ខេត្តប៉ៃលិន ៖ បន្ទាប់ពីសមត្ថកិច្ចនគរបាលចាប់ឃាត់ខ្លួនបុរសម្នាក់ ដែលបានប្រើអំពើហិង្សា វាយប្អូនស្រីរបស់ខ្លួន បណ្តាលឱ្យរងរបួស លុះយកទៅសួរនាំ ស្រាប់តែបែកធ្លាយពាក់ព័ន្ធនឹងរឿងលាក់ទុកកាំបិតមួយ និងអាវុធខ្លីខុសច្បាប់១ដើម នៅក្បែរស្រះទឹកទៅវិញ ។
ប្រភពព័ត៌មានពីនគរបាលឱ្យដឹងថា កាលពីម៉ោង៨និង៣០នាទីយប់ ថ្ងៃទី២៥ ខែតុលា ឆ្នាំ២០១៨ មានករណីអំពើហិង្សាដោយចេតនាដែលមានស្ថានទម្ងន់ទោសមួយបានកើតឡើង នៅចំណុចចំការស្វាយ ស្ថិតក្នុងភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន ។
ជនរងគ្រោះមានឈ្មោះ អៀម សុផានី ភេទស្រី អាយុ៥៣ឆ្នាំ ជាកសិករ រស់នៅភូមិអូរតាពុកក្រោម សង្កាត់ទួលល្វា ក្រុងប៉ៃលិន រងរបួសកែងដៃ និងភ្លៅខាងស្តាំ ចំណែកជនបង្កឈ្មោះ អៀម សុកល ភេទប្រុស អាយុ៥៧ឆ្នាំ ជាកសិករ មានទីលំនៅមិនពិតប្រាកដ ត្រូវជាបងបង្កើតរបស់ជនរងគ្រោះ ។
ប្រភពបន្តទៀតថា ជនសង្ស័យបានវាយទៅលើជនរងគ្រោះ បណ្តាលឱ្យរងរបួស ហើយក៏ត្រូវឃាត់ខ្លួនទៅអធិការដ្ឋាននគរបាលស្រុកសាលាក្រៅ ។ តែក្រោយមក ស្រាប់តែមកដល់វេលាម៉ោង៨និង៣០ព្រឹកថ្ងៃទី២៦ តុលា កម្លាំងជំនាញនៃអធិការដ្ឋាននគរបាលស្រុកសាលាក្រៅ ធ្វើការសាកសួររហូតឈានដល់រកឃើញវត្ថុតាងអាវុធខ្លី K54 មួយដើម គ្រាប់ចំនួន៦គ្រាប់ បង់សម្រាប់ដាក់គ្រាប់១ និងកាំបិតចិតបន្លែ១ទៀត ដែលជនសង្ស័យបានលាក់ទុកនៅក្បែរស្រះទឹក ។
ពាក់ព័ន្ធនឹងបញ្ហានេះ បច្ចុប្បន្នជនរងគ្រោះកំពុងសម្រាកព្យាបាលនៅមន្ទីរពទ្យ រីឯជនសង្ស័យ ត្រូវឃាត់ខ្លួននៅអធិការដ្ឋាននគរបាលស្រុកសាលាក្រៅ ដើម្បីកសាងសុំណុំរឿងបញ្ជូនទៅតុលាការឱ្យឃាត់ខ្លួនតាមនីតិវិធី ៕
ចែករំលែកព័តមាននេះ