ទីក្រុងសិង្ហបុរី ៖ យោងតាមសេចក្តីរាយការណ៍ថ្មីមួយបានឲ្យដឹងថា វិធានការទប់ស្កាត់ហានិភ័យក្នុងវិស័យអចលនទ្រព្យដែលបានប្រកាសកាលពីខែកក្កដា កំពុងតែប៉ះពាល់ដល់ជំនឿចិត្តក្នុងទីផ្សារអចលនទ្រព្យរបស់ប្រទេសសិង្ហបុរី ។
សន្ទស្សន៍ជំនឿចិត្តលើវិស័យអចលនទ្រព្យប្រចាំត្រីមាសបានធ្លាក់ចុះយ៉ាងខ្លាំងពី៦,៦ពិន្ទុនៅត្រីមាសទី២ មកស្មើត្រឹម៤ពិន្ទុប៉ុណ្ណោះនៅត្រីមាសទី៣ឆ្នាំនេះ ។ អ្នកចូលរួមការស្ទង់មតិបានឲ្យដឹងថា វិធានការទប់ស្កាត់ហានិភ័យដែលបានប្រកាសកាលពីថ្ងៃទី៦ ខែកក្កដា បានបង្កភាពចលាចល និងប៉ះពាល់ដល់ជំនឿចិត្ត ។
ពួកគេបានបន្តទៀតថា ក្រុមហ៊ុនអចលនទ្រព្យត្រូវពិន័យដោយពន្ធរត់ឯកសាររបស់អតិថិជនដ៏ខ្ពស់ដែលធ្វើឲ្យការសម្រេចចិត្តលើការទិញដីកាន់តែជួបឧបសគ្គ និងមានហានិភ័យខ្ពស់ ។
ការស្ទង់មតិនេះបានកត់សម្គាល់ដែរថា ប្រមាណ៩០,២%នៃអ្នកចូលរួមគិតថា ទីផ្សារលក់ នឹងទទួលរងការប៉ះពាល់យ៉ាងខ្លាំងពីពន្ធរត់ឯកសារខាងលើក្នុងរយៈពេល៦ខែខាងមុខនេះ។ ផ្ទះនៅតំបន់សំខាន់ៗកណ្តាលក្រុងក៏ងាយនឹងទទួលរងការប៉ះពាល់ពីគោលនយោបាយពន្ធនេះច្រើនជាងតំបន់ដទៃដែរ ។
អ្នកចូលរួមការស្ទង់មតិគិតថា ហានិភ័យធំៗទាំងបីដែលអាចប៉ះពាល់ដល់ជំនឿចិត្តក្នុងទីផ្សារនៅអំឡុងពេល៦ខែខាងមុខរួមមាន កំណើនអត្រាអតិផរណា និងអត្រាការប្រាក់, ការអន់ថយ ឬការធ្លាក់ចុះនៃសេដ្ឋកិច្ចពិភពលោក និងការរឹតបន្តឹងផ្នែកហិរញ្ញវត្ថុក្នុងទីផ្សារឥណទានជាដើម ។
លោក Sing Tien Foo សាស្ត្រាចារ្យរងនៅសកលវិទ្យាល័យNUSបានឲ្យដឹងថា ៖« ភាពមិនប្រាកដប្រជានៃស្ថានការណ៍សេដ្ឋកិច្ចនៅ បរទេស រួមជាមួយនឹងកំណើននៃការចំណាយក្នុងការទិញលក់ ព្រោះតែគោលនយោបាយពន្ធថ្មីនេះ អាចនឹងប៉ះពាល់យ៉ាងធ្ងន់ធ្ងរដល់ទីផ្សារផ្ទះក្នុងស្រុក »៕
ចែករំលែកព័តមាននេះ