ខេត្តបន្ទាយមានជ័យ ៖ សេដ្ឋកិច្ចកម្ពុជាងើបឡើង៧% ឆ្នាំនេះ ហើយ៩ខែដើមឆ្នាំ២០១៨ ភ្ញៀវទេសចរបរទេសហូរចូលកម្ពុជាតាមច្រកអន្តរជាតិនានា និងតាមជើងអាកាសមានចំនួន៤លានកន្លះកើនឡើងជិត១០% ប៉ុន្តែកម្ពុជាក៏ទទួលពលករខុសច្បាប់បញ្ជូនពីថៃចំនួនជាង២ម៉ឺននាក់ដែរ ។ នេះបើយោងតាមប្រសាសន៍លោកនាយឧត្តសេនីយគៀត…
ខេត្តបន្ទាយមានជ័យ ៖ សេដ្ឋកិច្ចកម្ពុជាងើបឡើង៧% ឆ្នាំនេះ ហើយ៩ខែដើមឆ្នាំ២០១៨ ភ្ញៀវទេសចរបរទេសហូរចូលកម្ពុជាតាមច្រកអន្តរជាតិនានា និងតាមជើងអាកាសមានចំនួន៤លានកន្លះកើនឡើងជិត១០% ប៉ុន្តែកម្ពុជាក៏ទទួលពលករខុសច្បាប់បញ្ជូនពីថៃចំនួនជាង២ម៉ឺននាក់ដែរ ។
នេះបើយោងតាមប្រសាសន៍លោកនាយឧត្តសេនីយគៀត ច័ន្ទថារិទ្ធ អគ្គនាយកនៃអគ្គនាយកដ្ឋាននគរបាលអន្តោប្រវេសន៍ក្រសួងមហាផ្ទៃថ្លែងក្នុងពិធីជំនួបប្រជុំពង្រឹងកិច្ចសហប្រតិបត្តិការទ្វេភាគីជាមួយលោកឧត្តមសេនីយទោ ស៊ុរ៉ាឆេតហាក់ផាន អគ្គស្នងការរងស្តីទីនគរបាលអន្តោប្រវេសន៍ថៃនៅសណ្ឋាគារឥណ្ឌូចិន ក្នុងស្រុកអារញ្ញ ខេត្តស្រះកែវ ប្រទេសថៃ នារសៀលថ្ងៃទី៣១ តុលា ២០១៨ ក្រោយជួបចាប់ដៃគ្នាជាមិត្តភាពលើស្ពានព្រំដែននៃច្រកទ្វារអន្តរជាតិប៉ោយប៉ែតខ្លងលឹក ។
លោកនាយឧត្តសេនីយ៍ថ្លែងថា សភាពការក្នុងប្រទេសបច្ចុប្បន្នកាន់តែល្អប្រសើរឡើងបទល្មើសក៏ថយចុះជារៀងរាល់ឆ្នាំ ហើយថា ភ្ញៀវទេសចរបរទេសដែលទៅកម្សាន្ត និងស្នាក់នៅខេត្តសៀមរាបបានវាយតម្លៃថា កម្ពុជាជាកន្លែងមានសន្តិសុខ និងសុវត្ថិភាពល្អ ។ លោកបន្តថា សេដ្ឋកិច្ចកម្ពុជាឆ្នាំនេះកើនឡើង៧% ហើយ៩ខែដើម ឆ្នាំ២០១៨ កម្ពុជាទទួលបានភ្ញៀវទេសចរ ៤លានកន្លះ កើនឡើង១០% ក្នុងនោះភ្ញៀវចិននាំមុខគេ ៣៦% ភ្ញៀវវៀតណាមប្រហែល២០% ភ្ញៀវឡាវ១៤% ភ្ញៀវថៃចំនួន៧% នៃចំនួនភ្ញៀវសរុប ។
លោកបន្តថា សភាពការណ៍ដែលកត់សម្គាល់នៅកម្ពុជាកើនឡើងយ៉ាងគំហុក គឺអ្នកទេសចរពាណិជ្ជករ និងវិនិយោគ ។ ហើយថា ចិនបោះទុនវិនិយោគ និងនាំកម្មករជំនាញមានទាំងបុគ្គលិកចូលក៏ច្រើនដែរ ។ ទន្ទឹមនឹងកំណើនភ្ញៀវទេសចរបរទេសកើនឡើងនេះ លោកនាយឧត្តមសេនីយថ្លែងថា កម្ពុជាក៏កាន់តែពង្រឹងការងារផ្នែកសន្តិសុខ និងសណ្តាប់ធ្នាប់ឲ្យកាន់តែប្រសើឡើងថែមទៀត ព្រោះភ្ញៀវបរទេសខ្លះចូលមកប្រព្រឹត្តបទល្មើសថ្នាំញៀន ខ្លះលួចបើកហ្គេមអនឡាញ និងខ្លះប្រព្រឹត្តខុសច្បាប់ប៉ុន្តែចាប់បានជិត១០០នាក់ និងថ្នាំញៀនជាច្រើនផងដែរ ។ លោកបន្តថា ៩ខែដើមឆ្នាំ២០១៨ បង្ក្រាបនគរបាលអន្តោប្រវេសបង្ក្រាប៣៣៣ លើក ឃាត់ខ្លួនជាង៧០០នាក់ ។ ជាមួយគ្នានេះ លោកនាយឧត្តមសេនីយក៏ថ្លែងឲ្យដឹងផងដែរថា ៩ខែដើមឆ្នាំ២០១៨ កម្ពុជាទទួលពលករខុសច្បាប់ពីភាគីថៃចំនួន១៧៥លើក ស្មើនឹង២០៩០០នាក់ (ពីរម៉ឺនប្រាំបួនរយនាក់) ផងដែរ ។
គួរបញ្ជាក់ថា ក្នុងជំនួបទ្វេភាគីនៃនាយនគរបាលអន្តោប្រវេសន៍កម្ពុជា-ថៃខាងលើ ភាគីទាំង២បន្តពង្រឹងកិច្ចសហប្រតិបត្តិការឲ្យកាន់តែប្រសើឡើង ហើយថ្លែងអំណរគុណគ្នាទៅវិញទៅមកពីការងារកន្លងមក ដែលភាគីកម្ពុជាជួយចាប់ជនសង្ស័យថៃរត់មកពួននៅស្រុកខ្មែរ និងជួយបញ្ជូនជនជាតិថៃ៣នាក់ ស្នាក់នៅខុសច្បាប់ទៅថៃវិញ ។ ខាងកម្ពុជាក៏អរគុណភាគីថៃដែលបានសហការចាប់ជនសង្ស័យជាខ្មែរដែលរត់ទៅពួននៅប្រទេសថៃបញ្ជូនឲ្យកម្ពុជាវិញដែរ ។ សូមបញ្ជាក់ផងដែរថា អ្វីដែលភាគីថៃស្នើរឲ្យកម្ពុជាជួយ២៧ករណី កម្ពុជាបានជួយរួចហើយ ១៨ករណីនៅ៩ករណីកំពុងបន្តជួយទៀត ។ ភាគីថៃបានជួយកម្ពុជា២ករណីដែរកន្លងមកនេះ ៕
ចែករំលែកព័តមាននេះ