ខេត្តកំពត ៖ ខេត្តកំពតដែលស្ថិតនៅភាគនិរតីនៃប្រទេសកម្ពុជា និងជាខេត្តជាប់សមុទ្រដ៏ស្រស់ស្អាតមួយផងដែរនោះ ពេលនេះកាន់តែមានសក្ដានុពលទាក់ទាញទាំងភ្ញៀវទេសចរ អ្នកវិនិយោគជាតិ និងអន្តរជាតិ មកទស្សនាកម្សាន្ដ និងបណ្ដាក់ទុនវិនិយោគកើនឡើងជាបន្ដបន្ទាប់ ។
កំណើនទេសចរណ៍ និងការវិនិយោគនៅខេត្តនេះ ដោយសារតែខេត្តមានផលិតផលទេសចរណ៍ជាច្រើន ពិសេសនោះទីតាំងភូមិសាស្ត្ររបស់ខេត្តមួយនេះក៏មិនខុសពីខេត្តព្រះសីហនុប៉ុន្មានដែរ ។
បើតាមលោក សយ ស៊ីណុល ប្រធានមន្ទីរទេសចរណ៍ខេត្តកំពត បានមានប្រសាសន៍ថា សព្វថ្ងៃនេះ ខេត្តមានរមណីយដ្ឋានសរុប១៧កន្លែងដែលកំពុងទាក់ទាញភ្ញៀវទេសចរជាតិ និងអន្តរជាតិមកទស្សនាកម្សាន្ដ ។ លោកប្រធានមន្ទីរទេសចរណ៍ បានបន្ដថា បច្ចុប្បន្ននេះខេត្តបានរៀបចំ ឬកំណត់ចេញនូវខ្សែទស្សនកិច្ចជាកញ្ចប់ចំនួន៤សំខាន់ៗ រួមមាន ១/ដំណើរទស្សនកិច្ចផ្នែកឦសាននៃទីរួមខេត្តកំពត។ ២/ដំណើរទស្សនកិច្ចក្នុងក្រុងកំពត ដែលជាតំបន់មានសំណង់បេតិកភ័ណ្ឌ។ ៣/ ដំណើរទស្សនកិច្ចតំបន់ដងព្រែកទឹកឈូ និងតំបន់ព្រែកកំពត និង៤/ដំណើរទស្សនកិច្ចតំបន់ភាគខាងលិចក្រុងកំពត រួមជាមួយតំបន់រមណីយដ្ឋានឋានសួគ៌បូកគោ ។ លោកប្រធានមន្ទីរ បានអះអាងថា ៖« កាលពីឆ្នាំ២០១៧កន្លងទៅ ខេត្តកំពតទទួលបានភ្ញៀវទេសចរជាតិ និងអន្តរជាតិប្រមាណ១,៥លាននាក់ ក្នុងនោះភ្ញៀវទេសចរអន្តរជាតិប្រមាណ១០% ។ ដោយឡែកក្នុងរយៈពេល១០ខែឆ្នាំ២០១៨នេះ ភ្ញៀវទេសចរបានកើនក្នុងរង្វង់ប្រមាណ២% បើធៀបនឹងរយៈពេលដូចគ្នានៃឆ្នាំមុន »។
លោកប្រធានមន្ទីរក៏បានឲ្យដឹងដែរថា តាមគម្រោង ខេត្តនឹងរៀបចំឲ្យមានតំបន់ឆ្នេរខ្សាច់បន្ថែមទៀត ខណៈបច្ចុប្បន្ន បើទោះជាខេត្តមានឆ្នេរសមុទ្រក៏ពិតមែន ប៉ុន្តែបច្ចុប្បន្ននេះពុំមានឆ្នេរខ្សាច់សម្រាប់កម្សាន្តនោះទេ ។ លោកបញ្ជាក់ថា ៖« ការបង្កើតឲ្យមានតំបន់ឆ្នេរខ្សាច់ដែលជាផលិតផលទេសចរណ៍ថ្មីសម្រាប់ខេត្ត គួបផ្សំនឹងការបង្កើតកំពង់ផែខ្នាតអន្តរជាតិដែលគ្រោងបញ្ចប់ការសាងសង់នៅអំឡុងឆ្នាំ២០២០នោះ គឺអាចនិយាយថា ផលិតផលទេសចរណ៍ថ្មីទាំងពីរនេះ នឹងទាក់ទាញភ្ញៀវទេសចរមកកាន់ខេត្តកំពតកាន់តែច្រើនជាងនេះថែមទៀតនៅប៉ុន្មានឆ្នាំខាងមុខ »។
យ៉ាងនេះក្ដី លោកក៏បានអំពាវនាវដល់ប្រជាពលរដ្ឋ ក៏ដូចជាភ្ញៀវជាតិអន្តរជាតិ សូមបន្ដអញ្ជើញមកសម្សាកកម្សាន្តនៅតាមរមណីយដ្ឋាននានាក្នុងខេត្តកំពត ហើយកុំព្រួយបារម្ភអំពីសន្តិសុខ សណ្តាប់ធ្នាប់ ឬក៏សេវាកម្មនានា ព្រោះទាំងថ្នាក់ដឹកនាំខេត្ត មន្ទីរជំនាញ អាជ្ញាធរមូលដ្ឋាន រួមទាំងកងកម្លាំងទាំងអស់បានសហការរៀបចំបានល្អប្រសើរគ្រប់ទីកន្លែង ដោយមិនឲ្យប៉ះពាល់ដល់អារម្មណ៍ភ្ញៀវទេសចរនោះឡើយ ។
