ខេត្តរតនគិរី ៖ រថយន្តដឹកសំរាម អនាម័យក្រុងបានលុងរបស់ក្រុមហ៊ុន គឹម ជ្រា ចំនួន៥គ្រឿង ត្រូវបានតំណាងកម្មករ និងកម្មករនាំគ្នាយកមកបញ្ឈរតម្រៀបគ្នានៅមុខសាលាដំបូងដើម្បីសុំ អន្តរាគមន៍…
ខេត្តរតនគិរី ៖ រថយន្តដឹកសំរាម អនាម័យក្រុងបានលុងរបស់ក្រុមហ៊ុន គឹម ជ្រា ចំនួន៥គ្រឿង ត្រូវបានតំណាងកម្មករ និងកម្មករនាំគ្នាយកមកបញ្ឈរតម្រៀបគ្នានៅមុខសាលាដំបូងដើម្បីសុំ អន្តរាគមន៍ បន្ទាប់ពីមានគេយកបង្គោលទៅបោះចំកណ្ដាលផ្លូវមិនឲ្យរថយន្តដឹកសំរាម យកទៅចាក់នៅទីតាំងស្ថិតនៅភូមិ៣ សង្កាត់កាចាញ ដែលក្រុមហ៊ុនធ្លាប់ចាក់ជាច្រើនឆ្នាំមក ហើយនោះ។ នៅរសៀលថ្ងៃទី២ ខែវិច្ឆិកា ឆ្នាំ២០១៨ រថយន្តដឹកសំរាមពេញចំនួន៥គ្រឿង របស់ក្រុមហ៊ុន គឹម ជ្រា ត្រូវបានកម្មករយកមកបញ្ឈរតម្រៀបគ្នានៅមុខសាលាដំបូងខេត្ត បន្ទាប់ពីរថយន្តទាំងនោះផ្ទុកសំរាមពេញរថយន្តរយៈពេល៤ថ្ងៃកន្លងមកហើយ មិនបានយកសំរាមទៅចាក់ចោលនៅទីតាំងដែលខ្លួនធ្លាប់បានយកសំរាមនោះទេ ដោយសារមានគេយកបង្គោលទៅបោះចំកណ្ដាលផ្លូវមិនឲ្យឡានសំរាមចូលទៅចាក់។
យោងតាមការឲ្យដឹងពីកម្មករឈ្មោះ ភារម្យ ដែលបានយកឡានដឹកសំរាមពេញទៅតម្រៀប នៅមុខតុលាការខេត្តនោះថា ហេតុតែពួកគាត់យកឡានដឹកសំរាមមកបញ្ឈរនៅមុខតុលាការនេះ ដោយរថយន្តនេះដាក់សំរាមពេញ មិនមានកន្លែងចាក់ចំនួន៤ថ្ងៃមកហើយៗ ពួកគាត់យករថយន្តមកតម្រៀបនៅមុខតុលាការនេះ គោលបំណងសុំឲ្យតុលាការជួយដោះស្រាយជាបន្ទាន់ នូវករណីគេយកបង្គោលទៅបោះចំកណ្ដាលផ្លូវមិនឲ្យឡានសំរាមចូលចាក់។ ចំណែកលោក កែវ ពិសុដ្ឋ អ្នកនាំពាក្យសាលាដំបូងខេត្ត បានឲ្យដឹងនៅព្រឹកថ្ងៃទី២ ខែវិច្ឆិកា ថា សាលាដំបូងខេត្តមិនទាន់មានចំណាត់ការណាមួយនៅឡើយទេ នៅពេលនេះ ដោយតុលាការមិនទាន់ទទួលបានពាក្យបណ្ដឹង ឬពាក្យសុំអន្តរាគមន៍ណាមួយ ពីតំណាងកម្មករក្រុមហ៊ុនអនាម័យនៅឡើយ។
ចំណែកស្ត្រីម្នាក់ឈ្មោះ ខុន ម៉ាលីកង អាយុ៣៧ឆ្នាំ ជនជាតិខ្មែរតំណាងកម្មករ អនាម័យក្រុងបានលុង បានឲ្យដឹងថា ពួកគាត់មកនេះដើម្បីយកពាក្យបណ្តឹងមកដាក់ជូនតុលាការ សុំការអន្តរាគមន៍ជាបន្ទាន់ ដើម្បីបញ្ចៀសការកកស្ទះសំរាមស្អុយពេញផ្សារក្រុងបានលុង ដោយមានជនមិនស្គាល់មុខ យកបង្គោលទៅបោះចំកណ្ដាលផ្លូវ មិនឲ្យពួកគាត់យកសំរាមទៅចាក់លើទីតាំងចាក់សំរាម ក៏ប៉ុន្តែតុលាការមិនទាន់ដោះស្រាយជូនពួកគាត់ទេនៅពេលនេះ។ ជុំវិញករណីមានជនមិនស្គាល់ មុខបោះបង្គោលចំកណ្ដាលផ្លូវសាធារណៈ មិនឲ្យរថយន្តដឹកសំរាមរបស់ក្រុមហ៊ុនអនាម័យចូល ចាក់សំរាមខាងលើនេះ លោក ងិន ណែល អភិបាលក្រុងបានលុង លោកថា ការយករថយន្តដឹក សំរាមទៅដាក់មុខតុលាការនោះ លោកមិនបានដឹងពីគោលបំណងរបស់គេទេ ក៏ប៉ុន្តែក្រុមហ៊ុន គឹម ជ្រា អនាម័យក្រុងបានលុងនេះ ត្រូវបានរដ្ឋបាលសាលាខេត្តរតនគិរី ចេញដីកាសម្រេចដកហូតសិទ្ធិកាលពីថ្ងៃទី១ ខែតុលា ឆ្នាំ២០១៨ បញ្ចប់ទាំងស្រុងនូវកិច្ចសន្យា ស្ដីពីការដាក់ទុនវិនិយោគ និងធ្វើអាជីវកម្មប្រមូលសំអាតអនាម័យ និងដឹកជញ្ជូនសំរាម ក្នុងក្រុងបានលុង ខេត្តរតនគិរី ដែលមានរយៈពេល២១ឆ្នាំ ចាប់ពីថ្ងៃទី១ ខែមករា ឆ្នាំ២០១០ រហូតដល់ថ្ងៃទី៣១ ខែធ្នូ ឆ្នាំ២០៣០ ពីលោក ជា គួង ហើយ។
លោកអភិបាលក្រុងបានលុង ក៏បានបញ្ជាក់ទៀតថា រដ្ឋបាលក្រុងបានលុង ក៏បានចេញលិខិតជូនដំណឹងថ្ងៃទី១៦ ខែតុលា ឆ្នាំ២០១៨ ដល់សាធារណៈជនក្នុងក្រុងបានលុងផងដែរ។ ឲ្យបញ្ឈប់ការបង់សេវា ប្រាក់អនាម័យក្នុងក្រុងបានលុងជូនក្រុមហ៊ុនរបស់លោក ជា គួង។ ចំណែកលោក ជា គួង ប្រធានក្រុមហ៊ុន គឹម ជ្រា ថាអាជ្ញាធរខេត្តដកហូតសិទ្ធវិនិយោគរបស់លោក គឺខុសអនុក្រិតទាំងស្រុង ពីព្រោះការដកហូតនេះ អាជ្ញាធរខេត្តមិនបានទៅប្រជុំក្រុមប្រឹក្សា។ បើតាមផ្លូវច្បាប់ គឺក្រុមប្រឹក្សាជាអ្នកចុះហត្ថលេខា មិនមែនខេត្តអ្នកចុះហត្ថលេខានោះទេ។ ម្យ៉ាងវិញទៀតមុននឹងឈានដល់ការដកហូតចេញជាលាយលក្ខណ៍អក្សរ ក្នុងកិច្ចសន្យាអភិបាលខេត្តត្រូវមានការព្រមានមកលើកំហុសរបស់ក្រុមហ៊ុនចំនួនបីដងទើបអាចដកហូតបាន។
ហើយក្រសួងបានបញ្ជាក់យ៉ាងច្បាស់ថា ក្រុមហ៊ុនកំពុងស្ថិតក្នុងដំណើរការរបស់ តុលាការមិនទាន់សម្រេច អាជ្ញាធរខេត្តមិនមានសិទ្ធិណាមួយក្នុងការសម្រេចដកហូតសិទ្ធិ វិនិយោគឡើយ។ លោកបានបន្ថែមទៀតថា គោលបំណងដែលក្រុមកម្មករយកឡានដឹកសំរាម ពេញទៅតម្រៀបនៅមុខតុលាការ គឺគ្រាន់តែចង់សុំឲ្យតុលាការ សម្រួលក្នុងការដកបង្គោល ដែលបោះចំកណ្ដាលផ្លូវសាធារណៈ មិនឲ្យឡានដឹកសំរាមរបស់លោក ដឹកសំរាមទៅចាក់នៅទីលានចាក់សំរាម តាំងពីថ្ងៃទី៣០ ខែតុលា មកម្លេះ បើគិតទៅរយៈពេល៤ថ្ងៃមកហើយ។ បច្ចុប្បន្នទីលានចាក់សំរាមត្រូវបានប្រជាពលរដ្ឋបិទ ព្រោះមូលហេតុក្រុមហ៊ុនចំនួន២ពូកែឈ្លោះគ្នាចាក់សំរាមគ្មានសណ្តាប់ធ្នាប់៕
ចែករំលែកព័តមាននេះ