ខេត្តបាត់ដំបង ៖ នៅរសៀលថ្ងៃទី២៧ ខែតុលា ឆ្នាំ២០១៨ ប្រតិភូអ្នកសារព័ត៌មានកម្ពុជាចំនួន៣៧រូប ចូលរួមកិច្ចប្រជុំគណកម្មការសហព័ន្ធប្រព័ន្ធផ្សព្វផ្សាយអាស៊ាន (ហៅកាត់ថា UMA ) នៅសណ្ឋាគារ Indochina ស្រុកអារញ្ញប្រាថេត ខេត្តស្រះកែវ នៃព្រះរាជាណាចក្រថៃ ក្រោមការរៀបចំពីលោកប្រាសិត សែង រុងរឿង អគ្គលេខាធិការ UMA ប្រចាំប្រទេសថៃ ដោយមានភាគីថៃចំនួន២០រូបបានចូលរួម ។
លោកសុខ សុវណ្ណ អគ្គលេខាធិការង UMA តំណាងកម្ពុជាបានថ្លែងថ្វីត្បិតតែ UMA ត្រូវបានបង្កើតឡើងបាន៩ឆ្នាំមកនេះ គឺបានជួបឧបស័គ្គជាច្រើន ព្រោះតែភាពមិនចុះសម្រុង និងគ្នាតែដោយបានការខិតខំប្រឹងប្រែងពីសំណាក់លោក ប្រាស៊ិត សែងរុងរឿង រួមជាមួយអ្នកសារព័ត៌មានទាំងពីរប្រទេសបានធ្វើឲ្យអង្គភាពមួយនេះសម្រេចជោគជ័យ តាមគោលដៅកំណត់ជាបន្តបន្ទាប់ ។ បន្ទាប់មកលោក ប្រាស៊ិត សែងរុងរឿង អគ្គលេខាធិការសហព័ន្ធប្រព័ន្ធផ្សព្វផ្សាយអាស៊ាន UMA ក៏បានថ្លែងការកោតសើរដល់អ្នកសារព័ត៌មានកម្ពុជាដែលកន្លងមកបានធ្វើការផ្សព្វផ្សាយនូវរាល់ព័ត៌មាន ព្រឹត្តិការណ៍ផ្សេងៗ ដែលបានជម្រុញឲ្យស្ថានភាពនៃទំនាក់ទំនងល្អរវាងប្រទេសក្នុងតំបន់អាស៊ានបានយ៉ាងល្អប្រសើរ និងដើម្បីរក្សាសន្តិភាព និងកិច្ចសហប្រតិបត្តិការណ៍កាន់តែស៊ីជម្រៅ ។
លោកប្រាស៊ិត សែងរុងរឿង លើកឡើងថា លោកនឹងបន្តពង្រីកចំណងកិច្ចសហប្រតិបត្តិការណ៍ជាមួយប្រទេសម៉ាឡេស៊ី ក្នុងពេលឆាប់ៗខាងមុខនេះ ក្នុងការផ្លាស់ប្តូរបទពិសោធន៍ពីគ្នាទៅវិញទៅមកនឹងបណ្តាប្រទេសអាស៊ានផងដែរ ហើយលទ្ធផលដែលទទួលបានមកនេះ គឺមាននៅសល់អ្នកសារព័ត៌មានចាស់ៗកំពុងនៅជាមួយយើងទាំងអស់គ្នា ដើម្បីជួយរៀបចំផ្តល់បទពិសោធន៍ទុកឲ្យយុវវ័យជំនាន់ក្រោយដែលកំពុងមកចូលរួមជាមួយគ្នានេះបន្តវេនឲ្យមានប្រសិទ្ធិភាពក្នុងពេលអនាគតសម្រាប់ជាផលប្រយោជន៍ជួយដល់សង្គមជាតិនៃប្រទេសយើងដូចៗគ្នាក្នុងអាស៊ានទាំងមូល ។
លោក វិជិត អាទិកាចន អគ្គលេខាធិការរងប្រទេសថៃនៅខេត្តសុរិន្ទបានលើកឡើងថា ដើមហេតុនៃការប្រមូលផ្តុំអ្នកសារព័ត៌មាននេះលើកដំបូងត្រូវបានធ្វើឡើងនៅខេត្តសុរិន្ទ បន្ទាប់ពីមានហេតុការណ៍យល់ច្រឡំគ្នា បណ្តាលឲ្យមានការដុតបញ្ឆេះស្ថានទូតថៃ នៅទីក្រុងភ្នំពេញ កាលពីឆ្នាំ២០០៣ កន្លងមកនោះ ហើយក៏បានរួមគ្នាពង្រឹងលើវិស័យព័ត៌មានជាមួយគ្នានេះបន្តឆ្ពោះទៅរកអាស៊ានទាំងមូលទៅតាមគោលការណ៍នយោបាយរបស់ប្រទេសជាតិដែលកំពុងចាប់ដៃរកគ្នាក្នុងអាស៊ានទាំងមូលនេះផងដែរ ។
