេះបានឲ្យដឹងថា ការនាំចូលសេវាកម្មសរុបរបស់ប្រទេសចិនត្រូវបានគិតថា នឹងកើនដល់២,៥ទ្រីលានដុល្លារឯណោះក្នុងអំឡុងពេល៥ឆ្នាំខាងមុខនេះ ឬស្មើច្រើនជាង១០%នៃការនាំចូលសេវាកម្មសរុបជុំវិញពិភពលោកទៅទៀត ។
ការសម្រេចចិត្តខាងលើ គឺជាផ្នែកមួយនៃគោលដៅរយៈពេលវែងរបស់ប្រទេសចិនដូចដែលបានប្រកាសនៅពិធីសម្ពោធការតាំងពិព័រណ៍ផលិតផលនាំចូលអន្តរជាតិក្នុងពេលថ្មីៗនេះនៅសៀងហៃ និងអាចបង្កើនការនាំចូលសេវាកម្មសរុបរបស់ប្រទេសចិនឲ្យលើស១០ទ្រីលានដុល្លារក្នុងរយៈពេល១៥ឆ្នាំខាងមុខ ។
ប្រធាននាយកដ្ឋានពាណិជ្ជកម្មសេវាកម្ម លោក Xian Guoyi បាននិយាយថា ការនាំចូលសេវាកម្មរបស់ប្រទេសចិនបានជួយដល់ជីវិតរបស់ប្រជាជនចិន សម្របសម្រួលការកែប្រែនិងស្ថាបនាវិស័យឧស្សាហកម្មក្នុងស្រុក និងបានផ្តល់ឱកាសថ្មីៗសម្រាប់ការលូតលាស់ពាណិជ្ជកម្មជុំវិញពិភពលោកផងដែរ ។
គួរបញ្ជាក់ដែរថា ការធ្វើពាណិជ្ជកម្មសេវាកម្មគឺជាការលក់ផលិតផលអរូបីដូចជាធនារ៉ាប់រង ការដឹកជញ្ជូន ទេសចរណ៍ ទូរគមនាគមន៍ និងការផ្សាយពាណិជ្ជកម្មជាដើម ។
របាយការណ៍ខាងលើបានឲ្យដឹងទៀតថា ប្រទេសចិនគឺជាប្រទេសចូលរួមធំជាងគេដល់កំណើនការនាំចូលសេវាកម្ម ។ ក្នុងរយៈពេល៥ឆ្នាំកន្លងមកនេះ ការនាំចូលសេវាកម្មរបស់ប្រទេសចិនបានចូលរូម ២៥,៨%ដល់កំណើនការនាំចូលសេវាកម្មជុំវិញពិភពលោក ។
ក្នុងអំឡុងពេល៣ត្រីមាសមកនេះ ប្រទេសចិននាំចូលសេវាកម្មបាន៣៧៧,៤ប៊ីលានដុល្លារ ឬច្រើនជាងឆ្នាំមុន៨,៩%។ ក្រសួងខាងលើបានឲ្យដឹងថា ការលូតលាស់សេដ្ឋកិច្ចក្នុងស្រុក វិធានការបើកទូលាយទីផ្សារ និងគោលនយោបាយគាំទ្រវិស័យនេះ បានជួយជំរុញដល់កំណើននៃការនាំចូល ៕
ចែករំលែកព័តមាននេះ