រាជធានីភ្នំពេញ ៖ រដ្ឋបាលរាជធានីភ្នំពេញបានប្រកាសស្វែងរកអ្នកគាំទ្ររូបភាព រចនាខ្លោងរបារកាត់ទទឹងផ្លូវអបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០១៨ ដោយគ្រាន់តែបងប្អូនគិតថា ស្អាតនិងស័ក្តិសមជាងគេ រួចចុចLikeនៅតាមរូបភាពដែលបានបង្ហោះ នៅក្នុងផេករបស់សាលារាជធានីភ្នំពេញតែប៉ុណ្ណោះ ។
រូបភាពទាំង៥សន្លឹកនេះ គឺជាស្នាដៃរបស់បេក្ខជន ដែលបានជ្រើសរើសដោយគណៈកម្មការវាយតម្លៃចេញពីរូបភាពចំនួន៤៥រូបភាព ដែលមានបេក្ខជនចំនួន២៩នាក់ បានផ្ញើមកដើម្បីចូលរួមប្រកួតរចនាខ្លោងរបារកាត់ទទឹងផ្លូវអបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែក្នុងឆ្នាំនេះ ។
ដោយពិនិត្យទៅលើអត្ថន័យ ខ្លឹមសារព្រះរាជពិធី រចនាបថខ្មែរ លក្ខណៈបច្ចេកទេសនៃការសាងសង់និងការរចនាភ្លើង ដែលអាចទទួលយកបានទាំងពេលថ្ងៃនិងពេលយប់ ទើបគណៈកម្មការវាយតម្លៃ សម្រេចជ្រើសរើសបានរូបភាពទាំង៥ ដូចបានថតចម្លងភ្ជាប់មកជាមួយ ។
តាមរយៈផេករបស់សាលារាជធានីភ្នំពេញ រូបភាពដែលទទួលបានការLikeគាំទ្រច្រើនជាងគេចំនួន៤រូបភាព នឹងត្រូវយកទៅដំឡើងនៅតាមគោលដៅទាំង៤ ដែលបានត្រៀមរួចជាស្រេច ។ ការប្រមូលការគាំទ្រនឹងត្រូវបញ្ចប់នៅថ្ងៃអង្គារ ទី៣០ ខែតុលា ឆ្នាំ២០១៨ វេលាម៉ោង៣រសៀល ៕
ចែករំលែកព័តមាននេះ