ខេត្តរតនគិរី ៖ មជ្ឈដ្ឋានអ្នកតាមដានមានចម្ងល់ថា សមត្ថកិច្ចបង្ក្រាបឈើ ដែលក្រុមឈ្មួញប្រមូលលាក់ទុកសម្រាប់បន្លំជាមួយលិខិតអនុញ្ញាត(PC)ឈើរបស់ក្រុមហ៑ុន SKឥណ្ឌានេះ បែរជាយកទៅដាក់នៅក្នុងក្រុមហ៑ុននោះដដែល មិនខុសអីពីយកស្ករទៅផ្ញើស្រមោចនោះទេ តែចម្ងល់នេះ មិនមានមន្ត្រីណាមួយបកស្រាយបំភ្លឺនៅឡើយទេ ។
គួរបញ្ជាក់ថា គំនរឈើរាប់រយដុំ ដែលក្រុមឈ្មួញដឹកជញ្ជូនពីព្រៃធម្មជាតិខាងជើងវារីអគ្គិសនីសេសានក្រោម២ ក្នុងភូមិសាស្ត្រខេត្តស្ទឹងត្រែង យកទៅលាក់ទុកនៅព្រៃក្បែរក្រុមហ៑ុនSK ឥណ្ឌា មានទីតាំងក្នុងឃុំត្រពាំងក្រហម ស្រុកកូនមុំ ដែលនៅសេសសល់ពីការបង្ក្រាបបានប្រមាណ២គោយន្តតូចៗនោះ ត្រូវបានកម្លាំងបង្ក្រាបចុះរឹបអូសបន្ថែមទៀតហើយ កាលពីព្រឹកថ្ងៃ២៥ តុលា ។
តាមប្រភពព័ត៌មានឱ្យដឹងថា កម្លាំងមូលដ្ឋានកងរាជអាវុធហត្ថស្រុកកូនមុំ ដឹកនាំដោយលោកវរសេនីយ៍ត្រី រស់ វណ្ណា មេបញ្ជាការ សហការជាមួយកម្លាំងស្ថាប័នជំនាញពាក់ព័ន្ធ និងដោយមានការសម្របសម្រួលពីលោក ជា ពេជ្រ ព្រះរាជអាជ្ញាអមសាលាដំបូងខេត្ត ។
ក្នុងការចុះបង្ក្រាបជាក់ស្តែង រឹបអូសឈើប្រភេទសុក្រំនិងកកោះចំនួន១៦៧ដុំ(ពុំមានម្ចាស់) ដែលបានយកមកលាក់ទុក នៅត្រង់ចំណុចនិយាមកាលេខX0677895.Y151400 ខាងលិចភ្នំត្រងោល ភូមិ៣ ឃុំត្រពាំក្រហម ស្រុកកូនមុំ និងត្រូវបានដឹកជញ្ជូនយកមករក្សាទុកនៅក្នុងក្រុមហ៊ុនSKឥណ្ឌា ជាបណ្តោះអាសន្ន ដើម្បីចាត់ការតាមនីតិវិធី ។
ចែករំលែកព័តមាននេះ