សហរដ្ឋអាមេរិក ៖ ប្រធានាធិបតីអាមេរិកលោកដូណាល់ត្រាំ កាលពីថ្ងៃទី៣០ តុលាបានទៅកាន់ព្រះវិហារជ្វីវក្រុង PITTSBURGH ជាកន្លែងខ្មាន់កាំភ្លើងម្នាក់បាញ់សម្លាប់សាសនិកជ្វីវ១១នាក់។ បាតុករប្រមាណជាជាង១៥០០នាក់បានលើកគ្នាប្រឆាំងទស្សនកិច្ចនោះរបស់លោក។
ដោយស្ងៀមស្ងាត់ពួកបាតុករបានលើកគ្នាហែក្បួនដោយលើកប៉ង់កាតនានា ប្រឆាំងនយោបាយរបស់លោកត្រាំ។លើប៉ង់កាតសេសេរថា «ត្រាំ:ឈប់ភូតកុហកទៀតទៅ គ្មានការចងកំហឹង គ្មានអាវុធ គ្មានត្រាំ»។ អ្នករៀបចំបាតុកម្មម្នាក់និយាយថា អំពើហិង្សាថ្ងៃទី២៧តុលា ជាផលវិបាកដោយផ្ទាល់នៃឥទ្ធិពលរបស់លោកត្រាំ។ ប្រធានាធិបតីត្រាំ លោកពុំត្រូវបានស្វាគមន៍ឡើយនៅក្រុងPITTSBURGH បើដរាបណាលោកពុំបោះបង់ចោលលទ្ធិជាតិនិយមស្បែកសទេនោះ។
អមដំណើរដោយភរិយាលោកស្រីមីឡានីញ៉ា កូនស្រីនាងអ៊ីវ៉ាន់កានិងកូនប្រសាលោកJARED KUSHNER លោកត្រាំមកកាន់ទីក្រុងPITTSBURGHដើម្បីសម្ដែងសាមគ្គីភាពជាមួយពលរដ្ឋអាមេរិកនៅទីក្រុងនេះ ហើយលោកបានទៅដុតទៀនក្នុងព្រះវិហារជ្វីវដែលមានការបាញ់ប្រហារសម្លាប់មនុស្សយ៉ាងសាហាវ៕
ចែករំលែកព័តមាននេះ