រាជធានីភ្នំពេញ ៖ ស្របពេលដែលប្រទេសកម្ពុជា មានសុខសន្តិភាព កំណើនសេដ្ឋកិច្ចរឹងមាំ និងស្ថិរភាពនយោបាយ ធ្វើឲ្យអ្នកវិនិយោគបរទេសបានមកបណ្ដាក់ទុនវិនិយោគលើវិស័យខុនដូកាន់តែច្រើន ដែលធ្វើឲ្យទីផ្សារនេះកាន់តែមានភាពទាក់ទាញ និងការប្រកួតប្រជែងកើនឡើង ។
នាយិកាប្រចាំប្រទេសនៃក្រុមហ៊ុន CBRE Cambodia អ្នកនាង អាន សុធីតា បានឲ្យដឹងកាលពីសប្តាហ៍មុនថា កាលពីឆ្នាំ២០០៨ ចំនួនខុនដូនៅកម្ពុជាមានតែ១៧៦យូនីតប៉ុណ្ណោះ ប៉ុន្តែបច្ចុប្បន្ននេះខុនដូចំនួន១២.០០០យូនីតបានបញ្ចប់ការសាងសង់ និងដាក់ចូលទីផ្សារ ខណៈគម្រោងខុនដូជាច្រើនទៀតកំពុងសាងសង់ និងត្រៀមបញ្ចប់ ។
អ្នកនាងបន្តថា កាលពីឆ្នាំ២០០៨ មានតែអ្នកវិនិយោគកូរ៉េប៉ុណ្ណោះ បានវិនិយោគសាងសង់ខុនដូលក់ តែបច្ចុប្បន្នអ្នកវិនិយោគជាច្រើនបានចូលមក ដូចជា អ្នកវិនិយោគចិន តៃវ៉ាន់ កូរ៉េ ជប៉ុន និងសិង្ហបុរីជាដើម ។
អ្នកនាងបន្តថា ក្នុងចំណោមគំរោងវិនិយោគខុនដូនានា មានអ្នកវិនិយោគខ្មែរបានវិនិយោគក្នុងវិស័យនេះចំនួន២៣គម្រោង និងអ្នកវិនិយោគអន្តរជាតិជាច្រើនសញ្ជាតិទៀត ។
ច្បាប់សហកម្មសិទ្ឋដែលអនុញតឲ្យជនបរទេសអាចមានសិទ្ឋិកាន់កាប់ទិញលំនៅឋានចាប់ពីជាន់ទី១ឡើងទៅ ដែលបានអនុម័តកាលពីឆ្នាំ២០១០ ក៏ជាផ្នែកមួយយ៉ាងសំខាន់ក្នុងការទាក់ទាញអ្នកវិនិយោគអន្តរជាតិ មកកាន់ប្រទេសកម្ពុជាផងដែរ ។
យោងតាមការសិក្សារបស់ក្រុមហ៊ុន Vtrust Appraisal កាលពីដំណាច់ឆ្នាំ២០១៧ បានរកឃើញថា ចំនួនខុនដូដែលនឹងផ្អត់ផ្គង់ចូលទីផ្សារនៅដំណាច់ឆ្នាំ២០២០ខាងមុខ នឹងកើនឡើងដល់ជាង៦ម៉ឺនយូនីត ក្នុងនោះខេត្តព្រះសីហនុមានប្រមាណជាង៥ពាន់យូនីត។
ក្នុងរយៈពេល៩ខែដើមឆ្នាំ២០១៨នេះ ក្រសួងរៀបចំដែនដីនគរូបនីយកម្ម និងសំណង់បានចេញលិខិតអនុញ្ញាតគម្រោងសាងសង់សរុបចំនួន២.៥៤១គម្រោង ដែលមានផ្ទៃសរុបជាង១០លានម៉ែត្រការ៉េ ក្នុងនោះមានទុនវិនិយោគប្រមាណ៤.៨២០លានដុល្លារអាមេរិក ធ្លាក់ចុះជាង១៤% បើធៀបរយៈពេលដូចគ្នាក្នុងឆ្នាំ២០១៧ ។ នេះបើយោងតាមរបាយការណ៍ក្រសួងដែនដី នគរូបនីយកម្ម និងសំណង់ ។
ក្នុងរយៈពេល៩ខែដើមឆ្នាំនេះដែរ សំណង់អគារខ្ពស់ៗចាប់ពី៥ជាន់ឡើងទៅមានកំណើន៩២អគារ ដែលធ្វើឲ្យអគារខ្ពស់ៗនៅភ្នំពេញបានកើនដល់១.០៨៨អគារគិតពីឆ្នាំ២០០៥មក ។ នេះបើតាមរបាយការណ៍បានបញ្ជាក់ ។
អ្នកជំនាញអចលនទ្រព្យ បានកត់សម្គាល់ថា គម្រោងវិនិយោគអន្តរជាតិភាគច្រើន គឺវិនិយោគដោយជនជាតិចិនមានចំណែកច្រើនជាងគេ បន្ទាប់មក កូរ៉េ ជប៉ុន និងសិង្ហបុរី ហើយសក្ដានុពលនៅពេលអនាគត កម្ពុជានៅតែមានទីផ្សារសម្រាប់ការវិនិយោគដដែល ទាំងខុនដូ អគារការិយាល័យ បុរីលំនៅឋាន ។
លោក សន សៀប នាយកគ្រប់គ្រងក្រុមហ៊ុនអចលនទ្រព្យ ឃី រៀលអីុស្ទេត បានឲ្យដឹងថា បច្ចុប្បន្ន ការវិនិយោគវិស័យសំណង់ក្នុងប្រទេសកម្ពុជា មានប៉ូលសេដ្ឋកិច្ច២ដែលផុសផុលជាងគេ គឺភ្នំពេញ និងខេត្តព្រះសីហនុ ហើយបើមើលនឹងភ្នែកគេវាយតម្លៃថា ខេត្តព្រះសីហនុ មានការវិនិយោគច្រើនជាងភ្នំពេញ ប៉ុន្តែជាក់ស្ដែង ការវិនិយោគវិស័យសំណង់នៅភ្នំពេញមានគម្រោងច្រើនជាងគេ ក្នុងចំណោមតំបន់ប៉ូលសេដ្ឋកិច្ចសំខាន់ៗទាំងបីរបស់កម្ពុជា ។
លោកមានប្រសាសន៍ថា ៖« ភ្នំពេញមានសក្ដានុពលធំទូលាយ និងស្ទើរតែទូទាំងរាជធានី។ ដូចនេះ ការវិនិយោគ ការសាងសង់សំណង់ទាំងអគារខ្ពស់ និងសំណង់លំនៅឋាននៅតែមានការចាប់អារម្មណ៍ពីសំណាក់វិនិយោគិនទាំងក្នុងនិងក្រៅប្រទេស »៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