រាជធានីភ្នំពេញ ៖ អ្នកនាំពាក្យរាជរដ្ឋាភិបាលលោក ផៃ ស៊ីផាន បានអះអាងចំពោះសំណុំរឿងរំលាយគណបក្សសង្គ្រោះជាតិ គឺជាអំណាចរបស់តុលាការដោយសំអាងលើកអង្គហេតុ និង អង្គច្បាប់ ហើយរាជរដ្ឋាភិបាលមិនរំលោភបំពានបានទេទោះបីជាមានសំណើរពីអន្តរជាតិ យ៉ាងណាក្តី ។
លោក ផៃន ស៊ីផានបានលើកឡើងតាមរយៈវីឌីអូឃ្លីបប្រមាណ២០នាទីយ៉ាងដូច្នេះថា កម្ពុជាមិនមែនជារដ្ឋបរាជ័យ ឬរដ្ឋអនាធិបតេយ្យទេ ។ អាស្រ័យដោយកម្ពុជាបានរក្សាសណ្តាប់ធ្នាប់សង្គមសណ្តាប់ធ្នាប់សាធារណៈរក្សាសន្តិភាពជាមួយប្រទេសជិតខាងក៏ដូចជា ក្នុងឆាកអន្តរជាតិកម្ពុជាបានធ្វើឲ្យយន្តការប្រជាធិបតេយ្យបន្តដំណើរទៅមុខតាមអ្វីជាក់ស្តែង ដែលកម្ពុជាយល់ឃើញល្អសម្រាប់កម្ពុជា ។ លោកបន្តថា កម្ពុជាបានរក្សាសន្តិភាព សណ្តាប់ធ្នាប់ និងរក្សាបានការបោះឆ្នោតដោយទៀងទាត់ដែលផ្ទុយពីការចង់បានរបស់ប្អូនមួយចំនួនដែលគាំទ្របក្សប្រឆាំង ចង់ឲ្យមានការបោះឆ្នោតឡើងវិញនោះ គឺជាការប្រឆាំងនឹងច្បាប់កម្ពុជា (ច្បាប់ធម្មនុញ្ញ) ។
លោកបញ្ជាក់ថា «បើប្អូនស្រឡាញ់កម្ពុជាមិនប្រកាន់បក្ខពួកទេ យើងគួរយករដ្ឋធម្មនុញ្ញជាមូលដ្ឋាន ។ ដូច្នេះបើស្រលាញ់កម្ពុជាត្រូវអនុវត្តរដ្ឋធម្មនុញ្ញកម្ពុជាមិនអនុញ្ញាតឲ្យបរទេសលុកលុយដែនអធិបតេយ្យភាពកម្ពុជានោះទេ ។ ច្បាប់បោះឆ្នោតយើងធ្វើទៀតទាត់ដោយមិនធ្វើមុនកំណត់ដោយច្បាប់ ឬធ្វើ ក្រោយនៃការនោះទេ ។ ព្រោះយើងអត់មានវិបត្តិនយោបាយ ឬជម្លោះភាគីអាវុធណាមួយនោះទេ» ។ អ្នកនាំពាក្យរាជរដ្ឋាភិបាលក៏បានគូសបញ្ជាក់ករណីរំលាយគណបក្សសង្គ្រោះជាតិ កាលពីចុងឆ្នាំ២០១៧ យ៉ាងណាដូច្នេះថា «ការរំលាយគណបក្សសង្គ្រោះជាតិមិនមែនមានវិបត្តិនយោបាយនោះទេ គឺធ្វើឡើងតាមអង្គហេតុ អង្គច្បាប់សម្រេចដោយតុលាការ ។ រាល់ការលើកឡើងពីអន្តរជាតិណាមួយដែលឲ្យកម្ពុជារំលត់រំលោភ ឬរំលាយសាលដីកាកំពូលយើងមិនអាចធ្វើបានទេ ។ ព្រោះយើងយល់ឃើញថា កម្ពុជាកំពុងស្ថិតក្នុងការពង្រឹងនីតិរដ្ឋ ។
