រាជធានីភ្នំពេញ ៖ បើនិយាយពីកេរ្ដិ៍ឈ្មោះនិងភាពល្បីល្បាញវិញនោះ លោក ផុន ផាន់ ណាអតីតអ្នកប្រដាល់ជើងខ្លាំងប្រចាំក្លិបអង្គរក្សខេត្តកោះកុង ប្រហែលជាមិនចាញ់អ្នកប្រដាល់ល្បីឈ្មោះមួយចំនួនទៀតដូចជា កែវ រំចង់ វង្ស ណយ ផាន់ គ្រាន់ យ៉េន ឌីណា និងរឿង សោ ភ័ណ្ឌ នោះទេ ។ ប៉ុន្តែមួយរយៈមកនេះគេមិនសូវឃើញកីឡាកររូបនេះឡើងសង្វៀនប្រកួតញឹកញាប់ដូចមុនទៀតនោះទេ បែរជាឃើញគេរកស៊ីលក់បបរតាមរទេះ និងរត់កង់៣ឥណ្ឌាទៅវិញ។
ដោយសារចង់ឱ្យប្រិយមិត្តអ្នកអានបានជ្រាបច្បាស់អំពីការចាកចេញជាបណ្ដោះអាសន្ន
ពីសង្វៀនប្រដាល់របស់កីឡាករ ផុន ផាន់ណាទៅរកស៊ីលក់បបរតាមរទេះ ហើយពេលនេះ មករត់កង់៣ឥណ្ឌាវិញនោះ កោះសន្តិភាពបានស្កាត់ទៅជួបលោកដល់ផ្ទះជួលតែម្ដង កាលពីពេលថ្មីៗកន្លងមកនេះ។
ក្នុងទឹកមុខញញឹមស្ងួត កីឡាករផុន ផាន់ណា បានរៀបរាប់ពីប្រវត្តិរបស់ខ្លួនថា លោកបានចាប់អាជីពជាអ្នកប្រដាល់តាំងពីឆ្នាំ២០០០ម្លេ៉ះ ដោយចូលហ្វឹកហាត់ដំបូងនៅក្នុងក្លិបកងអង្គរក្សខេត្តកោះកុង ។ នៅខែតុលា ឆ្នាំ២០០៩ លោកបានផ្លាស់មកនៅសមាគមកីឡាប្រដាល់ក្រសួងការពារជាតិ មុនពេលផ្លាស់មកនៅក្លិបអប្សរាគុនខ្មែរ ដែលមានលោក អេ ភូថង ជាគ្រូបង្វឹក ។
ផុន ផាន់ណា បានឱ្យដឹងទៀតថា រហូតមកទល់ពេលនេះគេធ្លាប់ដណ្ដើមបានខ្សែក្រវាត់ចំនួន៥ស្ថាប័នរួចមកហើយក្នុងនោះខ្សែក្រវាត់៤ដណ្ដើមបាននៅប្រទេសថៃនិង១ទៀតដណ្ដើមបាននៅប៉ុស្តិ៍លេខ៣ ។ លោកថាលោកពុំមានឈាមជ័រជាអ្នកប្រដាល់នោះទេ ដោយឪពុកលោកគ្រាន់តែជាកសិករម្នាក់ប៉ុណ្ណោះ ។ ម្យ៉ាងក្នុងចំណោមបងប្អូនប្រុសស្រី៤នាក់មានតែរូបលោកម្នាក់ប៉ុណ្ណោះដែលមាននិស្ស័យស្រឡាញ់ចូលចិត្តកីឡាប្រដាល់។
លោកបន្តថា មួយរយៈពេលចុងក្រោយនេះលោកបានទៅជ្រកកោននៅក្លិបខ្លារខិនមានរិទ្ធប្រហែលមួយឆ្នាំដែរ ប៉ុន្តែដោយសារមានបញ្ហាបន្តិចបន្តួចជាមួយម្ចាស់ក្លិប លោកក៏បង្ខំចិត្តចាកចេញ ណាមួយតាមស្ថានីយទូរទស្សន៍មួយចំនួន គេមិនសូវត្រូវការរូបលោកផងនោះ លោកក៏សម្រេចចិត្តដកខ្លួនចេញមួយរយៈ មករកស៊ីលក់បបរតាមរទេះវិញម្ដង ប៉ុន្តែដោយសារតែការលក់បបរមិនសូវកាក់កប លោកក៏មកជួលកង់៣ឥណ្ឌារត់ជំនួសវិញ។
ផុន ផាន់ណា បញ្ជាក់ថា របររត់កង់បីឥណ្ឌានេះពីដំបូងលោកខ្មាសគេដែរ តែដល់ពេលរត់យូរៗទៅក៏ស៊ាំ ហើយដោយមានការលើកទឹកចិត្តពីភ្ញៀវដែលស្គាល់លោកផងនោះ ទើបលោកគិតថា មុខរបរអីក៏មិនអាក្រក់ដែរសំខាន់ឱ្យតែមុខរបរនោះសុចរិត មិនខុសច្បាប់ និងអាចរកលុយចិញ្ចឹមប្រពន្ធ១កូនស្រីតូច២នាក់ឱ្យរស់នៅសមរម្យទៅបានហើយ។
ម្យ៉ាងការរកស៊ីខ្លួនឯង មានសេរីភាពជាង ចង់រត់ក៏រត់ទៅ ចង់សម្រាកក៏សម្រាកទៅអត់ខ្វល់ជាមួយអ្នកណានោះទេ។ លោកថា របររត់កង់បីនេះក្នុង១ថ្ងៃអាចរកកម្រៃបានចាប់ពី១៥ដុល្លារដល់២០ដុល្លារដែរ ប៉ុន្តែលោកត្រូវចំណាយទៅលើថ្លៃជួលបន្ទប់១ខែ៦០ដុល្លារដោយមិនទាន់គិតថ្លៃទឹកភ្លើងនោះទេ ហើយថ្លៃជួលកង់៣ក្នុង១ខែ១៦០ដុល្លារទៀត។ ដូច្នេះចំណូលប៉ុនហ្នឹងបានត្រឹមជួយឱ្យគ្រួសារលោកអាចរស់បានគ្រាន់តែមិនសល់សម្រាប់ធ្វើមានបានដូចគេប៉ុណ្ណោះ។
ជាចុងក្រោយ អ្នកប្រដាល់ដែលមានដើមកំណើតមកពីខេត្តកោះកុងវ័យ៣០ឆ្នាំរូបនេះ បានឱ្យដឹងថា លោកពិតជាស្រឡាញ់អាជីពជាអ្នកប្រដាល់នេះខ្លាំងណាស់ ទោះបីកន្លងមកមានរឿងអ្វីកើតឡើងក៏លោកស៊ូទ្រាំដែរ ។ ប៉ុន្តែមួយរយៈចុងក្រោយនេះ ដោយសារមន្ត្រីសហព័ន្ធមួយចំនួនប្រកាន់បក្សពួកខ្លាំងពេកធ្វើឱ្យលោកឆ្អែតចិត្តមិនអាចទ្រាំតទៅទៀតបានទើបចាកចេញពីពិភពប្រដាល់បណ្ដោះអាសន្នមករកស៊ីខ្លួនឯងវិញ ៕
ចែករំលែកព័តមាននេះ