រយៈពេលពីរបីឆ្នាំចុងក្រោយនេះ ខេត្តកំពតពិតជាមានសកម្មភាពសេដ្ឋកិច្ចរីកចម្រើនប្រសើរជាងមុន ដោយមានទាំងភ្ញៀវទេសចរ, វិនិយោគិនជាតិ និងអន្តរជាតិ បានចូលមកកម្សាន្ដ និងស្វែងរកទិញដីត្រៀមដើម្បីវិនិយោគនៅពេលអនាគត ។
ស្ថាបនិក និងជាប្រធានក្រុមហ៊ុន Blue Star Realty លោក កែវ សុជាតិ បានឲ្យដឹងថា បន្ទាប់ពីមានគម្រោងអភិវឌ្ឍន៍ធំៗមួយចំនួននៅក្នុងខេត្តកំពតចាប់ផ្ដើមដំណើរការ ដូចជាកំពង់ផែទេសចរណ៍អន្តរជាតិ ដែលបានចាប់ផ្ដើមសាងសង់នោះ បានធ្វើឲ្យអ្នកវិនិយោគហាក់បង្ហាញពីភាពជឿជាក់ និងបន្ថែមការបណ្ដាក់ទុនកាន់តែច្រើននៅខេត្តមួយនេះ ។ លោកសុជាតិ បន្ដថា ៖« សព្វថ្ងៃនេះ គេឃើញមានវិនិយោគិនបរទេសជាច្រើន ពិសេសវិនិយោគិនចិន បានមកចងមុងចាំវិនិយោគស្រាប់ទៅហើយ ស្របពេលការវិនិយោគក្នុងខេត្តព្រះសីហនុកំពុងមានសន្ទុះខ្លាំង ហើយវិនិយោគិនទាំងនោះអាចនិយាយថា បានហៀរពីខេត្តព្រះសីហនុមក »។ លោកថា ៖« យើងបានពិនិត្យមើលលំហូរអ្នកវិនិយោគជនជាតិចិន ឃើញមកជួលសណ្ឋាគារ និងផ្ទះសំណាក់ច្រើននៅខេត្តកំពត ដើម្បីរង់ចាំឱកាសវិនិយោគនៅពេលវេលាមកដល់ »។
លោក សុខ គែន អ្នកគ្រប់គ្រងក្រុមហ៊ុន Kampot Property ក៏បានឲ្យដឹងដែរថា សក្ដានុពលសម្រាប់ទឹកដីខេត្តកំពត ទាំងពេលបច្ចុប្បន្ន និងទៅអនាគត អ្វីដែលសំខាន់នោះ គឺវិស័យទេសចរណ៍ ដូចនេះហើយអ្នកវិនិយោគដែលមកបណ្ដាក់ទុនក្នុងខេត្តនេះភាគច្រើន គឺផ្ដោតលើវិស័យទេសចរណ៍ ។លោកបន្ដថា ៖« បច្ចុប្បន្ន មានអ្នកបោះទុនទិញដីសម្រាប់ត្រៀមសង់ជាផ្ទះលំហែកាយ ជារីសត និងបឹងហ្កាឡូជាដើម ដើម្បីត្រៀមស្វាគមន៍ភ្ញៀវទេសចរអន្តរជាតិ ដែលនឹងមកដល់ក្នុងពេលឆាប់ៗនេះ ជាពិសេសនៅពេលគម្រោងកំពង់ផែអន្តរជាតិត្រូវបានសាងសង់រួច »។
ចក្ខុវិស័យនៅថ្ងៃអនាគត ខេត្តជាប់មាត់សមុទ្រទាំងអស់របស់កម្ពុជា នឹងមានការរីកចម្រើនខ្លាំងដោយសារផលប្រយោជន៍នៃគោលនយោបាយ «ខ្សែក្រវាត់មួយ ផ្លូវមួយ» របស់ប្រទេសចិន ដែលបានកំណត់យកខេត្តជាប់សមុទ្រទាំង៤ខេត្តជាផ្លូវសូត្រ ដែលជាផ្លូវស្របតាមមាត់សមុទ្រពីខេត្តកោះកុង រហូតដល់ខេត្តកែប ដែលអាចនឹងចាប់ផ្តើមស្ថាបនានៅពេលអនាគត ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