សហរដ្ឋអាមេរិក-ប៉ាគីស្ថាន ៖ រដ្ឋមន្ត្រីការបរទេសអាមេរិកលោក MIKE POMPEO កាលពីថ្ងៃទី២៣ តុលា បានអំពាវនាវជាថ្មីដល់ប៉ាគីស្ថានឲ្យផ្ដាច់ខ្លួនឈប់ទាក់ទងជាមួយពួកជ្រុលនិយម ដែលកំពុងតែប្រយុទ្ធនៅអាហ្វហ្គានីស្ថាន ដោយអះអាងថា ប្រទេសលោកនឹងស្នើដល់ក្រុងអ៊ីស្លាម៉ាបាដឲ្យគិតគូរដល់រឿងនោះ។
លោក MIKE POMPEO ថ្លែងបែបនេះដោយសម្ដែងការអបអរសាទរ ចំពោះការបោះឆ្នោតសភាដែលគេរង់ចាំតាំងពីយូរមកហើយនៅអាហ្វហ្គានីស្ថាន។ លោកថា សហរដ្ឋអាមេរិកទទួលការលើកទឹកចិត្តចំពោះអត្រាអ្នកចូលរួមបោះឆ្នោតដែលមានខ្ពស់គួរសម ទោះជាមានព័ត៌មាននានាពីបណ្ដាបញ្ហាអំឡុងពេលនៃការបោះឆ្នោតនោះក្ដី។
លោកបន្តថា អ្វីដែលយើងចង់បាន គឺសូមឲ្យប៉ាគីស្ថានកុំឲ្យពួកភេរវករជ្រកកោន នៅតាមបណ្ដោយព្រំដែនភាគខាងលិចរបស់ខ្លូន។ គ្រប់គ្នាសុទ្ធតែចង់ឲ្យមានការបង្រូបបង្រួមមួយនៅអាហ្វហ្គានីស្ថាន ហើយឲ្យសម្រេចបានបែបនេះ គេមិនត្រូវឲ្យពួកតាលីបង់ ពួក HAQQANI ឬពួកឯទៀតៗជ្រកកោនខាងក្នុងប៉ាគីស្ថានឡើយ។
រដ្ឋាភិបាលរបស់លោកដូណាល់ ត្រាំ បានសម្រេចកាលពីខែកញ្ញា ផ្អាកជំនួយប្រមាណជា៣០០លានដុល្លារសន្យាផ្ដល់ឲ្យប៉ាគីស្ថាន។ ក្រុងវ៉ាស៊ិនតោនចោទប្រកាន់បណ្ដាអ្នកទទួលខុសត្រូវប៉ាគីស្ថានថា ធ្វើមិនដឹងមិនឮ រហូតដល់រួមសហការជាមួយបណ្ដាក្រុមជីហាដ ដែលធ្វើការវាយប្រហារនៅអាហ្វហ្គានីស្ថាន ចេញពីបណ្ដាមូលដ្ឋានខាងក្រោយរបស់ពួកគេនៅតាមបណ្ដោយព្រំដែនរវាងប្រទេសទាំង២។
ក្រុមទាំងនេះគំរាមកំហែងរដ្ឋាភិបាលអាហ្វហ្គានីស្ថាន ជួយទ្រទ្រង់ដោយសហរដ្ឋអាមេរិក ហើយវាយប្រហារ ព្រមទាំងសម្លាប់កងទាហានអាមេរិក មានវត្តមាននៅអាហ្វហ្គានីស្ថានជាច្រើនលើក តាំងពីក្រោយការវាយប្រហារភេរវកម្មថ្ងៃទី១១កញ្ញាឆ្នាំ២០០១មក៕
ចែករំលែកព័តមាននេះ