ខេត្តព្រះសីហនុ ៖ ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានប្រាប់ឲ្យដឹងថា កាលពីវេលាម៉ោង៧និង៣០នាទីព្រឹកថ្ងៃទី៣០ ខែតុលា ឆ្នាំ២០១៨កន្លងមកនេះ មានករណីលិចទូកដឹកកម្មករសំណង់មួយគ្រឿង បណ្ដាលឲ្យកម្មករម្នាក់ស្លាប់ និងកម្មករម្នាក់ទៀតបានបាត់ខ្លួន ខណៈពេលនេះសមត្ថកិច្ចកំពុងព្យាយាមតាមស្វែងរកជនរងគ្រោះដែលបាត់ខ្លួន។
លោកឧត្តមសេនីយ៍ទោស្នងការ បានបញ្ជាក់ថា ករណីលិចទូកដឹកកម្មករសំណង់នេះ បានកើតឡើងនៅចំណុច «ពយអាវខ្មោច» ភូមិកោះរ៉ុងសន្លឹម សង្កាត់កោះរ៉ុងសន្លឹម ក្រុងព្រះសីហនុ ខេត្តព្រះសីហនុ ។
ជនរងគ្រោះដែលស្លាប់ឈ្មោះ ធំ សារ៉ាត ភេទប្រុស អាយុ៥៦ឆ្នាំ មុខរបរកម្មករសំណង់ មានស្រុកកំណើតភូមិចាក់អង្រែរលើ សង្កាត់ព្រែកតាគង់ ខណ្ឌមានជ័យ រាជធានីភ្នំពេញ។ ដោយឡែកម្នាក់ទៀតដែលបានបាត់ខ្លួន ឈ្មោះ ស៊ាប ភេទប្រុស អាយុប្រហែល៣៣ឆ្នាំ មុខរបរកម្មករ ជាមួយគ្នា មានស្រុកកំណើត នៅខេត្តកំពត។
លោកបានបន្តឲ្យដឹងទៀតថា មូលហេតុដែលកើតមានឡើងករណីលិចទូកដឹកកម្មករសំណង់ ខាងលើនេះ ដោយសារតែទូកនេះជាប្រភេទទូកកន្ទុយវែង និងបានដឹកចំនួនមនុស្សរហូតដល់ទៅ១៣នាក់មិនអាចទប់ទល់និងទម្ងន់ផ្ទុកបាន ទើបបណ្ដាលឲ្យមានការលិចបែបនេះ ។
ប្រភពខាងលើបានបញ្ជាក់ឲ្យដឹងជាចុងក្រោយ ថា ក្នុងពេលកើតហេតុបានទូកនេសាទដែលកំពុងចតក្បែរកន្លែងកើតហេតុចេញទៅជួយសង្គ្រោះជាបន្ទាន់ ដោយស្រង់បានជនរងគ្រោះនៅលើទូកចំនួន១១នាក់ ក្នុងចំណោម១៣នាក់ ក្នុងនោះស្លាប់១នាក់ដែលមានឈ្មោះខាងលើនិងបាត់ខ្លួន១នាក់ ពេលនេះសមត្ថកិច្ចនៅតែបន្តស្វែងរកជនរងគ្រោះដែលបាត់ខ្លួននោះផងដែរ ៕
ចែករំលែកព័តមាននេះ