សម ថារ័ត្ន នៅតែចង់ព្យាបាលឳពុកឱ្យអស់លទ្ធភាព
- ភ្នំពេញ
រាជធានីភ្នំពេញ ៖ មកទល់ពេលនេះស្ដេចវីយូឡុង លោក អ៊ុ ដារ៉ា ឪពុករបស់កីឡាការិនីល្បុក្កតោ កញ្ញា សម ថារ័ត្ន…
រាជធានីភ្នំពេញ ៖ មកទល់ពេលនេះស្ដេចវីយូឡុង លោក អ៊ុ ដារ៉ា ឪពុករបស់កីឡាការិនីល្បុក្កតោ កញ្ញា សម ថារ័ត្ន នៅតែមិនទាន់មានលទ្ធភាពព្យាបាលឱ្យបានធូរស្រាលនៅឡើយទេ ដោយលោកនៅតែស្ថិតក្នុងភាពពិការ និងមានសុខភាពមិនទាន់រឹងមាំ ព្រោះតែការព្យាបាលបានត្រឹមគ្រូខ្មែរ ស្របគ្នាដែលខាងគ្រូពេទ្យក៏មិនហ៊ានទទួលវះកាត់ ។ យ៉ាងណាមិញ កីឡាការិនី សម ថារ័ត្ន នៅតែមានបំណងយកឪពុកទៅព្យាបាលនៅក្នុងមន្ទីរពេទ្យទំនើបឱ្យអស់លទ្ធភាព ដោយនាងប្រកាសថា នឹងប្រឹងរកលុយដើម្បីសម្រេចបំណងនេះផង។
កាលពីពេលកន្លងទៅ គេឃើញកីឡាការិនីល្បុក្កតោរូបនេះ តាមរយៈបណ្ដាញទំនាក់ទំនងសង្គមបង្ហោះម្ដងជាពីរដងយ៉ាងគួរឱ្យសង្វេគថា«អរគុណឪពុក ដែលបានសហការជាមួយកូនអំឡុងពេលកូននៅមើលថែ ពេលដែលពុកស្ថិតក្នុងដង្ហើមផិតផើយ ប្រឹងរស់បន្តជីវិតដើម្បីជាជនគំរូសម្រាប់សង្គមគ្រួសារ និងប្រទេសជាតិ និងឱ្យកូនៗបានមើល និងរៀនសូត្រតាម ទោះបីពុកមិនបានសម្ដីវោហារស្ដីប្រដៅដូចពុកគេដទៃ តែទង្វើដែលពុកបានបង្ហាញ គឺមានន័យណាស់ទៅហើយ ។
ស្ថានភាពគ្រួសារយើងពីមុនវេទនា តែឥឡូវនេះពួកយើងបានអង្គុយគ្រាន់ សង្ឃឹមថាថ្ងៃខាងមុខ ពួកយើងនឹងបានឈរយ៉ាងស្រស់ស្រាយក្ដីសុខបំផុត ។ ខ្ញុំរមែងត្រឡប់ទៅមើលរូបថត និងអនុស្សាវរីយ៍របស់ឪពុកដែលធ្លាប់បានសាង ឈរស្រក់ទឹកភ្នែក សោកស្ដាយ នៅពេលដែលពុកប្រញាប់ធ្លាក់ខ្លួនឈឺ ទាំងមិនទាន់បានបង្រៀនឱ្យកូនៗចេះបទភ្លេង និងនិពន្ធអីផង ។ មិនដែលឮពុកអួតប្រាប់កូនមួយម៉ាត់ថា ឪពីមុនល្បីប៉ុណ្ណាដែរណា! អួតមួយម៉ាត់ពីរអីអត់អាលីង»។
នាងបន្តថា «លោកឪលោកម៉ែ កូនសុំទោស ដែលមិនបានដើរតាមផ្លូវឪ ឪបានចំណូលមិនឈឺសាច់ដូចកូនមែន តែឪចុករោយចង្កេះ ឈឺក្បាល ស្ត្រេស ព្រោះឪប្រើខួរក្បាលគិតច្រើន»។ ការលើកឡើងរបស់នាងធ្វើឱ្យម្នាក់ៗចង់ស្រក់ទឹកភ្នែក ដោយសារតែលោក អ៊ុ ដារ៉ា ត្រូវគេស្គាល់ថា ជាស្ដេចវីយូឡុងល្បីឈ្មោះមួយរូបប៉ុន្តែក្រោយធ្លាក់ខ្លួនឈឺ បែរជាគ្មានការជ្រោមជ្រែងណាមួយដែលមិនសមនឹងកេរ្តិ៍ឈ្មោះដែលធ្លាប់សាង ។ នាងធ្លាប់បង្ហោះយ៉ាងកម្សត់នាពេលបន្តបន្ទាប់ទៀតថា មកទល់ពេលនេះ ឪពុករបស់នាងនៅតែមានស្ថានភាពល្អប្រសើរមិនច្រើនជាងមុននោះឡើយ ដោយសារតែការព្យាបាលមិនបានដិតដល់ និងខ្វះលទ្ធភាពព្យាបាលដោយបច្ចេកវិទ្យាពេទ្យទំនើប គឺទទួលបានលទ្ធផលមិនច្រើន ។
