ខេត្តស្វាយរៀង ៖ សមត្ថកិច្ចច្រករបៀងក្រសាំងជ្រំ រងការចោទប្រកាន់ថា បានបើកដៃឲ្យឈ្មួញនាំស៊ុតមាន់ ស៊ុតទា ស៊ុតក្រួច និងកូនទាចូលពីប្រទេសវៀតណាម មករដ្ឋបាលស្រុកស្វាយជ្រំ ដើម្បីចែកចាយ និងលក់បន្តដោយគ្មានការត្រួតពិនិត្យពីមន្ត្រីបសុពេទ្យ។ ករណីនេះបានកើតឡើងកាលពីព្រឹកថ្ងៃទី២ វិច្ឆិកា ២០១៨ នៅច្រករបៀងក្រសាំងជ្រំ ស្ថិតនៅភូមិក្រសាំងជ្រំស្រុកស្វាយជ្រំ។ បើតាមប្រជាពលរដ្ឋ ដែលរស់នៅក្នុងភូមិកើតហេតុខាងលើ បានឲ្យដឹងថាឈ្មួញបាននាំពងមាន់ពងទាពងក្រួច និងកូនទាមកពីប្រទេសវៀតណាមចូលតាមច្រករបៀងក្រសាំងជ្រំនេះក្នុង១ថ្ងៃៗរាប់សិបម៉ូតូមិនដែលឃើញមន្ត្រីពេទ្យសត្វមកត្រួតពិនិត្យទេ។
ប្រជាពលរដ្ឋបានលើកឡើងទៀតថា ពួកគាត់មានការព្រួយបារម្ភពី សុវត្ថិភាពម្ហូបអាហារជាពិសេសការបរិភោគពងមាន់ពងទា និងពងក្រួចដែលខ្វះការត្រួតពិនិត្យ ពីមន្ត្រីជំនាញនេះ។ ដោយសព្វថ្ងៃពងមាន់ពងទាពងក្រួចនេះ អ្នកលក់បាយក្នុងសាលាឲ្យកូនសិស្សគឺ បាយពងទាចៀនពងទាខនេះគឺពេញនិយមណាស់ ហើយអ្នកលក់ពងក្រួចក្នុងសាលាក្មេងៗ ក៏ចូលចិត្តទិញញ៉ាំដែរទើបមានការព្រួយបារម្ភបើគ្មានការត្រួតពិនិត្យបែបនេះ។ បើតាមលោក ប៉ែន ចន្ធី ប្រធានការិយាល័យសុខភាពសត្វ និងផលិតកម្មសត្វ នៃមន្ទីរកសិកម្មរុក្ខាប្រមាញ់ និងនេសាទខេត្ត បានមានប្រសាសន៍ថា នៅច្រករបៀងនានាក្នុងស្រុកស្វាយជ្រំ រួមមានច្រករបៀងក្រសាំងជ្រំ ច្រករបៀងតានូ ច្រករបៀងស្រែបារាំង ច្រករបៀងជាយឫស្សី គឺមានឈ្មួញនាំស៊ុតសត្វ ពងមាន់ទា ពងក្រួច និងកូនទាពីប្រទេសវៀតណាមមករដ្ឋបាលស្រុកស្វាយជ្រំពិតប្រាកដមែន ហើយស្រុកស្វាយជ្រំនេះ គ្រប់ច្រករបៀងគ្មានមន្ត្រីពេទ្យសត្វឈជឿងត្រួតពិនិត្យទេ។
លោក ប៉ែន ចន្ធី បន្តទៀតថា លោក និងមន្ត្រីបសុព្យាបាលបានចុះទៅពិនិត្យតាមច្រករបៀងនានាក្នុងស្រុកស្វាយជ្រំ ដោយសុំការសហការពីសមត្ថកិច្ចនគបាលវរៈការពារព្រំដែនប៉ុស្តិ៍ច្រករបៀងទាំងនោះហើយសុំឲ្យបញ្ឈប់ឈ្មួញកុំឲ្យនាំស៊ុតមាន់ ស៊ុតទា ស៊ុតក្រួច កូនទា និងផលិតផលដែលមានដើមកំណើតពីស៊ុតសត្វ មិនអនុញាតឲ្យនាំចូលជាដាច់ខាត នេះជាបទបញ្ជាត្រូវអនុវត្តតាមប្រកាសរបស់សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ។
ហើយបានជូនសេចក្តីប្រកាស និងសារាចរណ៍ដល់ លោកមេប៉ុស្ត៍ច្រករបៀងទាំងអស់ដើម្បីអនុវត្ត ក៏ប៉ុន្តែមិនបានអនុវត្តតាមហើយព្រមទាំងផ្គើននឹង ប្រកាសរបស់សម្តេចក្រឡាហោមទៀត។ ទាក់ទិនករណីខាងលើនេះដែរ មន្ត្រីនគបាលច្រករបៀងក្រសាំងជ្រំម្នាក់បានបង្ហើបឲ្យដឹងថា ពួកគាត់មិនអាចចាប់ ឬបញ្ឈប់មិនឲ្យប្រជាពលរដ្ឋនាំពងមាន់ពងទាពងក្រួច ឬកូនទាពីប្រទេសវៀតណាមបានទេ ដោយប្រជាពលរដ្ឋត្រូវការរកស៊ី និងផ្គត់ផ្គង់ជីវភាពសម្រាប់ប្រជាពលរដ្ឋរស់នៅតាមព្រំដែនប្រកបមុខរបរប្រចាំថ្ងៃ៕
ចែករំលែកព័តមាននេះ