ទីក្រុងប៉េកាំង ៖ ប្រធានាធិបតីអាមេរិកលោក ដូណាល់ ត្រាំ (Donald Trump) បាននិយាយថា លោកគិតថានឹងមានកិច្ចព្រមព្រៀងដ៏ល្អមួយជាមួយនឹងប្រទេសចិនទាក់ទិននឹងការធ្វើពាណិជ្ជកម្ម ប៉ុន្តែលោកបានព្រមានថាលោកបានត្រៀមដាក់ពន្ធរាប់ប៊ីលានដុល្លាររួចហើយ ប្រសិនបើមិនអាចសម្រេចកិច្ចព្រមព្រៀងនេះបាន ។
លោកប្រធានាធិបតីរូបនេះបាននិយាយក្នុងបទសម្ភាសន៍មួយថា លោកចង់សម្រេចកិច្ចព្រមព្រៀងក្នុងពេលបច្ចុប្បន្ន ប៉ុន្តែប្រទេសចិនមិនទាន់ត្រៀមខ្លួនរួចនៅឡើយទេ លោកបានត្រៀមដាក់ពន្ធរាប់ប៊ីលានដុល្លារទៀត ។
សារព័ត៌មានមួយបានរាយការណ៍កាលពីថ្ងៃចន្ទមកថា សហរដ្ឋអាមេរិកកំពុងតែត្រៀមខ្លួនក្នុងការប្រកាសពីពន្ធលើផលិតផលនាំចូលពីប្រទេសចិនបន្ថែមដែលនៅសល់នៅដើមខែធ្នូខាងមុខនេះ ប្រសិនបើការចរចានៅខែក្រោយរវាងលោកប្រធានាធិបតីត្រាំ និងលោកស៊ី ជិនពីង (Xi Jinping) មិនអាចកាត់បន្ថយភាពតានតឹងនេះបាន ។
អ្នកនាំពាក្យរបស់ក្រសួងការបរទេសរបស់ប្រទេសចិន លោក Lu Kang បានឲ្យដឹងដែរថា ប្រទេសចិន និងសហរដ្ឋអាមេរិកបានរក្សាការទំនាក់ទំនងពីការផ្លាស់ប្តូរនៅគ្រប់ថ្នាក់ ហើយអាចនឹងមានកិច្ចប្រជុំរវាងអ្នកដឹកនាំទាំងពីរនៅប្រទេសអាហ្សង់ទីនថែមទៀត ។
លោកLu បានបន្ថែមថា ប្រសិនបើសហរដ្ឋអាមេរិកមិនព្រមលើកតម្កើងកិច្ចសហប្រតិបត្តិការបែបឈ្នះ=ឈ្នះជាមួយនឹងប្រទេសចិនទេនោះ ប្រទេសចិនជឿជាក់យ៉ាងច្បាស់ថានឹងអាចបន្តធ្វើកំណែទម្រង់ និងអភិវឌ្ឍន៍ខ្លួនឯងបាន ។
គួរបញ្ជាក់ដែរថា សហរដ្ឋអាមេរិកបានដាក់ពន្ធលើផលិតផលចិនប្រមាណ២៥០ប៊ីលានដុល្លារទៅហើយ ខណៈដែលប្រទេសចិនបានឆ្លើយតបវិញជាមួយនឹងការដាក់ពន្ធលើផលិតផលអាមេរិកអស់១១០ប៊ីលានដុល្លារវិញ ។
លោកត្រាំបានឲ្យដងដែរថា ៖« ខ្ញុំមាន២៦៧ប៊ីលានដុល្លារទៀត ប្រសិនបើពួកយើងមិនអាចសម្រេចកិច្ចព្រមព្រៀងមួយបាន »។
លោកប្រធានាធិបតីត្រាំបានគំរាមដាក់ពន្ធលើផលិតផលចិនដែលនៅសល់ ប្រសិនបើប្រទេសចិនមិនជួបនឹងតម្រូវការរបស់អាមេរិកក្នុងការកែទម្រង់គោលនយោបាយពាណិជ្ជកម្ម ការផ្ទេរបច្ចេកវិទ្យា និងការផ្តល់ឧបត្ថម្ភធនឧស្សាហកម្មជាដើម ៕
ចែករំលែកព័តមាននេះ