ខេត្តប៉ៃលិន ៖ ដោយសារស្ថានភាពផ្លូវនៅតាមមាត់ស្ទឹងបរយ៉ាខាលំបាកក្នុងការធ្វើដំណើរ ទើបអាជ្ញាធរខេត្តប៉ៃលិន ចុះរៀបចំឈូសឆាយធ្វើផ្លូវលំ១ខ្សែប្រវែង១៥០០ម៉ែត្រ ស្ថិតនៅក្នុងភូមិស្ទឹងកាច់ ឃុំស្ទឹងកាច់ ស្រុកសាលាក្រៅ ។
លោក ហុក សុផល អភិបាលរងខេត្តប៉ៃលិន បានឱ្យដឹងថា តាំងពីយូរយារណាស់មកហើយ ផ្លូវ១ខ្សែខាងលើ លំបាកក្នុងការបើកបរម៉ូតូ និងរថយន្តចេញចូលទៅមក ទើបរហូតមកដល់ពេលនេះ ខាងលោកបានដឹកនាំក្រុមការងារជួលឱ្យគ្រឿងចក្រចុះមកឈូសឆាយបង្កើតជាផ្លូវនៅប្របមាត់ស្ទឹង ងាយស្រួលដល់ប្រជាពលរដ្ឋ និងភ្ញៀវទេសចរចេញចូលទៅមក ។
លោកបន្តទៀតថា ជាដំបូងគ្រាន់តែក្រាលក្រួសក្រហមធម្មតាសិន ប៉ុន្តែនៅថ្ងៃខាងមុខ អាចនឹងឈានចូលដល់ការចាក់បេតុងទាំ ងស្រុងតែម្តង ។ លោកបញ្ជាក់ថា បើផ្លូវខាងលើធ្វើរួចរាល់ អាចនឹងមានការទាក់ទាញដល់ភ្ញៀវទេស ចរណ៍ឱ្យធ្វើដំណើរមកលេងកំសាន្តនៅក្នុងក្រុងប៉ៃលិន កាន់តែច្រើនឡើងថែមទៀត ព្រោះមានទឹក ស្ទឹងហូររឹមជាប់ជានិច្ច ហើយខ្យល់អាកាសក៏ត្រជាក់ស្រួល ជាពិសេសនៅពេលល្ងាចតែម្តង ។
លោកបញ្ជាក់ថា ការធ្វើផ្លូវ១ខ្សែនេះ មិនមានការប៉ះពាល់អ្វីធំដុំដល់ដំណាំដាំដុះរបស់ប្រជា ពលរដ្ឋនោះឡើយ តែបើឈូសដល់ក្បែរស្ពានតារៀប អាចប៉ះពាល់ដល់ខ្យូសប្រជាពលរដ្ឋប្រកបរបរលក់ដូរក្បែៗមាត់ស្ទឹង ។ តែទោះបីជាយ៉ាងណា ខាងលោកក៏សូមឱ្យខាងប្រជាពលរដ្ឋរុះរើចេញដោយខ្លួនឯង ដោយលោកមិនចង់ឱ្យមានបញ្ហានោះឡើយ ។
ចំណែកប្រជាពលរដ្ឋដែលមានដីនៅក្បែរផ្លូវខាងលើមានការសប្បាយយ៉ាងខ្លាំង ដោយឃើញមានការស្ថាបនាផ្លូវ ជាហេតុធ្វើឱ្យដីរបស់ពួកគាត់មានតម្លៃ ក៏ដូចជាបង្កលក្ខណ:ដល់ការដឹកដំណាំកសិកម្មចេញចូលទៅមកបានស្រួលផងដែរ ៕
ចែករំលែកព័តមាននេះ