ខេត្តសៀមរាប ៖ លួចទៅលេងដល់ក្នុងព្រៃហើយ នៅតែរកឃើញទៀតសូមសរសើរប៉ូលិសស្រុកពួក មែន ដែលបានប្រមាញ់បំបែកសម្បុកបទល្មើសល្បែងស៊ីសងជល់មាន់ លួចលាក់ក្នុងព្រៃ ស្រាប់តែក្រឡេក ឃើញសមត្ថកិច្ចនាំគ្នារត់បាតជើងសព្រាត នៅសល់តែអ្នកមើលរត់មិនរួចចំនួន២នាក់ និង វត្ថុតាងមួយចំនួនធំ ត្រូវបានយកមកអធិការនគរបាលស្រុកពួក ធ្វើការអប់រំឱ្យត្រឡប់ទៅផ្ទះវិញ។ ហេតុការណ៍ឃាត់ល្បែងស៊ីសង ជល់មាន់នោះបានធ្វើឡើងនៅវេលាម៉ោង១៥ និង១៥នាទីរសៀល ថ្ងៃទី០៤ ខែវិច្ឆិកា ឆ្នាំ២០១៨ ស្ថិតនៅចំណុចដីគោក១កន្លែង ក្នុងភូមិស្វាហួល ឃុំមុខប៉ែន ស្រុកពួក ខេត្តសៀមរាប។
លោកវរសេនីយ៍ឯក ទេព ពុំសែន អធិការនគរបាលស្រុកពួក បន្ទាប់ពីមានសេចក្តីរាយការណ៍មកអធិការនគរបាលស្រុកពួកភ្លាម ទើបលោកឱ្យកម្លាំងអធិការស្រុក ចុះបង្ក្រាបករណីបទល្មើសជល់មាន់ លួចលាក់នៅតាមព្រៃ ស្រាប់តែឃើញសមត្ថកិច្ចយើងទៅដល់ នាំគ្នារត់បាត់អស់ នៅសល់អ្នកឈរមើលចំនួន២នាក់ និងវត្ថុតាងមួយចំនួនធំ។ លោកបានបញ្ជាក់ថា មនុស្ស២នាក់ ជាអ្នកឈរមើល ដែលសមត្ថកិច្ចឃាត់ខ្លួនបាននោះមាន៖ ១-ឈ្មោះ ហ៊ាន ឃឿត ភេទប្រុស អាយុ៤៦ឆ្នាំ រស់នៅភូមិជ្រាស់ ឃុំល្វា ស្រុកពួក មុខរបរធ្វើស្រែ ២-ឈ្មោះ ខឿន វុធ ភេទប្រុស អាយុ៣៣ឆ្នាំ នៅភូមិខ្ជាយ ឃុំសសរស្តម្ភ ស្រុកពួក។
លោកបានបន្តទៀតថា ក្រោយពេលឃាត់ខ្លួន បានអ្នកលេង២នាក់ កម្លាំងយើងបានធ្វើការដកហូតវត្ថុតាង រួមមាន៖ សង្វៀនជល់មាន់២ , ខ្ទះស្អំមាន់១ , ជញ្ចីងថ្លឹង១, នាឡិកា១, ធុងទឹកកក២, តង់កៅស៊ូ១, ឡាម១ប្រអប់ អំបោះ២ដុំ សត្វមាន់ឈ្មោល២ក្បាល , ដីខ្សាច់ទ្រចានអាប៉ោង១ -ម៉ូតូចំនួន៥គ្រឿង (១គីឡូទុកនៅវាលស្រែ និង៤គីឡូផ្ញើទុកក្រោមផ្ទះប្រជាពលរដ្ឋ) ចំពោះសង្វៀនយើងបានដុតកម្ទេចចោលនៅនឹងកន្លែង។ ចំណែកម៉ូតូ៥គ្រឿងកំពុង ស្រាវជ្រាវរកម្ចាស់បន្ត។ បច្ចុប្បន្នអ្នកឈរមើលជល់មាន់ចំនួន២នាក់ ត្រូវបានកម្លាំងជំនាញនៃអធិការនគរបាលស្រុកពួក បានសុំគោលការណ៍ថ្នាក់ ដើម្បីឱ្យអ្នកទាំង២នាក់ ធ្វើកិច្ចសន្យាអប់រំត្រឡប់ទៅផ្ទះវិញ។ រីឯវត្ថុតាង ម៉ូតូដែលនៅសល់ កម្លាំងជំនាញកំពុងផ្សព្វផ្សាយស្វែង រកម្ចាស់មកទទួលយកវិញ៕
ចែករំលែកព័តមាននេះ