គណៈកម្មាធិការអន្តរជាតិនៃកាកបាទក្រហម (ICRC) បានផ្ដួចផ្ដើមបង្កើតអោយមានយុទ្ធនាការរៃអង្គាសប្រាក់ជាសកលមួយ ក្នុងគោលបំណងជួយឧបត្ថម្ភសាងសង់ដំបូលរានបាល់បោះ ជូននារីបាល់បោះរទេះជនពិការ ស្ថិតក្នុងមណ្ឌលស្ដារលទ្ធភាពពលកម្មកាយសម្បទា ក្នុងខេត្តបាត់ដំបង។ ICRC មានគោលបំណងរៃអង្គាសប្រាក់ចំនួន ៩ម៉ឺន៥ពាន់ដុល្លារសហរដ្ឋអាមេរិក ហើយយុទ្ធនាការរៃអង្គាសប្រាក់នេះនឹងដំណើរការទៅក្នុងរយៈពេល៤៥ថ្ងៃ ដែលគិតចាប់ពីថ្ងៃទី២៤ ខែតុលា ដល់ថ្ងៃទី០៨ ខែធ្នូ ឆ្នាំ២០១៨នេះ។ នេះបើយោងតាមប្រកាសព័ត៌មានរបស់ ICRC ។
ប្រកាសព័ត៌មានរបស់ ICRC ដដែលបានបញ្ជាក់ថា ក្រុមបាល់បោះរទេះនារីកម្ពុជាមានសមា ជិកចំនួន ២២រូប ដែលក្នុងនោះមានអាយុចាប់ពី២២ ដល់៣៥ឆ្នាំ។ សមាជិកខ្លះពិការ ដោយសារគ្រាប់មីន ខ្លះទៀតពិការដោយសារជំងឺ ឬហៅកាត់ថាប៉ូលីយ៉ូ ដោយសារកង្វះការទទួលបានវ៉ាក់ស៊ាំងក្នុងប្រទេស។ កីឡាបាល់បោះបានកែប្រែជីវិតរបស់ពួកគេ។ ពោរពេញទៅដោយទំនុកចិត្ត ពួកគេបានអោយដឹងថា កីឡានេះមិនត្រឹមតែបានផ្លាស់ប្ដូរជីវិតគេអោយទៅជាអត្តពលិកប៉ុណ្ណោះទេ ប៉ុន្តែថែមទាំងធ្វើឲ្យពួកគេក្លាយទៅជាមនុស្សមានតម្លៃផងដែរ។
ជាទីអំណរគុណដល់ការតាំងចិត្តដ៏មោះមុតរបស់ពួកគេ ក្រុមបាល់បោះរទេះនារីកម្ពុជាមានសមត្ថភាពក្នុងការចូលរួមប្រកួតអន្តរជាតិ អាស៊ាន ប៉ារ៉ា ហ្គេម នាទីក្រុងហ្សាកាតា ប្រទេសឥណ្ឌូនេស៊ី ដែលទើបតែបញ្ចប់ទៅក្នុងខែតុលានេះ។ ក្ដីស្រមៃរបស់ពួកគេគឺការបន្តចូលរួមប្រកួតកីឡាប៉ារ៉ាឡាំពិកហ្គេម នាទីក្រុងតូក្យូ ប្រទេសជប៉ុន នៅឆ្នាំ២០២០។
ប្រកាសព័ត៌មានរបស់ ICRC បានបញ្ជាក់ថា «យ៉ាងណាមិញ កង្វះខាតបរិក្ខារក្នុងការហ្វឹកហាត់ គឺជាឧបសគ្គសម្រាប់ពួកគេ។ ជាក់ស្ដែង កន្លែងហ្វឹកហាត់សម្រាប់ក្រុមកីឡាការិនីមានពិការភាពនៅមិនមានគ្រប់គ្រាន់នៅឡើយ ហើយក៏ឆ្ងាយពីផ្ទះរបស់ពួកគេ។ ចំណែកឯទីធ្លាបាល់បោះ ដែលពួកគេហ្វឹកហាត់បច្ចុប្បន្ននេះ មិនមានដំបូលត្រឹមត្រូវ ដែលធ្វើឲ្យការហ្វឹកហាត់របស់ពួកគេមានភាពលំបាក ដោយសារកត្តាពន្លឺថ្ងៃក្ដៅខ្លាំង និងភ្លៀងខ្លាំងជាដើម»។
ដោយមូលហេតុនេះ គណៈកម្មាធិការអន្តរជាតិនៃកាកបាទក្រហម ប្រចាំប្រទេសកម្ពុជា និងនៅទីស្នាក់ការកណ្ដាលក្នុងទីក្រុងហ្សឺណែវ បានធ្វើការរួមគ្នាបង្កើតអោយមានយុទ្ធនាការរៃអង្គាសប្រាក់ដើម្បីកសាងដំបូលថ្មីមួយនៅទីតាំងហាត់បាល់បោះក្នុងខេត្តបាត់ដំបង។
លោក ឌែនវើរ័ ក្រាហាម ប្រធានគម្រោងស្ដារលទ្ធភាពពលកម្មកាយសម្បទា បានប្រាប់អោយដឹងថា៖ «ទឹកប្រាក់ ដែលបានមកពីការរៃអង្គាសនេះនឹងផ្ដល់ជាធនធានមួយក្នុងការជួយជម្រុញពួកគេអោយខិតខំទាំងកម្លាំងកាយចិត្ត ដើម្បីពង្រឹងសមត្ថភាពក្រុមអោយបានកាន់តែប្រសើរជាងនេះ ដើម្បីសម្រេចនូវក្ដីប្រាថ្នារបស់ពួកគេចេញទៅប្រកួតប៉ារ៉ាឡាំពិកហ្គេម នៅទីក្រុងតូក្យូ ឆ្នាំ២០២០។
បើទោះបីជាគោលបំណងចម្បងគឺការរៃអង្គាសប្រាក់ពីអ្នកគាំទ្រ និងអ្នកឧបត្ថម្ភថ្មីៗក៏ដោយ ក៏ ICRC ចង់ឆ្លៀតយកឱកាសនេះបំភ្លឺបង្ហាញអំពីទុក្ខលំបាកដែលស្ត្រីមានពិការភាពបានជួបប្រទះក្នុងប្រទេសកម្ពុជា និងជុំវិញសកលលោក។ លោក រ៉ូម៉ាន់ ប៉ារ៉ាមូណូវ ប្រធានបេសកកម្មប្រចាំប្រទេសកម្ពុជា មានប្រសាសន៍អោយដឹងថា «នេះគឺជាលើកដំបូងហើយដែលយើងបានបង្កើតអោយមានយុទ្ធនាការរៃអង្គាសប្រាក់ជាសកលបែបនេះ សម្រាប់ប្រទេសកម្ពុជា។
អ្វីដែលសំខាន់បំផុតនោះ គឺយើងចង់លើកស្ទួយដល់ការដាក់បញ្ចូលពិការភាពទៅក្នុងសង្គម ដើម្បីអោយពួកគេអាចមានឱកាសធ្វើសមាហរណកម្មក្នុងសង្គម ហើយលើកទឹកចិត្តពួកគេអោយចូលរួមកាន់តែច្រើន»៕
សម្រាប់ព័ត៌មានលម្អិត សូមចូលទៅកាន់គេហទំព័រផ្លូវការរៃអង្គាសប្រាក់ www.crowdfunding.icrc.org
ចែករំលែកព័តមាននេះ