រាជធានីភ្នំពេញ ៖ ការប្រកួតប្រដាល់ដណ្ដើមពានជើងឯកក្នុងប្រភេទទម្ងន់៥៧គីឡូក្រាមនៅក្នុងព្រឹត្តិការណ៍កំពូលអ្នកប្រយុទ្ធកណ្ដាប់ដៃដែកនៅលើសង្វៀនទូរទស្សន៍ស៊ីអិនស៊ីនាថ្ងៃអាទិត្យ ទី២៨ តុលា បានឈានចូលដល់សប្ដាហ៍ទី៣ហើយ ។ អ្នកនិយមទស្សនាកីឡាប្រដាល់ភាគច្រើនកំពុងតែទន្ទឹងរង់ចាំមើលថាតើកីឡាករកម្ពុជាទាំងពីររូបអាចសម្រេចគោលដៅរបស់ខ្លួនឬយ៉ាងណា ខណៈកីឡាករថៃដែលពួកគេត្រូវជួបនាពេលនេះហាក់មានសមត្ថភាពខ្លាំងពិបាកផ្ដួលអ៊ីចឹងនោះ។
កីឡាករសុខ ធី មកពីក្លិបសាន់យ៉ាន់នាគា បង្ហាញទំនុកចិត្តខ្ពស់ពេលជួបប្រកួតជាមួយកីឡារជើងខ្លាំងថៃឈ្មោះធ្នូសឹកឡេក ហ្វាន់មឿង ទោះបីកីឡាករថៃរូបនេះមានបទពិសោធន៍ប្រកួតយូរឆ្នាំមកហើយក្ដី ។ សុខ ធី និយាយថាតាមដឹងកីឡាករថៃជាដៃគូប្រកួតរបស់លោក គឺជាជើងខ្លាំងលំដាប់ជួរមុខមួយរូបនៅក្នុងប្រទេសថៃ មិនតែប៉ុណ្ណោះ គេឡើងសង្វៀនប្រកួតតាំងពីលោកមិនទាន់ចេះវ៉ៃម៉្លេះ ។
ទោះបីយ៉ាងណា កីឡាករថៃរូបនេះវ័យរាងជ្រេបន្តិចទៅហើយ កម្លាំងក៏ធ្លាក់ចុះជាងមុនទៀត ទើបលោកសង្ឃឹមច្រើនក្នុងការស្វែងរក៣ពិន្ទុបន្ថែមពីការប្រកួតលើកនេះ ។ គូនេះឆ្លងកាត់ការប្រកួតម្នាក់១លើកថែមទាំងអាចរកបាន៣ពិន្ទុដូចគ្នាទៀតផង ។ ដូច្នេះសម្រាប់សុខ ធី បើទោះជាគេមានជំនឿចិត្តខ្ពស់ក្នុងការដណ្ដើមយក៣ពិន្ទុពីកីឡាករថៃក៏ប្រហែលជាមិនងាយស្រួលប៉ុន្មានដែរ។
មួយគូទៀត កីឡាករ តាញ់ មករា មកពីសមាគមកីឡាប្រដាល់ក្រសួងការពារជាតិបង្ហាញក្រឡាទៅមិនរួចសោះឡើយពេលជួបប្រកួតជាមួយកីឡាករថៃ សុផាណយ ស.ច.ពៀកអ៊ុថៃ លើកនេះ ។ កីឡាករថៃម្នាក់នេះ មានថ្វីដៃប្រកួតល្អខ្លាំងណាស់ជាពិសេសស្នៀតជើងរបស់គេតែម្ដងដែលទាត់ចេញបានលឿននិងមានទម្ងន់ធ្ងន់ទៀតផង ។ ឯតាញ់ មករាអត់មានស្នៀតអីដែលពិសេសដើម្បីយកឈ្នះលើកីឡាករថៃម្នាក់នេះបានឡើយ ។ ទាំងមាឌ កម្ពស់ និងល្បិចប្រយុទ្ធសុទ្ធតែចាញ់ប្រៀបកីឡាករថៃដាច់ទាំងអស់បើយោងលើប្រវត្តិនិងការឡើងសង្វៀនបាន១លើកនៅក្នុងព្រឹត្តិការណ៍នេះហើយទទួលបរាជ័យដូចគ្នាក៏ដោយ។
ដោយឡែកសម្រាប់គូប្រកួតមិត្តភាពអន្តរជាតិនៅលើសង្វៀនដដែលកីឡាករ ផាន់ គ្រាន់មកពីក្លិបមកុដរាជសីហ៍ ត្រូវជួបប្រកួតជាមួយកីឡាករថៃឈ្មោះ ឆាតឆាយ ស៊ីតប៉ា ក្នុងប្រភេទទម្ងន់៦៣,៥គីឡូក្រាម ។ គូនេះ សុទ្ធតែជាអ្នកប្រដាល់មានបទពិសោធន៍ប្រកួតនៅលើសង្វៀនក្រាស់ក្រែលដូចគ្នាប៉ុន្តែមិនធ្លាប់ជួបគ្នាពីមុនមកឡើយ ។
ទោះបីយ៉ាងណា អ្នកគាំទ្រភាគច្រើនហាក់មានជំនឿចិត្តលើផាន់ គ្រាន់ ច្រើនជាង ។ ផាន់ គ្រាន់ មានប្រវត្តិប្រកួតរហូតដល់ទៅ១១៨ដង ឈ្នះ៩១ដង ស្មើ២ដង ចាញ់១៥ដង និងធ្លាប់ផ្ដួលគូប្រកួតឱ្យសន្លប់បាន២៣ដង ខណៈកីឡាករថៃធ្លាប់ប្រកួតបាន៩២ដង ឈ្នះ៧៥ដង ស្មើ២ដង ចាញ់១៥ដង និងធ្លាប់ផ្ដួលគូប្រកួតឱ្យសន្លប់បាន២៨ដង៕
ចែករំលែកព័តមាននេះ