ខេត្តមណ្ឌលគិរី ៖ បន្ទាប់ពីមានប្រតិកម្មពីមហាជន អាជ្ញាធរក្រុងសែនមនោរម្យ បានចុះហាមឃាត់គ្រឿងចក្រ របស់អ្នកមាន អំណាចក្នុងជួរកងវិស្វកកម្មម្នាក់ ដែលបានបញ្ជាឲ្យកូនចៅកាយយកអាចម៍ដីលុបអូរ និងបឹងធម្មជាតិពីរកន្លែង តាមបណ្តោយផ្លូវវាងក្រុង…
ខេត្តមណ្ឌលគិរី ៖ បន្ទាប់ពីមានប្រតិកម្មពីមហាជន អាជ្ញាធរក្រុងសែនមនោរម្យ បានចុះហាមឃាត់គ្រឿងចក្រ របស់អ្នកមាន អំណាចក្នុងជួរកងវិស្វកកម្មម្នាក់ ដែលបានបញ្ជាឲ្យកូនចៅកាយយកអាចម៍ដីលុបអូរ និងបឹងធម្មជាតិពីរកន្លែង តាមបណ្តោយផ្លូវវាងក្រុង ក្នុងភូមិចម្ការតែ សង្កាត់ស្ពានមានជ័យ ក្រុងសែនមនោរម្យ នាវេលាថ្ងៃទីត្រង់ ថ្ងៃទី០៦ តុលា ២០១៨។ លោក ឃន់ អូន អភិបាលរងក្រុងសែនមនោរម្យ ដែលបានដឹកនាំកម្លាំងចម្រុះនឹងគ្រប់មន្ត្រីជំនាញចុះទៅហាមឃាត់គ្រឿងចក្រខាងលើបានឲ្យដឹងថា៖
«ក្រុមការងារចម្រុះ បានចុះឃាត់គ្រឿងចក្រដែលកំពុងចាក់ដីលុបអូរ ស្ថិតនៅភូមិចម្ការតែ សង្កាត់រមនា ក្រុងសែនមនោរម្យ តាមការបំភ្លឺរបស់ ឈ្មោះ ផែង សូរិយា ម្ចាស់គ្រឿងចក្របានឲ្យដឹងថា អ្នកដែលជួលឲ្យចាក់ដីនេះគឺឈ្មោះ កែវ សារ៉ាន់»។ លោកអភិបាលរងក្រុងបានបន្តថា «លោកបានដាក់បទបញ្ជាបញ្ឈប់គ្រឿងចក្រជាបន្ទាន់ និងបានអប់រំណែនាំ អញ្ជើញម្ចាស់គ្រឿងចក្រទៅសាលាក្រុងធ្វើកំណត់ហេតុបញ្ជូនទៅថ្នាក់ដឹកនាំខេត្តនារសៀលថ្ងៃដដែល»។ លោក ឃន់ អូន បានបញ្ជាក់ថា «បើនិយាយពីរឿងច្បាប់ភូមិបាល រាល់ដីចំណីអូរ បឹង ធម្មជាតិ ត្រូវមានចម្ងាយយ៉ាងតិចក៏ចាប់ពី២០ម៉ែត្រ ទៅ៥០ម៉ែត្រ ឯណោះ…ដូច្នេះសកម្មភាពខាងលើគឺផ្ទុយនឹងច្បាប់ហើយ…»។
ទោះជាយ៉ាងណាករណីខាងលើ អាជ្ញាធរបានត្រឹមហៅម្ចាស់គ្រឿងចក្រ ទៅធ្វើកិច្ចសន្យាឲ្យបញ្ឈប់សកម្មភាពដឹកដីលុបអូរ និងបឹង បើមិនព្រមថ្ងៃក្រោយនឹងចាត់វិធានការតាមច្បាប់។ គិតត្រឹមវេលាម៉ោង១ និង៣០នាទីរសៀល កោះសន្តិភាព មិនអាចសុំការបំភ្លឺពី លោក កែវ សារ៉ាន់ បានទេ។ មជ្ឈដ្ឋាននានាបានលើកឡើងពីសកម្មភាពក្រុមអ្នកមានអំណាច មានលុយ នៅខេត្តមណ្ឌលគិរី តែងប្រើប្រាស់អំណាចរបស់ខ្លួន វាតទីយកដីរដ្ឋជាកម្មសិទ្ឋផ្ទាល់ខ្លួន។
ដែលករណីខ្លះមានប្រតិកម្មពីប្រជាពលរដ្ឋ ក៏គេបញ្ឈប់កណ្តាលទី តែករណីខ្លះគ្មានការតវ៉ាពីអ្នកស្រុកក៏ចេះតែសម្ងំ រំលោភបំពានស្រេច់នឹងចិត្ត។ ម្យ៉ាងវិញទៀតនោះទោះជាអាជ្ញាធរចុះធ្វើការហាមឃាត់ និងទប់ស្កាត់បែបណា ក៏គេមិនដែលឃើញ មន្ត្រីជំនាញអនុវត្តន៍ផ្លូវច្បាប់ឲ្យមានប្រសិទ្ធិភាពលើបុគ្គលបំពានច្បាប់ទាំងនោះដែរ បានត្រឹមឲ្យគេដកថយគ្រឿងចក្រពីតំបន់ដីដែលរងគ្រោះប៉ុណ្ណោះ៕
https://www.youtube.com/watch?v=7l-OEHttCHQ
ចែករំលែកព័តមាននេះ