រាជធានីភ្នំពេញ ៖ ពិតជាមិនមានអ្វីប្រែប្រួលទេ គម្រោងសាងសង់ផ្លូវល្បឿនលឿនពីភ្នំពេញឆ្ពោះទៅខេត្តព្រះសីហនុ ដែលមានចម្ងាយប្រមាណជាង១៩០គីឡូម៉ែត្រ នឹងចាប់ផ្ដើមបើកការដ្ឋាននៅចុងឆ្នាំនេះ ឬដើមឆ្នាំ២០១៩ខាងមុខ ។ នេះបើតាមការបញ្ជាក់ពីមន្ត្រីក្រសួងសាធារណការ និងដឹកជញ្ជូន ។
ថ្លែងប្រាប់កោះសន្ដិភាពតាមទូរស័ព្ទកាលពីរសៀលថ្ងៃទី៨ វិច្ឆិកា ម្សិលមិញ លោក នូ វឌ្ឍនៈ អគ្គនាយករងនៃអគ្គនាយករដ្ឋានសាធារណការនៃក្រសួងសាធារណការ និងដឹកជញ្ជូន បានបញ្ជាក់ថា គម្រោងសាងសង់ផ្លូវល្បឿនលឿនពីភ្នំពេញទៅខេត្តព្រះសីហនុនេះ នឹងចាប់ផ្តើមបើកការដ្ឋាននៅចុងឆ្នាំ២០១៨ មិនមានការប្រែប្រួលទេ ។ លោកបន្ដថា ៖« ការដោះស្រាយពីផលប៉ះពាល់នៃគម្រោង គឺធ្វើក្នុងពេលតែមួយ ។ អ្នកសាងសង់ចេះតែធ្វើការងាររបស់ខ្លួន ហើយក្រុមអ្នកដោះស្រាយប៉ះពាល់គឺដោះជាបណ្តើរៗ »។
បើតាមមន្ត្រីអ្នកនាំពាក្យក្រសួងសាធារណការ និងដឹកជញ្ជូន បានបញ្ជាក់បន្ថែមនៅថ្ងៃដដែលនេះថា ផ្លូវល្បឿនលឿននេះ មិនបានកំណត់ថ្ងៃណាឱ្យជាក់លាក់នោះ តែបើតាមកាលវិភាគ នឹងចាប់ផ្តើមសាងសង់នៅចុងឆ្នាំ២០១៨នេះ ឬដើមឆ្នាំ២០១៩ ព្រោះការសម្រេចនេះ វាមិនស្ថិតតែលើក្រសួងមួយនោះទេ ត្រូវសុំថ្នាក់ដឹកនាំដើម្បីសម្រេច ។
លោក វ៉ាស៊ឹម សុរិយា មន្ត្រីអ្នកនាំពាក្យរូបនេះបានបញ្ជាក់ថា ៖« យើងអត់ទាន់ប្រាកដថ្ងៃជាក់លាក់ទេ ប៉ុន្តែនៅឆ្នាំហ្នឹងយើងនឹងរៀបចំពិធីបើកការដ្ឋានសាងសង់ ព្រោះនេះវាមិនមែនជាការសម្រេចរបស់ក្រសួងតែម្នាក់នោះទេ ត្រូវសុំទៅថ្នាក់ដឹកនាំរាជរដ្ឋាភិបាល ដើម្បីសម្រេចនិងអញ្ចើញចូលរួមនៅក្នុងពិធី ។ អីចឹងយើងត្រូវមានជាគោលការណ៍។ តែបើជាកាលវិភាគ យើងកំណត់នៅចុងឆ្នាំ២០១៨ ឬដើមឆ្នាំ២០១៩ »។
លោកបញ្ជាក់បន្ថែមថា ៖« គម្រោងសាងសង់ផ្លូវល្បឿនលឿននេះ បើឱ្យកំណត់ថ្ងៃណាជាក់លាក់ យើងអត់អាចកំណត់ជូនបានទេ ដោយសារទី១-យើងមើលទៅលើលទ្ធភាពរបស់ក្រុមហ៊ុននៅក្នុងការចល័តគ្រឿងចក្រ។ ទី២-មើលទៅលើការដោះស្រាយផលប៉ះពាល់ និងទី៣-ផ្នែកទៅលើនីតិវិធីចុងក្រោយ ប៉ុន្តែនីតិវិធីខ្លះត្រូវកែសម្រួលឡើងវិញ » ។
ផ្លូវល្បឿនលឿនមួយខ្សែនេះ ប្រវែងជាង១៩០គីឡូម៉ែត្រ ដែលគ្រោងចំណាយថវិកាសាងសង់ប្រមាណ១.៩០០លានដុល្លារ ដោយប្រើពេលសាងសង់រយៈពេល៤ឆ្នាំ ។ ផ្លូវនេះនឹងចាប់ផ្ដើមចេញតំបន់ទំនប់កប់ស្រូវ ស្ថិតនៅផ្នែកខាងស្តាំនៃផ្លូវជាតិលេខ៤ រហូតដល់ប្រមាណ៣០គីឡូម៉ែត្រ ទើបងាកមកខាងឆ្វេងដៃវិញ ហើយបន្ដដល់ស្រុកព្រៃនប់ ទើបងាកមកខាងស្តាំដៃរហូតដល់ក្រុងព្រះសីហនុតែម្ដង ។