កញ្ញាថា លោក អ៊ុ ដារ៉ា ក្រៅពីពិការដើរមិនរួច ក៏មានបញ្ហាវង្វេងវង្វាន់ដោយពេលនៅពេលធ្វើទុក្ខផងដែរ តែលោកនៅតែទទួលទានអាហារបាន ជាពិសេសនៅពេលនាងចំណាយពេលបញ្ចុកមើលថែ មុនពេលនាងចេញទៅប្រកួតនៅក្រៅប្រទេស ។ អ្វីដែលនាងកាន់តែសប្បាយចិត្តទៅទៀតគឺលោកមានកម្លាំងចិត្តចង់ជា ចង់ទទួលការព្យាបាល ដោយមិនសូវមានអារម្មណ៍អស់សង្ឃឹមដូចមុន ដែលធ្វើឱ្យនាងគិតថា បើមានលទ្ធភាពយកលោកទៅព្យាបាលនៅក្នុងមន្ទីរពេទ្យទំនើប គឺឪពុកពិតជាកាន់តែល្អប្រសើរផ្នែកសុខភាព ។
យ៉ាងណាមិញ នាងថា ឪពុករបស់នាងដែលមានបញ្ហាឆ្អឹងរហូតដល់ថ្នាក់ពិការមិនអាចដើរបាន គឺខាងវេជ្ជបណ្ឌិតក៏មិនហ៊ានទទួលវះកាត់នោះដែរ ដោយសារតែអះអាងថា លោកមានវ័យចាស់ ហើយឆ្អឹងក៏ពិបាកក្នុងការតភ្ជាប់ ។ ប៉ុន្តែនាងថា បើនាងមានលុយ ឬមានសប្បុរសជនណាចេញមុខជួយដល់ឪពុករបស់នាង ហើយអាចឱ្យនាងមានឱកាសយកឪពុកទៅព្យាបាលដិតដល់ គឺនាងយល់ថាឪពុកនឹងអាចរឹងមាំ ឬអាចដើរបាន។
នាងថា ដ្បិតឪពុកស្ថិតក្នុងសភាពបែបហ្នឹង ហើយមានការបញ្ជាក់ថា ស្ថានភាពវះកាត់នឹងពិបាកធ្វើឡើងយ៉ាងហ្នឹង តែនាងនៅតែមិនអស់ចិត្ត អ៊ីចឹងហើយទើបនាងនៅតែបន្តទទួលការងារសម្ដែង និងការងារចេញប្រកួតទាំងក្នុង និងក្រៅប្រទេសជាហូរហែ រាប់ទាំងប៉ុន្មានថ្ងៃមុននេះផង ដើម្បីអាចមានកម្រៃបានច្រើនយកមកផ្ទប់ថ្លៃព្យាបាលឪពុក និងក្រែងមានការជ្រោមជ្រែងណាមួយ ក្នុងការជួយដល់ឪពុករបស់នាងឱ្យមានលទ្ធភាពព្យាបាលក្រៅពីពេទ្យខ្មែរដូចសព្វថ្ងៃ។
គួរបញ្ជាក់ថា បិតាវីយូឡុង អ៊ុ ដារ៉ា ធ្លាប់ល្បីឈ្មោះខ្លាំង នៅក្នុងអំឡុងទសវត្សឆ្នាំ៦០។
លោកបាននិពន្ធបទចម្រៀងជាច្រើន ដូចជាបទរូបអូនហ្នឹងហើយ, ថ្ងៃណាមានសង្ឃឹម, ឈប់ស្រឡាញ់អូនទៅ, នេះឬផលបុណ្យ, ស្រឡាញ់អូនដល់ណា និងចាស់ជូរឯម ជាដើម ដែលសុទ្ធតែល្បីមកដល់ជំនាន់ក្រោយ ។ មកដល់ពេលនេះ លោកមានវ័យ៧៩ឆ្នាំ ដោយមានជំងឺឆ្អឹងត្រគាកខាងឆ្វេងហើយដើរមិនរួចអស់រយៈពេលច្រើនឆ្នាំមកហើយ៕
ចែករំលែកព័តមាននេះ