ខេត្តព្រៃវែង ៖ មន្ត្រីជំនាញសាខាកាំកុងត្រូលខេត្តព្រៃវែងសហការជាមួយមន្ត្រីមន្ទីរពាណិជ្ជកម្មបានចុះត្រួតពិនិត្យទំនិញនៅព្រឹកថ្ងៃទី០៧ វិច្ឆិកានេះ ដែលដាក់តាំងលក់នៅក្នុងផ្សារស្វាយអន្ទរ ដែលស្ថិតនៅតាមបណ្តោយផ្លូវជាតិលេខ១១ ក្នុងភូមិពោធិ៍ចិន្តាំ ឃុំស្វាយអន្ទរ ស្រុកស្វាយអន្ទរ ខេត្តព្រៃវែង ។
ក្នុងសកម្មភាពត្រួតពិនិត្យនេះមន្ត្រីជំនាញបានធ្វើតេស្តបឋមរកវត្តមានសារធាតុគីមីហាមឃាត់លើសរសៃរគុយទាវ, ប្រហិតសាច់គោ, ណែមត្រី, ជ្រក់ និងបន្លែផ្លែឈើ សរុបបានចំនួន១១គំរូ ដែលលទ្ធផលមន្ត្រីជំនាញបានរកឃើញមានវត្តមានសារធាតុគីមីហាមឃាត់ ប៉ូរ៉ាក់ (Borax) ផ្ទុកក្នុងផលិតផលគុយទាវសរសៃតូចចំនួន១៨.៥ គីឡូក្រាម និងផ្ទុកក្នុងបាញ់កាញ់ចំនួន០៧ គីឡូក្រាម សរុប២៥.៥ គីឡូក្រាម ។ បន្ទាប់មកមន្ត្រីកាំកុងត្រូលបានតម្រូវអោយម្ចាស់គុយទាវធ្វើកិច្ចសន្យាកែប្រែក្នុងការផលិតឡើងវិញ លែងអោយដាក់សារធាតុគីមីទៀត និងបានធ្វើកំណត់ហេតុដកហូតគុយទាវ និងបាញ់កាញ់ យកទៅកម្ទេចចោលភ្លាមៗតែម្តង ។
ក្រៅពីការវិភាគលើមុខទំនិញទាំងនោះមន្ត្រីជំនាញក៏បានធ្វើការត្រួតពិនិត្យ កាលបរិច្ឆេទនៃទំនិញ (ដឺឡេ ) និងស្លាកសញ្ញាលើសំបកវេចខ្ចប់ទំនិញនៅតាមតូប និងតាមហាងជុំវិញផ្សារស្វាយអន្ទរ និងជាលទ្ធផលបានរកឃើញស្រាបៀផុតកំណត់ថ្ងៃប្រើប្រាស់ចំនួន៦០កំប៉ុង ស្មើនឹង២០គីឡូក្រាមផងដែរ ។ ទន្ទឹមនឹងនោះមន្ត្រីកាំកុងត្រូលក៏បានធ្វើការអប់រំណែនាំអំពីអនាម័យ និងការរៀបចំដាក់តាំងលក់តាមប្រភេទផលិតផលដល់អាជីវក អោយពូកគាត់បានយល់ដឹងពីសុវត្ថិភាពម្ហូបអាហារបន្ថែមទៀត ដោយបានចែក និងបិទផ្ទាំងរូបភាពផ្សព្វផ្សាយ« Poster» ផងដែរ ។
មន្ត្រីជំនាញកាំកុងត្រូលក៏បានសំណូមពរផងដែរដល់អាជីវករ ដែលប្រកបមុខរបរផលិតគុយទាវលក់ ដែលមានលក្ខណៈជាគ្រួសារ សូមមេត្តាបញ្ឈប់ការដាក់សារធាតុគីមីហាមឃាត់បូរ៉ាក់ ក្នុងគុយទាវ ដែលធ្វើប៉ះពាល់ដល់សុខភាពអ្នកបរិភោគ ចៀសវាងថ្ងៃក្រោយប្រឈមនឹងផ្លូវច្បាប់ ៕
ចែករំលែកព័តមាននេះ