លោកប៊ុនឈួយ ស៊ីកែវ តំណាងខាងប្រទេសវៀតណាមបានលើកឡើងថា លោកទើបបានប្រឡូកចូលក្នុង UMA នេះប្រមាណ៥ឆ្នាំកន្លងមកនេះ ដោយបានចូលរួមជាមួយអ្នកសារព័ត៌មានមកពីវៀតណាម ឡាវ ភូមា និងកម្ពុជា បានរួមសហការធ្វើជាមួយគ្នា នៅក្នុងប្រទេសថៃនេះជាញឹកញាប់ផងដែរ សំខាន់ការយល់ចិត្តគ្នា និងផ្លាស់ប្តូរបទពិសោធន៍ព័ត៌មានពីគ្នាទៅវិញទៅមក ឲ្យកាន់តែមានភាពងាយស្រួលបន្ថែមទៀត ដែលកំពុងមាននៅលើពិភពលោក ។
ក្នុងនោះលោកហួត សុងហាក់ ទីប្រឹក្សា UMA ថៃប្រចាំនៅកម្ពុជាបានចាប់អារម្មណ៍ថា UMA ក្រោមការជ្រោមជ្រែង និងគាំទ្រយ៉ាងពេញទំហឹងពីឯកឧត្តមខៀវ កាញារីទ្ធ រដ្ឋមន្ត្រីក្រសួងព័ត៌មានទើបសម្រេចបានលទ្ធផលផ្លែផ្កាធំជាច្រើនដែលជាចលករជម្រុញឲ្យ UMA កាន់តែពង្រីកខ្លួនទៅមុខជាបន្តបន្ទាប់ ហើយបណ្តាំផ្តាំផ្ញើពីឯកឧត្តមរដ្ឋមន្ត្រីសុំឲ្យមានកិច្ចសហការគ្នាឲ្យបានល្អ ចៀសវាងក្រឡៃព័ត៌មាន ក្លែងបន្លំ ប្រឌិតរឿងមិនពិត ហើយរក្សាមានសាមគ្គីភាពផ្ទៃក្នុង ជំរុញព័ត៌មានឲ្យមានតម្លាភាពដែលប្លែក លឿន អាចទុកចិត្តបានប្រកបដោយគុណភាព និងប្រសិទ្ធិភាពបំផុត ទើបយើងមានការទទួលស្គាល់ជាបន្តបន្ទាប់ទៅទៀត ។
លោកស្រីសុផាផន អាយុ៦៦ឆ្នាំ សមាជិក UMA ប្រធានសមាគមសារព័ត៌មាន តំណាងប៉ុស្តិ៍លេខ៥ថៃ នៅខេត្តច័ន្ទបូរី បានថ្លែងថា ដោយឃើញសកម្មភាពប្រមូលផ្តុំអ្នកសារព័ត៌មាន ចេះតែមានការកើនឡើងទើបអ្នកស្រីបានឈានជើងមកចូលរួមសកម្មភាពរួបរួមគ្នាដែលអ្នកស្រីបានប្រឡូកវិស័យព័ត៌មាននេះប្រមាណជាង៤០ឆ្នាំមកហើយ ដោយបានយល់ថា យើងកំពុងរួមគ្នាពង្រីកទៅរកមិត្តរួមអាជីព និងវិជ្ជាជីវៈមានដូចៗគ្នាឲ្យបានមកជួបជុំគ្នា និងផ្លាស់ប្តូរទីកន្លែងគ្នា ដែលអាចធ្វើទៅបានសំខាន់យើងមានទឹកចិត្តដូចគ្នា វប្បធម៌ប្រហាក់ប្រហែលគ្នា ជីវភាពដូចគ្នារស់នៅជាប់របងផ្ទះគ្នា តែយើងមានទឹកចិត្តស្រឡាញ់លើកស្ទួយវិស័យសិទ្ធសេរីភាពសារព័ត៌មាននេះដូចៗគ្នា ។
ដូច្នោះហើយទើបលោកស្រីបានរៀបចំទទួលអ្នកសារព័ត៌មាននៅកម្ពុជាទៅ កាលពី២ឆ្នាំមុន នៅខេត្តច័ន្ទបូរី លើសផែនការរហូតដល់២៥០នាក់ ដែលត្រូវចំណាយថវិកាប្រមាណជាង១លានបាត ក៏ត្រូវតែចំណាយដែរ ដូច្នេះការជួបជុំគ្នាលើកក្រោយនេះ គឺសុំអង្គប្រជុំទាំងមូលពិចារណាជួយលៃយ៉ាងណារក្សារួបរួមគ្នាប្រកបដោយគុណភាពដែលយើងទាំងអស់គ្នាចង់បានឆ្ពោះទៅរកអាស៊ានទាំងមូលផងដែរ ៕
ចែករំលែកព័តមាននេះ