ខេត្តតាកែវ ៖ ខេត្តតាកែវជាខេត្តមួយមានភ្នំមិនច្រើនប៉ុន្មានទេ បើប្រៀបធៀបទៅខេត្តជិតខាងដូចជាខេត្តកំពត ខេត្តកំពង់ស្ពឺ ។ ដោយមានព្រំប្រទល់ជាប់ជាមួយនឹងខេត្តអាងយ៉ាង ប្រទេសវៀតណាម ខេត្តមួយនេះមានស្រុក៩ និងក្រុង១…
ខេត្តតាកែវ ៖ ខេត្តតាកែវជាខេត្តមួយមានភ្នំមិនច្រើនប៉ុន្មានទេ បើប្រៀបធៀបទៅខេត្តជិតខាងដូចជាខេត្តកំពត ខេត្តកំពង់ស្ពឺ ។ ដោយមានព្រំប្រទល់ជាប់ជាមួយនឹងខេត្តអាងយ៉ាង ប្រទេសវៀតណាម ខេត្តមួយនេះមានស្រុក៩ និងក្រុង១ មានប្រជាពលរដ្ឋរស់នៅប្រមាណជាង១លាននាក់ ក្នុងនោះប្រជាពលរដ្ឋធ្វើស្រែចម្ការ និងកម្មករមានប្រមាណ៦០ភាគរយ ។ អាជីវករប្រមាណ២០ភាគរយ និងមន្ត្រីរាជការ និងសមត្ថកិច្ចប្រមាណ២០ភាគរយ ។
ខេត្តតាកែវជាទឹកដីដ៏ចំណាស់កន្លែងកកើតរដ្ឋខ្មែរដំបូងអតីត«នគរភ្នំ»មានរាជធានីតាំងនៅ តំបន់អង្គរបុរី ។
លោកវរសេនីយ៍ឯកយ៉ុគ សារ៉ាត់ អធិការនគរបាលស្រុកគិរីវង់ ហើយក៏ជាស្រុកកំណើតរបស់លោកផងនោះបាននិយាយរៀបរាប់កាលពីពេល ថ្មីៗកន្លងមកថា នៅក្នុងស្រុកគិរីវង់សម្បូរណាស់ព្រៃភ្នំ និងមានលក្ខណៈស្មុគស្មាញថែមទៀតផង ហើយភ្នំទាំងអស់នោះមាន ១-ភ្នំបាយ៉ង់កោរ ២-ភ្នំតូច ៣-ភ្នំនាងសក់ក្រអូប ៤-ភ្នំឆ្មា ៥-ភ្នំដំរីលុក ៦-ភ្នំព្រះស្បកលើ ៧-ភ្នំដុំស្វាយគយ ៨-ភ្នំក្រពើ
៩-ភ្នំចង្កៀង ១០-ភ្នំជាវប្តី ១១-ភ្នំព្រះស្បកក្រោម ១២-ភ្នំវាលរវៀង ១៣-ភ្នំមហាសី ១៤-ភ្នំជីតាពេជ ១៥-ភ្នំជ្រូក ១៦-ភ្នំរន្ទះ ១៧-ភ្នំច្រោង ១៨-ភ្នំគោ ១៩-ភ្នំអាលេត ២០-ភ្នំអកមួង ២១-ភ្នំឌិន និង២២-ភ្នំធំ ។ ចំណែកស្រុកទ្រាំងវិញមានភ្នំចំនួនពីរគឺ១-ភ្នំខ្លៃង និង២-ភ្នំសន្លុង ។
លោកសាយ វណ្ណៈ អភិបាលរងស្រុកត្រាំកក់ ឱ្យដឹងថា នៅស្រុកនេះមានភ្នំចំនួន១០ គឺ១-ភ្នំទទឹង ២-ភ្នំពាំង ៣-ភ្នំសូន្យសារ ៤-ភ្នំកកោក ៥-ភ្នំអស់លោក ៦-ភ្នំអស់លោកធំ ៧-ភ្នំឡានឆេះ ៨-ភ្នំចម្ការសៀង ៩-ភ្នំពាក់បង្កង់ ១០-ភ្នំដំរីរមៀល ។ នៅស្រុកបាទី មានបីភ្នំ គឺ១-ភ្នំតាម៉ៅ ២-ភ្នំ ចំបាប់ និង៣-ភ្នំទទា ។ ស្រុកសំរោង មានតែមួយទេឈ្មោះភ្នំជីសូរ ។ ស្រុកអង្គរបុរី មានភ្នំចំនួនពីរ គឺ១-ភ្នំអង្គរបុរី ២-ភ្នំដារ ។ សរុបទាំងអស់នៅក្នុងទឹកដីអាណាចក្រតាកែវមានភ្នំតូចធំចំនួន៣៨ភ្នំ ។
តាមការស្រាវជ្រាវរបស់កោះសន្តិភាព ភ្នំទាំងអស់ក្នុងខេត្តតាកែវ មិនទាន់មានការសិក្សាស្រាវជ្រាវ និងអភិរក្សជាផ្លូវការណាមួយនៅឡើយទេ ។ អាចនៅមានភ្នំច្រើនទៀតដែលពុំស្គាល់ដល់ ព្រោះស្រុកខ្លះមានភ្នំច្រើន ស្ថិតក្នុងជួរភ្នំដ៏វែងអន្លាយឆ្លងដល់ខេត្តជិតខាង និងដល់ប្រទេសវៀតណាម ។ ការរៀបរាប់កត់ត្រាពីភ្នំដូចជម្រាបខាងលើ ចាត់ទុកជាឯកសារក្រៅផ្លូវការដែលកោះសន្តិភាពព្យាយាមស្រាវជ្រាវ និងកត់ត្រា វាប្រសើរជាងគ្មានការតាមដានស្រាវជ្រាវ ។
ចែករំលែកព័តមាននេះ