ទីក្រុងហុងកុង ៖ ធនាគារជុំវិញពិភពលោកដែលរួមមាន Citigroup និង Standard Chartered បានស្នើដល់បុគ្គលិករបស់ពួកគេឲ្យពន្យារពេល ឬពិចារណាឡើងវិញលើការធ្វើដំណើរទៅកាន់ប្រទេសចិន បន្ទាប់ពីមន្ត្រីទទួលបន្ទុកក្នុងប្រទេសចិនហាមមិនឲ្យអ្នកធ្វើការក្នុងធនាគារ UBS ចាកចេញពីប្រទេសចិន ។
BNP Paribas និង JPMorgan ក៏បានប្រាប់ដល់បុគ្គលិករបស់ខ្លួនឲ្យពិចារណាលើការធ្វើដំណើរទៅកាន់ប្រទេសចិនដែរ ។ ធនាគារ Julius Baerវិញ បានប្រាប់ដល់បុគ្គលិកឲ្យមានការប្រុងប្រយ័ត្នពីផែនការធ្វើដំណើរទៅកាន់ប្រទេសចិនដូចគ្នាដែរ ។
គួរបញ្ជាក់ផងដែរថា អាជ្ញាធរក្នុងប្រទេសចិនស្នើដល់បុគ្គលិកធ្វើការក្នុងធនាគារ UBS ម្នាក់ឲ្យពន្យារពេលធ្វើដំណើរទៅកាន់ប្រទេសខ្លួនវិញ និងឲ្យបន្តនៅក្នុងប្រទេសចិនដើម្បីជួបជាមួយនឹងអាជ្ញាធរក្នុងតំបន់នាសប្តាហ៍នេះ ។ គោលបំណងនៃការប្រជុំនេះនៅមិនទាន់ច្បាស់នៅឡើយទេ ។
ប៉ុន្តែភាពមិនប្រាកដប្រជានេះបានបង្កឲ្យធនាគារជាដៃគូប្រជែងជាច្រើនទាមទារឲ្យបុគ្គលិកធនាគាររបស់ពួកគេមានការប្រុងប្រយ័ត្នក្នុងការពិចារណាលើគម្រោងធ្វើដំណើរទៅកាន់ប្រទេសចិន ។
ការប្រុងប្រយ័ត្ននេះបង្ហាញពីហានិភ័យទាក់ទិននឹងធនាគារឯកជនក្នុងការស្វែងរកឱកាសធំជាងគេលើពិភពលោកក្នុងវិស័យគ្រប់គ្រងទ្រព្យសម្បត្តិ ។
ប្រទេសចិន គឺជាកត្តាជំរុញដ៏សំខាន់នៃវិស័យនេះនៅអាស៊ីដោយមានសេដ្ឋី និងមហាសេដ្ឋីជាច្រើនកើតមានឡើងក្នុងវិស័យបច្ចេកវិទ្យា ប៉ុន្តែវិស័យហិរញ្ញវត្ថុរបស់ប្រទេសនេះនៅមានភាពរឹតបន្តឹងខ្ពស់នៅឡើយ ខណៈដែលប្រទេសចិនចង់កាត់បន្ថយកម្រិតឥណទានក្នុងសេដ្ឋកិច្ច និងកាត់បន្ថយលំហូរធនធានចេញពីប្រទេស ដើម្បីបង្កើនតម្លៃប្រាក់យន់ ៕
ចែករំលែកព័តមាននេះ