ខេត្តបន្ទាយមានជ័យ ៖ ភ្នំត្រងោល ដែលមានទីតាំងស្ថិតនៅក្នុងភូមិចំបក់ ឃុំបឹងបេង ស្រុកម៉ាឡៃ ពេលនេះកំពុងត្រូវបានគេកាយយកដីថ្មធ្វើអាជីវកម្មលក់ព្រោងព្រៀតក្រោមរូបភាពត្រីងៀតឆ្លៀតពង ឬកន្ទេលធំបន្លំដេកដោយសំអាងលើពលរដ្ឋ និងអាជ្ញាធរឯកភាពសុំឲ្យជួយធ្វើផ្លូវឆ្លងកាត់ភ្នំ ។
រថយន្តដឹកដីថ្មភ្នំខាងលើកំពុងចរាចរដឹកលក់ចាក់ទីតាំងផ្សេងៗក្នុងនោះមានទាំងទីតាំងពុះដីល្វែងលក់ ទំហំជិត2ហិកតាផងដែរ ខណៈផ្លូវដែលត្រូវពលរដ្ឋ និងអាជ្ញាធរស្នើឲ្យជួយនោះបានធ្វើរួចរាល់ហើយ ។
ជួបសម្ភាសផ្ទាល់ជាមួយម្ចាស់គ្រឿងចក្រនៅកន្លែងកើតហេតុឈ្មោះ ជា ង៉ែត ភេទប្រុស អាយុ36ឆ្នាំ មានទីលំនៅភូមិព្រៃទទឹង2 ឃុំ-ស្រុកបវេល ខេត្តបាត់ដំបង និយាយថា ការកាយថ្មភ្នំនេះផ្អែកតាមការផ្តិតមេដៃរបស់ប្រជាពលរដ្ឋ2ភូមិ ក្នុងឃុំបឹងបេង និងមានការឯកភាពពីអាជ្ញាធរមូលដ្ឋានស្នើឲ្យលោកជួយធ្វើផ្លូវឆ្លងកាត់ចន្លោះភ្នំដើម្បីបានធ្វើដំណើរទៅមក និងដឹកកសិផលតាមចំការ ។
ធាតុពិតផ្លូវដែលអ្នកស្រុកស្នើជួយធ្វើនោះគេឃើញរួចរាល់ទៅហើយ ហើយអ្នកស្រុកធ្វើដំណើរ និងដេញគោឃ្វាលឆ្លងកាត់ព្រោងព្រៀតតែក្រុមគ្រឿងចក្រនៅតែបន្តកាយយកដីថ្មភ្នំកន្លែងផ្សេងទៀតក្រោមលេសថា អាជ្ញាធរឲ្យធ្វើផ្លូវភ្លោះ ។ ក្រៅពីទីតាំងកំពុងធ្វើសកម្មភាពមានទីតាំងមួយខាងកើតឈាងខាងត្បូងផ្លូវចាស់ដែលមានស្រាប់ក៏មានស្នាមកាយយកដីថ្មភ្នំអស់ជាច្រើនដែរ ។
អ្នកភូមិឆ្លងកាត់កន្លែងកើតហេតុម្នាក់សុំមិនបញ្ចេញឈ្មោះនិយាយថា ការពិតក្រុមគ្រឿងចក្រធ្វើលើសគោលការណ៌ហើយ ។ អ្នកស្រុកបានស្នើសុំឲ្យក្រុមគ្រឿងចក្រខាងលើជួយធ្វើផ្លូវចូកកាយដីថ្មចំណុចផ្លូវចាស់មែនព្រោះខ្ពស់ពេក តែមិនគួរយកអាចម៌ដីចំណុចផ្លូវចាស់រួចរាល់ហើយនោះ បែរជាមិនបញ្ឈប់សកម្មភាពឈានទៅបន្តកាយទីតាំងផ្សេងៗ ដូចជាប៉ែកខាងកើតឈាងខាងត្បូងផ្លូវ និងទីតាំងកំពុងធ្វើសកម្មភាពថែមទៀត ។
ជុំវិញករណីខាងលើលោក ចាន់ រិន មេឃុំបឹងបេងប្រាប់តាមទូរស័ព្ទថា ដោយសារផ្លូវចាស់ឆ្លងកាត់ភ្នំត្រងោលនោះខ្ពស់ ហើយកន្លងមក (ឆ្នាំ2017) មានករណីគ្រោះថ្នាក់ក្រឡាប់គោយន្តបង្កជារបួសអ្នកស្រុកទើបអាជ្ញាធរបានឯកភាពគ្នាជាមួយពលរដ្ឋរកគ្រឿងចក្រកាយទីតាំងផ្លូវចាស់នោះដើម្បីឲ្យទាបងាយស្រួលដល់អ្នកស្រុកឆ្លងកាត់ពិសេសការដឹកកសិផលពីតាមចំការ ។
លោកមេឃុំអះអាងថា ពលរដ្ឋ2ភូមិ គឺភូមិចំបក់ និងភូមិជ្រៃបានផ្តិតមេដៃឯកភាពឲ្យក្រុមគ្រឿងចក្រខាងលើជួយធ្វើផ្លូវមែន ប៉ុន្តែលោកថា ការឲ្យជួយធ្វើផ្លូវនោះពលរដ្ឋ និងអាជ្ញាធរឲ្យយកតែអាចម៌ដីថ្មលើទីតាំងផ្លូវចាស់ព្រោះគ្មានប្រាក់ជួល ។ គាត់បន្តថា អាជ្ញាធរមិនបានឯកភាពឲ្យកាយដីថ្មលើទីតាំងផ្សេងៗឡើយ ហើយក៏មិនបានឲ្យធ្វើផ្លូវភ្លោះនោះដែរ ៕
ចែករំលែកព័តមាននេះ