ដូច្នេះលទ្ធិប្រជាធិតេយ្យត្រូវសម្រេចឲ្យមាននីតិរដ្ឋ» ។ លោក ផៃ ស៊ីផាន ក៏បានលើកឡើងថាអ្នកនយោបាយ គឺជាបុគ្គលមួយដែលស្ថិតនៅក្រោយច្បាប់ និងអនុវត្តច្បាប់ទាំងអស់គ្នា ។ អាស្រ័យដូច្នេះ គឺគ្មានការផ្លាស់ប្តូរជំហររបស់រាជរដ្ឋាភិបាល ឬរបស់កម្ពុជា ដើម្បីដើរចេញក្នុងការអនុវត្តច្បាប់ ឬប្រតិបត្តិច្បាប់របស់ខ្លួន ឬលក់ដូរ ដើម្បីឲ្យបរទេសមកត្រួតត្រានោះទេ ។ លោកបានសង្កត់ធ្ងន់ថា «ខ្ញុំសូមជម្រាបថា បងប្អូនមានសេរីភាពគ្រប់គ្រាន់ក្នុងការជ្រកកោននៅប្រទេសដ៏ទៃដែលទទួលបានសិទ្ធិទទួលបានសញ្ជាតិក៏ប៉ុន្តែសូមកុំភ្លេចថា អ្នកដែលចូលរួមក្នុងជីវភាពនយោបាយនៅកម្ពុជា គឺត្រូវតែជាប្រជាជនស្របច្បាប់ទាំងការបោះឆ្នោត និងឲ្យគេបោះឆ្នោតស្របតាមច្បាប់កម្ពុជា» ។ លោក ផៃ ស៊ីផាន បានលើកឡើងទៀតថា កម្ពុជានៅតែបន្តការបោះឆ្នោតសេរីពហុបក្សតាម លទ្ធិប្រជាធិបតេយ្យដែលកំពុងដើរទៅរកកិច្ចថែរក្សាឯកភាពជាតិ ថែរក្សាតម្លៃប្រជាធិបតេយ្យដែលកើតចេញពីប្រជាពលរដ្ឋខ្មែរ ។
សូមជម្រាបថា ការលើកឡើងរបស់អ្នកនាំពាក្យរាជរដ្ឋាភិបាលនេះ បន្ទាប់ក្រុមប្រឆាំងនៅក្រៅប្រទេសបានធ្វើបាតុកម្មនានា ដើម្បីទាមទារឲ្យអន្តរជាតិដាក់គំនាមករាជរដ្ឋាភិបាលកម្ពុជា ដើម្បីឲ្យគណបក្សសង្គ្រោះជាតិរស់ឡើងវិញព្រមទាំងឲ្យអ្នកនយោបាយចំនួន១១៨នាក់ របស់ គណបក្សនេះមានសិទ្ធិធ្វើនយោបាយឡើងវិញ ។ យ៉ាងណាក្តីសម្រាប់សកម្មភាពរបស់ក្រុមប្រឆាំង និងមេបក្សប្រឆាំងនេះគេមិនទាន់មានប្រសិទ្ធភាពមកលើរាជរដ្ឋាភិបាលកម្ពុជា ដូចអ្វីដែលចង់បាននោះទេ ។ ជាងនេះអតីតមេបក្សប្រឆាំងលោក សម រង្ស៊ី ក៏បានដើរគរបរទេសផងដែរ ដើម្បីឲ្យរាជរដ្ឋាភិបាលឲ្យគណបក្សសង្គ្រោះជាតិរស់ឡើងវិញផងដែរ ។
គួរឮកថា គណបក្សសង្គ្រោះជាតិត្រូវបានតុលាការកំពូលបានសម្រេចរំលាយចោល កាលពីថ្ងៃទី១៦ ខែវិច្ឆិកា ឆ្នាំ២០១៧ ព្រមទាំងមិនអនុញ្ញាតឲ្យមន្ត្រីជាន់ខ្ពស់គណបក្សនេះចំនួន១១៨នាក់ធ្វើនយោបាយចំនួន៥ ឆ្នាំថែមទៀត ៕
ចែករំលែកព័តមាននេះ