ខេត្តត្បូងឃ្មុំ ៖ មន្ត្រីគយចល័តបាន សហការជាមួយអាវុធហត្ថលើផ្ទៃប្រទេស និងអាវុធហត្ថខេត្ត បានឆ្មក់បង្ក្រាបរថយន្តដឹកទំនិញគេចពន្ធ១គ្រឿង លុះពេលឆែកឆេរ ក៏ប្រទះឃើញកាំភ្លើងខ្លីចំនួន៣៥ដើម ជាប្រភេទកាំភ្លើងជ័រដ៏ទំនើប ។ ទោះជាបែបនេះក្តី វាមិនមែនជាកាំភ្លើងសម្រាប់ក្មេងលេងនោះទេ តែវាអាចបង្កគ្រោះថ្នាក់ជាយថាហេតុបាន ប្រសិនធ្លាក់ទៅលើដៃជនទុច្ចរិត ។ ការឆែកឆេរប្រទះឃើញកាំភ្លើងនេះ នៅត្រង់ចំណុចតំបន់៦ ដែលជាតំបន់ច្រកព្រំដែនជាប់ និងប្រទេសវៀតណាម «ទន្លេចាម» ក្នុងភូមិជាំក្រវៀន ឃុំជាំក្រវៀន ស្រុកមេមត់ ។
ប្រតិបត្តិការនេះ បានធ្វើឡើងនៅវេលាម៉ោង២រសៀលថ្ងៃទី២៨ តុលា ជាមួយនោះ សមត្ថកិច្ចក៏បានឃាត់ខ្លួនជនជាប់ចោទ២នាក់ ហើយរហូតមកដល់ថ្ងៃទី២៩ តុលា កំពុងតែចាត់ការតាមនីតិវិធី ។ ជំនួញកាំភ្លើងជ័រដែលអាចបន្លំជាកាំភ្លើងមែនទែននេះ ហាក់ដូចជាមានសកម្មភាពគួរឲ្យកត់សម្គាល់ ដែលមុននេះ១ថ្ងៃ នៅច្រកព្រំដែនប៉ោយប៉ែត ក៏មានការលួចនាំចូលកាំភ្លើងប្រភេទដូចគ្នានេះ ទៅប្រទេសថៃចំនួន១៨ដើម ត្រូវគយថៃចាប់បាន ហើយក្រោយគ្នា១ថ្ងៃនេះ ក៏ចាប់បានពេលឈ្មួញប៉ុនប៉ងនាំចេញទៅប្រទេសវៀតណាម៣៥ដើមទៀត ។
លោកឧត្តមសេនីយ៍ត្រី វ៉ា សារិទ្ធ មេបញ្ជាការកងរាជអាវុធហត្ថខេត្តមានប្រសាសន៍ឱ្យដឹងថា ដើមចមដំបូងកម្លាំងគយចល័ត បានចុះទៅតំបន់ខាងលើ ដើម្បីតាមដានរថយន្តដឹកទំនិញពីកម្ពុជា ទៅប្រទេសវៀតណាមដោយគេចពន្ធ ។ ស្របពេលនោះ បានឆែកឆេររថយន្ត១គ្រឿង ដែលសង្ស័យជាប្រភេទរថយន្តកូរ៉េ ចំណុះ៤តោន ក៏បានប្រទះឃើញកាំភ្លើងខ្លីដែលត្រូវបានដាក់បង្កប់នៅក្នុងទំនិញ ។ ការប្រទះឃើញកាំភ្លើងបែបនេះ ទើបបានហៅកម្លាំងអាវុធហត្ថខេត្ត មកចូលរួមសហការគ្នា ដើម្បីត្រួតពិនិត្យកាំភ្លើងទាំងនោះ ដោយបានរាប់ទៅឃើញមានចំនួន៣៥ដើមជាកាំភ្លើងជ័រដ៏ទំនើប ។