បើតាមលោក នូ វឌ្ឍនៈ ផ្លូវនេះមានទំហំទទឹង២៤ម៉ែត្រ ជាផ្លូវ៤គន្លង ក្រាលកៅស៊ូAC មានសួនច្បារចំកណ្តាល មានផ្លូវបំបែកប្តូរទិស មានទីតាំងឈប់សម្រាក មានរបងសងខាងផ្លូវ និងហេដ្ឋារចនាសម្ព័ន្ធសំណង់សេវាគាំទ្រជាច្រើនទៀត ដូចជាស្ពានវែង និងមធ្យមចំនួន៥កន្លែង, ស្ពានខ្លី៣៣កន្លែង, ស្ពានរំលងឬផ្លោះផ្លូវ៣២១កន្លែង និងមានកន្លែងឈប់សម្រាកចំនួន៣កន្លែង ។ ការចាប់ផ្ដើមដំណើរការគម្រោងមួយនេះ នឹងធ្វើឲ្យវិនិយោគិនមានទំនុកចិត្តបន្ថែមទៀត ក្នុងការបណ្ដាក់ទុនវិនិយោគនៅកម្ពុជា ។ នេះបើតាមលោក វ៉ាស៊ឹម សុរិយា ។ លោកលើកឡើងថា ៖« ជាធម្មតា វិនិយោគិនគេនឹងមើលទៅលើការវិនិយោគរបស់រាជរដ្ឋាភិបាលឬប្រទេសនីមួយៗកំពុងតែអនុវត្ត មានជាគម្រោងធំៗច្រើន ដូចជាផ្លូវល្បឿនលឿន,ព្រលានយន្តហោះ, ស្ពានធំៗ ឬក៏កំពង់ផែធំៗជាដើម នៅពេលនោះ ពួកគេនឹងមានជំនឿចិត្តមកលើរាជរដ្ឋាភិបាលដែលមានការប្តេជ្ញាចិត្តអភិវឌ្ឍន៍ប្រទេស និងរក្សាសន្តិភាព »។
លោកបណ្ឌិតម៉ី កល្យាណ ប្រធានក្រុមប្រឹក្សាវិទ្យាស្ថានសិក្សាការអភិវឌ្ឍបានថ្លែងថា បញ្ហាហេដ្ឋារចនាសម្ព័ន្ធជារឿងប្រឈមមួយក្នុងការអភិវឌ្ឍសេដ្ឋកិច្ចកម្ពុជា ប៉ុន្តែរដ្ឋាភិបាលក្នុងប៉ុន្មានឆ្នាំចុងក្រោយនេះបានរៀបចំគោលនយោបាយ និងវិនិយោគលើហេដ្ឋារចនាសម្ព័ន្ធ យ៉ាងច្រើន ដើម្បីជំរុញកំណើនសេដ្ឋកិច្ច
ជាតិ ។ លោកបន្តថា អ្វីដែលរាជរដ្ឋាភិបាលបានធ្វើ គឺស្ថិតក្នុងទិសដៅត្រឹមត្រូវមួយហើយ ប៉ុន្តែលោកស្នើសុំឲ្យមានការពន្លឿនការវិនិយោគលើហេដ្ឋារចនាសម្ព័ន្ធបន្ថែមទៀត ដើម្បីកាត់បន្ថយតម្លៃដើមនៃការដឹកជញ្ជូន ។ លោកបន្ថែមថា ៖« វាជារឿងចាំបាច់ដែលត្រូវកសាងហេដ្ឋារចនាសម្ព័ន្ធ ដើម្បីរុញសេដ្ឋកិច្ចកម្ពុជាទៅកាន់ដំណាក់កាលថ្មីមួយទៀត ព្រោះបើចង់ឲ្យសេដ្ឋកិច្ចកម្ពុជាកើនឡើង និងឈានទៅកាន់លំដាប់ថ្មី កម្ពុជាត្រូវការវិនិយោគលើហេដ្ឋារចនាសម្ព័ន្ធបន្ថែមទៀត »។
ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន នាយករដ្ឋមន្ត្រី បានថ្លែងបញ្ជាក់កន្លងមកថា ៖« ផ្លូវល្បឿនលឿននេះ គឺមានសារសំខាន់ខ្លាំងណាស់សម្រាប់កម្ពុជា ក្នុងការជំរុញកំណើនសេដ្ឋកិច្ច ពិសេសគឺភ្ជាប់រវាងប៉ូលសេដ្ឋកិច្ចភ្នំពេញ និងខេត្តព្រះសីហនុ »៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