ចោរប្លន់មាសហាង«G99»…ជាជនជាតិថៃសោះ
- បន្ទាយមានជ័យ
ខេត្តបន្ទាយមានជ័យ ៖ ជនសង្ស័យក្នុងអំពើប្លន់ហាងលក់មាសយីហោ «G៩៩» ជិតធនាគារកសិករ ជាប់ផ្សាររុងក្លឿ ក្នុងស្រុកអារញ្ញ ខេត្តស្រះកែវ កាលពីរសៀលថ្ងៃទី១ ខែវិច្ឆិកា…
ខេត្តបន្ទាយមានជ័យ ៖ ជនសង្ស័យក្នុងអំពើប្លន់ហាងលក់មាសយីហោ «G៩៩» ជិតធនាគារកសិករ ជាប់ផ្សាររុងក្លឿ ក្នុងស្រុកអារញ្ញ ខេត្តស្រះកែវ កាលពីរសៀលថ្ងៃទី១ ខែវិច្ឆិកា កន្លងទៅ ត្រូវសមត្ថកិច្ចថៃចាប់ខ្លួនបានហើយ គឺជាជនជាតិថៃ និងជាអ្នកស្រុកវ៉ាត់ថាណាណាក់ខន ខេត្តស្រះកែវ ។ នេះបើយោងតាមប្រភពពីភាគីថៃ ។ ក្រោយពីចាប់ខ្លួន ជនសង្ស័យត្រូវបានសមត្ថកិច្ចថៃ នាំមកធ្វើត្រាប់ពីអំពើប្លន់នៅកន្លែងកើតហេតុនារសៀលថ្ងៃទី៦ ខែវិច្ឆិកា ។
មុននេះ ការនិយាយមិនយកជាផ្លូវការតគ្នាៗក្រោយពេលកើតមានអំពើប្លន់នោះ ត្រូវគេសង្ស័យថា ចោរប្លន់នោះអាចជាខ្មែរ ព្រោះតែចោរនោះបានលោតចូលអូរព្រំដែនរវាងប្រទេសទាំង២ ។ ប៉ុន្តែអ្វីដែលជាភ័ស្តុតាងជាក់ស្តែងគឺខុសស្រឡះ ដែលការពិតជនសង្ស័យគឺជាជនជាតិថៃ និងជាអ្នកស្រុកវ៉ាត់ថាណាណាក់ខន ខេត្តស្រះកែវ មានអាយុ២៧ឆ្នាំ ឈ្មោះ ស៊ុន សាក់សែនឡឺត ។
សូមរំឭកថា ចោរប្រដាប់អាវុធម្នាក់បានចូលប្លន់ហាងមាសយីហោG៩៩ យកអស់មាសគិតជាទឹកប្រាក់ស្មើនឹង៤៨០.០០០បាត កាលពីវេលាម៉ោង២និង៤៣នាទីរសៀលថ្ងៃទី១ វិច្ឆិកាកន្លងទៅ នៅផ្សាររុងក្លឿ ស្រុកអារញ្ញ ខេត្តស្រះកែវ ប្រទេសថៃ ជាផ្សារដែលអាជីវករខ្មែរភាគច្រើនលក់ដូរនៅទីនោះ ។
តាមព័ត៌មានឱ្យដឹងថា នៅពេលចោរចូលប្លន់ហាងមាសដែលនៅក្បែរធនាគារកសិករ គឺគេឃើញជនម្នាក់ជិះម៉ូតូពណ៌ខ្មៅ មិនស្គាល់ម៉ាក ពាក់ម៉ាស់បិទមុខ និងពាក់មួក បានចុះពីម៉ូតូប្រដាប់ដោយអាវុធខ្លីសម្រុកចូលក្នុងហាងលក់មាស ។ បន្ទាប់មក ជននេះបានធ្វើសកម្មភាពដោយយកកាំភ្លើងខ្លីភ្ជង់ម្ចាស់ហាង ហើយប្រមូលយកគ្រឿងអលង្ការជាមាសសុទ្ធដាក់ក្នុងកាបូប រួចជិះម៉ូតូគេចខ្លួនទៅបាត់ដោយសុវត្ថិ
ភាព ។ ទោះជាយ៉ាងណា ករណីប្លន់ប្រដាប់អាវុធនេះមិនបណ្តាលឲ្យមានអ្នករងរបួសឡើយ ។
ក្រោយពេលមានហេតុការណ៍ប្លន់កើតឡើងសមត្ថកិច្ចក៏មកដល់តែចោរបានចេញផុតទៅហើយ ហើយករណីប្លន់នេះក៏បានធ្វើឱ្យអាជីវករខ្មែរលក់ដូរនៅក្នុងផ្សាររុងក្លឿមានការភ្ញាក់ផ្អើលនិងភ័យខ្លាចផងដែរ ៕
ចែករំលែកព័តមាននេះ