ខេត្តត្បូងឃ្មុំ ៖ គយចល័តបានសហការជាមួយអាវុធហត្ថផ្ទៃប្រទេស និងអាវុធហត្ថខេត្ត បានឆ្មក់បង្ក្រាបរថយន្តដឹកទំនិញគេចព័ន្ធ លុះពេលដែលឆែកឆេរក៏ប្រទះអាវុធខ្លីចំនួន៣៥ដើម ត្រង់ចំណុច (តំបន់៦) ចំណុចច្រកទន្លេចាម ភូមិជាំក្រវៀន ឃុំជាំក្រវៀន ស្រុកមេមត់ ។ ប្រតិបត្តិការនេះបានធ្វើឡើងនៅវេលាម៉ោង២រសៀល ថ្ងៃទី២៨ ខែតុលា ឆ្នាំ២០១៨ ជាមួយនោះសមត្ថកិច្ចក៏បានឃាត់ជនសង្ស័យចំនួន២នាក់ ហើយរហូតមកដល់ថ្ងៃទី២៩ ខែតុលា នេះកំពុងតែចាត់ការតាមនីតិវិធីច្បាប់ ។
លោកឧត្តមសេនីយ៏ត្រី វ៉ា សារិទ្ធ មេបញ្ជាការកងរាជអាវុធហត្ថខេត្តមានប្រសាសន៏ឲ្យដឹងថា ដើមចមដំបូងកម្លាំងរបស់គយចល័តបានបានចុះទៅតំបន់ខាងលើដើម្បីតាមដានមើលរករថយន្តដឹកទំនិញពីកម្ពុជាទៅប្រទេសវៀតណាម។
ស្របពេលដែលបានឆែកឆេររថយន្តចំនួន១គ្រឿងក្នុងនោះមានប្រភេទរថយន្តកូរ៉េចំណុះ៤តោនក៏បានប្រទះឃើញអាវុធខ្លីដែលត្រូវបានដាក់បង្កប់នៅក្នុងទំនិញបានហៅកម្លាំងអាវុធហត្ថខេត្ត បានចូលរួមសហការជាមួយ ដើម្បីត្រួតពិនិត្យអាវុធទាំងនោះដោយបានរាប់ទៅឃើញមានចំនួន៣៥ដើម ។
លោកឧត្តមសេនីយ៏ត្រី វ៉ា សារិទ្ធ មេបញ្ជាការកងរាជអាវុធហត្ថខេត្តមានប្រសាសន៏បន្តថា ជនសង្ស័យចំនួន២នាក់ត្រូវបានឃាត់ខ្លួនហើយអាវុធដកហូតមាន ១- ម៉ាក Retay G19C ប្រភេទប្រើគ្រាប់ពិត bal ជ័រចំនួន៣ដើម, ២-ម៉ាក Sen Tetien F99T ប្រភេទប្រើគ្រាប់ពិត bal ជ័រចំនួន៥ដើម, ៣-ម៉ាក Gamo PT85ប្រភេទប្រើប្រាស់ហ្គាស់គ្រាប់ជ័រចនួន៣ដើម, ៤-ម៉ាក Smith និង Wesson P9C ប្រភេទប្រើប្រាស់ហ្គាស់គ្រាប់ជ័រចំនួន៥ដើម, ៥-ម៉ាក Zoraki 914 ប្រភេទប្រើប្រាស់ហ្គាស់ គ្រាប់ជ័រចំនួន៥ដើម, ៦ -ម៉ាកWaither CP 99 ប្រភេទប្រើប្រាស់ហ្គាស់ គ្រាប់ជ័រចំនួន៣ដើម, ៧-ម៉ាក M84 6mm ប្រើប្រាស់ហ្គាស់ គ្រាប់ជ័រ ចំនួន៨ដើម, ៨-ម៉ាកRetay P114 ប្រភេទប្រើហ្គាស់គ្រាប់ជ័រចំនួន៣ដើម សរុបចំនួន៣៥ដើម និងគ្រប់ប្រភេទក្បាលជ័រចំនួន៨ប្រអប់គុណ៥០គ្រាប់ ។
មន្ត្រីអាវុធហត្ថខេត្តបានបញ្ជាក់ថាបន្ថែមថា ជនសង្ស័យចំនួន២នាក់នោះមាន១-ឈ្មោះប៉ែន អៀម ហៅសុង ភេទប្រុស អាយុ២៩ឆ្នាំ នៅភូមិធម្មយុទ្ធ ឃុំផ្អេ ស្រុកកំពង់ឆ្នាំង ខេត្តកំពង់ឆ្នាំង ២-ឈ្មោះជួន ចាន ភេទប្រុស អាយុ២៦ឆ្នាំ នៅភូមិធ្លក សង្កាត់សួង ក្រុងសួង ខេត្តត្បូងឃ្មុំ រួមជាមួយនឹងវត្ថុតាងអាវុធខ្លីចំនួន៣៥ដើម ត្រូវបានបញ្ជូនទៅឲ្យតំណាងអយ្យការអមសាលាដំបូងខេត្តចាត់ការតាមច្បាប់ និងស្រាវជ្រាវបន្ថែមរកអ្នកនៅពីក្រោយខ្នង ។
លោក កែវ សុខា ប្រធានច្រកទន្លេចាមប្រាប់ឲ្យដឹងដែរថា តាមចម្លើយសារភាពជនសង្ស័យ២នាក់ខាងលើរថយន្តរបស់បានបើកចេញពីរាជធានីភ្នំពេញ ស្របពេលដែលបើកចូលមកដល់ឃុំជាំក្រវៀនស្រុកមេមត់ នៅសល់ចំងាយ១៥គីឡូម៉ែត្រទៀតដល់ច្រកព្រំដែនវៀតណាម ក៏ត្រូវបានកម្លាំងគយរបស់លោក ព្រាប គារ៉ាត់ ចាប់ឆែកអាវុធទាំងនេះដែលរថយន្តនេះមានគោលដៅបម្រុងឆ្លងទៅកាន់ប្រទេសវៀតណាមតែមិនទាន់ដល់ផងត្រូវបានបង្ក្រាប ៕
ចែករំលែកព័តមាននេះ