ខេត្តកំពង់ឆ្នាំ ៖ លោកឧត្តមសេនីយ៍ទោ ធន់ ធឿន មេបញ្ជាការតំបន់ប្រតិបត្តិការសឹករង និងជាគណៈ កម្មការគ្រប់គ្រងទូកង ទេពធីតាសែនជ័យបារមីមានរិទ្ធ របស់ក្រុងកំពង់ឆ្នាំងបានផ្តាំផ្ញើដល់ក្រុមកីឡាករទាំងអស់ «សូមយកចិត្តទុកដាក់ប្រឹងប្រែងហ្វឹកហាត់ឲ្យបានស្ទាត់ជំនាញ ក្នុងការចែវ និងឆក់យកល្បឿនឲ្យបានលឿនទើបទទួលបានជ័យជំនះ » ។
មានប្រសាសន៍បែបនេះ នៅក្នុងពិធីក្រុងពាលីទម្លាក់ទូកង ទេពធីតាសែនជ័យបារមីមានរិទ្ធ ចូលទន្លេ ដើម្បីហ្វឹកហាត់ ត្រៀមចូលរួមប្រកួតថ្នាក់ជាតិក្នុងពេលខាងមុខនេះ ។ ពីធីនេះបានធ្វើឡើងនៅព្រឹកថ្ងៃទី០១ ខែវិច្ឆិកា ឆ្នាំ២០១៨ នៅបរិវេណវត្តទេពធីតារាម ហៅវត្តយាយទេព ក្នុងសង្កាត់ផ្សារឆ្នាំង ក្រុងកំពង់ឆ្នាំង ។
លោកឧត្តមសេនីយ៍បានបន្តថា អនុវត្តតាមទិសដៅរបស់រាជរដ្ឋាភិបាលស្តីពីការចូលរួមព្រះរាជពិធីបុណ្យអុំទូក អកអំបុក និងសំពះព្រះខែក្នុងពេលខាងមុខនេះខេត្តកំពង់ឆ្នាំងបានត្រៀមខ្លួនរួចជាស្រេច ក្នុងការបញ្ជូនទូករបស់ខ្លួន ដើម្បីទៅចូលរួមប្រកួត ។
ដោយឡែកព្រឹកនេះទូកទេពធីតាសែនជ័យបារមីមានរិទ្ធបានទម្លាក់ខ្លួនចូលទន្លេ ដើម្បីហ្វឹកហាត់រយៈពេលជាងកន្លះខែ មុននឹងចេញទៅចូលរួមប្រកួត ។ ពិតណាស់ថា ការប្រកួត គឺមានការចង់ឈ្នះរៀងៗខ្លួនមិនចង់ចាញ់នោះទេ ប៉ុន្តែអ្វីដែលជាគុណសម្បត្តិរបស់ខ្មែរ គឺឈ្នះដោយសេចក្តីថ្លៃថ្នូ ដែលជាកត្តាយ៉ាងសំខាន់សម្រាប់ឲ្យពិភពលោកបានស្គាល់កាន់តែច្បាស់នៅប្រពៃណីទំនៀមទម្លាប់ ប្រវត្តិសាសន៍របស់ខ្មែរដែលយើងជាខ្មែរជំនាន់ក្រោយ នៅតែដើរតាមប្រពៃណីដ៏យ៉ាងផូរផង់នេះ ។ ដូចជាថ្ងៃធ្វើពិធីដែលយើងបានប្រារព្ធនៅពេលនេះ គឺយើងបានធ្វើតាមលំដាប់លំដោយនៃកម្មវិធីនីមួយៗ រហូតដល់ចប់ទើបយើងទម្លាក់ទូកចុះដែលពិធីនេះបានបញ្ជាក់ឲ្យកូនខ្មែរជំនាន់ក្រោយបានដឹងថា នេះជាការរក្សាប្រពៃណីទូកងដែលតំណាងឲ្យនាវាចរណ៍ក្នុងសង្គ្រាម និងតំណាងឲ្យកងទ័ពជើងទឹកកាលពីសម័យដើម។
នៅក្នុងឱកាសនោះដែរលោក យិន សាវ៉េន អភិបាលក្រុងកំពង់ឆ្នាំងក៏មានប្រសាសន៍ដែរថា សម្រាប់ទូកងឈ្មោះទេពធីតាសែនជ័យ បារមីមានរិទ្ធ របស់ក្រុងកំពង់ឆ្នាំងទើបតែបានចូលរួមប្រកួតថ្នាក់ជាតិរយៈពេល៣ឆ្នាំនេះទេ ដោយកាលពីឆ្នាំ២០១៦ ទទួលបានជោគជ័យលេខ១ទាំងល្បឿន និងសោភ័ណ្ឌភាព ឆ្នាំ២០១៧ ទទួលបានផែនលេខ២ ចំណែកឆ្នាំ២០១៨ ដែលនឹងទៅចូលរួមប្រកួតនេះសង្ឃឹមថា នឹងទទួលជោគជ័យជាថ្មីទៀតទាំងល្បឿន និងសោភ័ណ្ឌភាពជាពុំខាន ។
លោកអភិបាលក្រុងបានបញ្ជាក់ថា ការហ្វឹកហាត់មានរយៈពេល១៧ថ្ងៃ ដោយគិតចាប់ពីថ្ងៃទី១ ដល់ថ្ងៃទី១៧ ខែវិច្ឆិកានេះតទៅ ។ ជាមួយគ្នានេះលោកក៏បានថ្លៃអំណរគុណ លោកឧត្តមសេនីយ៍ទោ ធន់ ធឿន មេបញ្ជាការ តំបន់ប្រតិបត្តិការសឹករងកំពង់ឆ្នាំងបានឧបត្ថម មី១៥កេះ ទឹកក្រូច១៥កេះ ទឹកសុទ្ធ៥០យួរ អង្ករ២០០គីឡូក្រាម និងថវិកា១លានរៀល ដល់ទូកមួយនេះផងដែរ ។ តាមការបញ្ជាក់របស់លោកអភិបាលក្រុងកំពង់ឆ្នាំងថា ទូកទេពធីតាសែនជ័យមានប្រវែង៣៣ម៉ែត្រ មានចំណុះជើងចែវ៥៤នាក់ បូកទាំងអ្នករាំក្បាលទូក និងអ្នកបាចទឹកទូក២នាក់ទៀត សរុប៥៦នាក់ ៕
ចែករំលែកព័តមាននេះ