ខេត្តពោធិ៍សាត់៖ ក្មេងប្រុសវ័យជំទង់២នាក់បានជិះម៉ូតូមួយគ្រឿងឌុបគ្នាបានទៅកៀរនឹងគោយន្ដដែលកំពុងដឹកមនុស្សមកពីបុណ្យកឋិន បណ្ដាលឲ្យអ្នកបើកបរម៉ូតូបាក់ដៃបាក់ជើងរងរបួសយ៉ាងធ្ងន់ធ្ងរ ឯអ្នករួមដំណើរបានរងបួសស្រាល។ គ្រោះថ្នាក់ចរាចរណ៍នេះបានកើតឡើងនៅភូមិត្រាំសេះ ឃុំបឹងបត់កណ្ដោល ស្រុកបាកាន កាលពីថ្ងៃទី៧ ខែវិច្ឆិកា ឆ្នាំ២០១៨…
ខេត្តពោធិ៍សាត់៖ ក្មេងប្រុសវ័យជំទង់២នាក់បានជិះម៉ូតូមួយគ្រឿងឌុបគ្នាបានទៅកៀរនឹងគោយន្ដដែលកំពុងដឹកមនុស្សមកពីបុណ្យកឋិន បណ្ដាលឲ្យអ្នកបើកបរម៉ូតូបាក់ដៃបាក់ជើងរងរបួសយ៉ាងធ្ងន់ធ្ងរ ឯអ្នករួមដំណើរបានរងបួសស្រាល។ គ្រោះថ្នាក់ចរាចរណ៍នេះបានកើតឡើងនៅភូមិត្រាំសេះ ឃុំបឹងបត់កណ្ដោល ស្រុកបាកាន កាលពីថ្ងៃទី៧ ខែវិច្ឆិកា ឆ្នាំ២០១៨ វេលាម៉ោង៧យប់។
សមត្ថកិច្ចឲ្យដឹងថា ជនរងគ្រោះដែលជាអ្នកបើកម៉ូតូឈ្មោះ ម៉ោត បណ្ឌិត ភេទប្រុស អាយុ១៧ឆ្នាំ រស់នៅភូមិប៉ោឡោ ឃុំមេទឹក ស្រុកបាកាន និងអ្នករួមដំណើរឈ្មោះ រី សីហា ភេទប្រុស អាយុ១៨ឆ្នាំ រស់នៅភូមិអង្កាញ់ ឃុំមេទឹក ស្រុកបាកាន។ ម៉ូតូដែលជនរងគ្រោះជិះម៉ាកហុងដាសេ១២៥ ស៊េរីឆ្នាំ២០១០ ពាក់ស្លាកលេខ ពោធិ៍សាត់ ១C-២២៧៨ ។
សមត្ថកិច្ចឲ្យដឹងថា នៅថ្ងៃនោះប្រជាពលរដ្ឋស្រីប្រុសចាស់ក្មេងបានជិះគោយន្ដកន្ត្រៃមានសណ្ដោងរ៉ឺម៉កត្រឡប់មកពីបុណ្យកឋិនទាននៅវត្តភូមិអូរ ឃុំបឹងបត់កណ្ដោល ស្រុកបាកាន។
លុះពេលធ្វើដំណើរទៅដល់ភូមិត្រាំសេះ ឃុំបឹងបត់កណ្ដោល ត្រង់ចំណុចផ្លូវកោង ស្រាប់តែមានម៉ូតូមួយគ្រឿងជិះគ្នា២នាក់មកពីមុខ យ៉ាងលឿន បានកៀរជាមួយគោយន្ដ បណ្ដាលឲ្យអ្នកបើកម៉ូតូរងរបួសបាក់ជើងឆ្វេង និងដៃឆ្វេងធ្ងន់ធ្ងរ ឯអ្នករួមដំណើរបានរងរបួសស្រាល។ ចំណែកអ្នកជិះលើគោយន្ដពុំមានអ្នករងរបួសនោះទេ។
ក្រោយពេលកើតហេតុ ម៉ូតូ និងគោយន្ដកន្ត្រៃត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុកបាកាន ដើម្បីដោះស្រាយនៅពេលក្រោយ។ ចំណែកអ្នកបើកគោយន្ដបានរត់គេចខ្លួន សមត្ថកិច្ចកំពុងស្វែងរក ដើម្បីឃាត់ខ្លួនឲ្យមកទទួលខុសត្រូវចំពោះមុខច្បាប់៕
ចែករំលែកព័តមាននេះ