ប្រទេសម៉ាឡេស៊ី ៖ នាយករដ្ឋមន្ត្រីម៉ាឡេស៊ី លោកមហាធៀរមហាម៉ាដ អាយុ៩៣ឆ្នាំ ដែលវិលមកកាន់អំណាចវិញកាលពីខែឧសភាជាមេដឹកនាំវ័យចំណាស់ជាងគេបំផុតនៃពិភពលោក។ នាថ្ងៃទី១ វិច្ឆិកា ក្នុងបទសម្ភាសន៍មួយជាមួយ AFP នាទីក្រុងពូត្រាហ្សាយ៉ា លោកអះអាងថា លោកចាស់ជ្រុលហើយ ពិបាកក្នុងការប្រឈមមុខនឹងភារកិច្ចធ្ងន់របស់លោក។
ក្នុងបទសម្ភាសន៍នោះលោកនិយាយកំប្លែងថា តាមពិតទៅខ្ញុំអាចស្លាប់ក្នុងម៉ោងនេះក៏ថា បាន។ ជាអតីតគ្រូពេទ្យម្នាក់លោកមហាធៀរ ចាប់ផ្ដើមហក់ចូលនយោបាយតាំងពីឆ្នាំ១៩៦៤មក ហើយដឹកនាំប្រទេសម៉ាឡេស៊ីលើកដំបូងក្នុងកណ្ដាប់ដៃដែករយៈពេល២២ឆ្នាំ មុនពេលវិលមកកាន់អំណាចគួរភ្ញាក់ផ្អើលវិញ នាខែឧសភាក្រោយជ័យជម្នះរបស់គណបក្សប្រឆាំងក្នុងការបោះឆ្នោតសភា ក្នុងប្រទេសមានប្រជាជន៣១លាននាក់នោះ។
លោកមានបញ្ហាសុខភាពច្រើនចាប់តាំងពីប៉ុន្មានឆ្នាំមកហើយ។ វាពុំមែនជាការងាយស្រួលទេ ចាប់តាំងពីកម្ចាត់អតីតនាយករដ្ឋមន្ត្រីលោកណាជីបរ៉ាហ្សាក់ អតីតមនុស្សជំនិតរបស់លោកដែលទទួលការចោទប្រកាន់ពីបទពុករលួយ និងមានរឿងអាស្រូវទាក់ទិននឹងមូលនិធិវិនិយោគរបស់ 1MDB មក។ លោកណាជីប ពេលនេះនៅមានសេរីភាពក្រោមការបង់ប្រាក់ធានា។ ចំណែកអតីតមេដឹកនាំច្រើនរូប ត្រូវចាប់ខ្លួនពីខែឧសភាមកពីបទពុករលួយ។
លោកមហាធៀរ ក៏ប្រឈមមុខដែរចំពោះបំណុលជាតិប្រមាណ២៥០ពាន់លានដុល្លារ ហើយក៏ប្រឈមមុខគ្រោះថ្នាក់ ដែលលោកលុបចោលកុងត្រាហេដ្ឋារចនាសម្ព័ន្ធធំ៣ដែលចុះហត្ថលេខាដោយលោកណាជីបជាមួយចិន មានទឹកប្រាក់សរុបដល់ទៅប្រមាណជា២២ពាន់លានដុល្លារ។លោកថាលោកពុំអាចទទួលយកកុងត្រាទាំងនេះបានឡើយ តែលោកអះអាងថា ទំនាក់ទំនងនានាជាមួយចិននៅតែល្អប្រសើរ។
លោកបន្តថានិយាយដោយត្រង់ទៅខ្ញុំហត់ខ្លាំងណាស់។លើកនេះខ្ញុំត្រូវបំពេញការងារច្រើនជាងកាលពីពេលខ្ញុំធ្វើនាយករដ្ឋមន្ត្រីដំបូង។មន្ត្រីច្រើនរូបនៃអតីតរដ្ឋាភិបាល ប្រមុខធនាគារកណ្ដាលរហូតដល់អគ្គរដ្ឋអាជ្ញា ត្រូវប្ដូរចេញ្។
លោកមហាធៀរក៏ប្រឈមមុខដែរចំពោះការសន្យារបស់លោក ពីការផ្ទេរតំណែងឲ្យដល់លោកអានវ៉ាអ៊ីប្រាហ៊ីម ដែលធ្លាប់ជាគូប្រឆាំងលោក កាលលោកជានាយករដ្ឋមន្ត្រីលើកទីមួយ៕
ចែករំលែកព័តមាននេះ