ខេត្តកំពង់ឆ្នាំង ៖ លោកឧត្តមសេនីយ៍ទោ ធន់ ធឿន មេបញ្ជាការតំបន់ប្រតិបត្តិការសឹករងកំពង់ឆ្នាំង និងជាប្រធានក្រុមការងារដឹកនាំទូក ងទេពធីតាសែនជ័យបារមីមានរិទ្ធ បានមានប្រសាសន៍ថា ទូកងក្រុងកំពង់ឆ្នាំងឈ្មោះទេពធីតាសែនជ័យបារមីមានរិទ្ធ…
ខេត្តកំពង់ឆ្នាំង ៖ លោកឧត្តមសេនីយ៍ទោ ធន់ ធឿន មេបញ្ជាការតំបន់ប្រតិបត្តិការសឹករងកំពង់ឆ្នាំង និងជាប្រធានក្រុមការងារដឹកនាំទូក ងទេពធីតាសែនជ័យបារមីមានរិទ្ធ បានមានប្រសាសន៍ថា ទូកងក្រុងកំពង់ឆ្នាំងឈ្មោះទេពធីតាសែនជ័យបារមីមានរិទ្ធ គឺបានជួសជុលរួចរាល់ ហើយត្រៀមនឹងចូលរួមប្រកួតនៅក្នុងពិធីបុណ្យអុំទូកអកអំបុកសំពះព្រះខែខាងមុខនេះ ។
លោកឧត្តមសេនីយ៍ទោ បានបន្តថា ការជួសជុលលើកនេះគឺបានទាំងសោភ័ណភាពនិងមាំជាងមុន ដោយ
សារតែមានជាងដ៏ចំណានដែលយើងជួលមក តែតម្លៃនៃការជួសជុលអស់ជាង៦ពាន់ដុល្លារ ទើបធ្វើអោយទូកឆ្នាំនេះ ស្អាត និងរឹងមាំល្អជាងឆ្នាំមុន ហើយសង្ឃឹមថានិងទទួលជ័យជំនះជាមិនខាន។
លោកក៏បានបញ្ជាក់ដែរថា ទូកងទេពធីតាសែនជ័យបារមីមានរិទ្ធ ដែលបានដាក់ដំកល់នៅក្នុងវត្តទេពធីតារាមហៅវត្តទេពស្ថិតក្នុងសង្កាត់ផ្សារឆ្នាំង ក្រុងកំពង់ឆ្នាំងនេះ និងចុះទឹកដើម្បិហ្វឹកហាត់នៅថ្ងៃទី ១ ខែវិច្ឆិកាខាងមុខនេះ ។
ជាមួយគ្នានេះដើម្បីឲ្យដឹងពីគុណភាពនិងល្បឿន របស់ទូក ង យើងនឹងត្រូវហាត់សមសាកល្បងជាមួយទូក ហនុមាន មានរិទ្ធ និងទូកសារាយអណ្ដែតផងដែរ ព្រោះថា ការហ្វឹកហាត់សមជើង បើធ្វើតែឯង គ្មានគូប្រកួត គឺមិនដឹងនោះទេ លុះត្រាតែមានដៃគូប្រកួតទើបដឹងថាខ្លាំងឬខ្សោយ។
លោកបានបញ្ជាក់ថា ដើម្បីទទួលបានជោគជ័យក្នុងការប្រកួត កីឡាករត្រូវមានជំនាញក្នុងការចែវ កន្លងទៅ យើងបានជ្រើសយកកីឡាករល្អៗពីក្រុមហនុមាន មានរិទ្ឋ៤ទៅ៥នាក់មកដាក់លាយជាមួយក្រុមកីឡាកររបស់យើង ទើបទទួលជ័យជំនះ ព្រោះថា ចែវមិនចេះតែចែវៗ នោះទេ គឺទាមទារការប៉ិនប្រសប់ និងមានជំនាញទៀតផង។
ជាមួយគ្នានេះពេលហ្វឹកហាត់សាកល្បង ក៏ត្រូវការថវិកាសំរាប់កីឡាករផងដែរដែលតិចណាស់ក្នុងម្នាក់ក៍ ២ ម៉ឺនរៀលដែរសម្រាប់មួយថ្ងៃ ដែលពេលនេះលោកកំពុងតែរកជំនួយសប្បុរសជននានាដើម្បីជួយឧបត្ថម្ភ ។
ក្នុងនាមលោកជាប្រធានក្រុមដឹកនាំទូកងទេពធីតាសែនជ័យ ក៏សូមអំពាវនាវសប្បុរសជននានា ពិសេសអ្នកនៅក្នុងកំពង់ឆ្នាំង និង មន្ត្រីរាជការ ជាដើម សូមមេត្តាជួយឧបត្ថម្ភដល់ទូកងនេះផង។
សូមបញ្ជាក់ថា ទូកងឈ្មោះ ទេពធីតាសែនជ័យ បារមីមានរិទ្ឋ ជាប្រភេទទូកចែវបុរស មានប្រវែងជាង៣៥ម៉ែត្រ មានចំណុះជើងចែវ ៥៦នាក់ ប៉ុន្តែបើសរុបទាំងកីឡាករបំរុង រួមនឹងគណៈកម្មការ អ្នកដាំស្ល គឺមានកម្លាំងសរុបជិត៨០នាក់ សម្រាប់ទៅចូលរួមប្រកួតថ្នាក់ជាតិ ជារៀងរាល់ឆ្នាំ៕
ចែករំលែកព័តមាននេះ