លោកឧត្តមសេនីយ៍មេបញ្ជាការខេត្តមានប្រសាសន៍បន្តថា ជនសង្ស័យចំនួន២នាក់ត្រូវបានឃាត់ខ្លួន ហើយកាំភ្លើងនោះត្រូវបានដកហូតមាន ១-ម៉ាក Retay G19C ប្រភេទប្រើគ្រាប់ជ័រចំនួន៣ដើម ។
២-ម៉ាក Sen Tetien F99T ជាប្រភេទប្រើគ្រាប់ជ័រចំនួន៥ដើម ។
៣-ម៉ាក Gamo PT85 ប្រភេទប្រើប្រាស់ហ្គាស់គ្រាប់ជ័រចំនួន៣ដើម ។
៤-ម៉ាកSmith និងWesson P9C ប្រភេទប្រើប្រាស់ហ្គាស់គ្រាប់ជ័រចំនួន៥ដើម ។
៥-ម៉ាក Zoraki 914 ប្រភេទប្រើប្រាស់ហ្គាស់ គ្រាប់ជ័រចំនួន៥ដើម ។
៦-ម៉ាកWaitherCP 99 ប្រភេទប្រើប្រាស់ហ្គាស់ គ្រាប់ជ័រចំនួន៣ដើម ។
៧-ម៉ាកM84 6mm ប្រើប្រាស់ហ្គាស់ គ្រាប់ជ័រចំនួន៨ដើម ។
៨-ម៉ាកRetay P114 ប្រភេទប្រើហ្គាស់គ្រាប់ជ័រចំនួន៣ដើម ។សរុបចំនួន៣៥ដើម និងគ្រប់ប្រភេទក្បាលជ័រចំនួន៨ប្រអប់ដែលក្នុងមួយប្រអប់មាន៥០គ្រាប់ ។
មន្ត្រីអាវុធហត្ថខេត្តបានបញ្ជាក់ដែរថា ជនសង្ស័យចំនួន២នាក់ដែលបានឃាត់ខ្លួនមាន១-ឈ្មោះប៉ែន អៀម ហៅសុង ភេទប្រុស អាយុ២៩ឆ្នាំ នៅភូមិធម្មយុទ្ធ សង្កាត់ប្អេរ ស្រុកកំពង់ឆ្នាំង ខេត្តកំពង់ឆ្នាំង ។ ២-ឈ្មោះជួន ចាន ភេទប្រុស អាយុ២៦ឆ្នាំ នៅភូមិធ្លក សង្កាត់សួង ក្រុងសួង ខេត្តត្បូងឃ្មុំ រួមជាមួយនឹងវត្ថុតាងកាំភ្លើងខ្លីចំនួន៣៥ដើម ត្រូវបានបញ្ជូនទៅឲ្យតំណាងអយ្យការអមសាលាដំបូងខេត្តចាត់ការតាមច្បាប់និងស្រាវជ្រាវបន្ថែម ។
លោក កែវ សុខា ប្រធានច្រកទន្លេចាម ប្រាប់ឲ្យដឹងដែរថា តាមចម្លើយសារភាពជនសង្ស័យ២នាក់ខាងលើ រថយន្តរបស់គាត់បានបើកចេញពីរាជធានីភ្នំពេញ ស្របពេលដែលបើកចូលមកដល់ឃុំជាំក្រវៀន ស្រុកមេមត់ នៅសល់ចម្ងាយ១៥គីឡូម៉ែត្រទៀតដល់ច្រកព្រំដែនវៀតណាម ក៏ត្រូវបានកម្លាំងគយចល័តរបស់លោក ព្រាប គារ៉ាត់ សង្ស័យឆែកឆរក៏ឃើញកាំភ្លើង នេះ ។ គេបានដាក់មន្ទិលថា ជំនួញកាំភ្លើងជ័រនេះទំនងមានប្រភពតែមួយ ដែលតាមព័ត៌មានខ្លះថានាំចូលពីប្រទេសចិន ចូលមកកម្ពុជាទើបនាំចេញបន្តទៅប្រទេសថៃ និងប្រទេសវៀតណាម ។
ចែករំលែកព័តមាននេះ