ខេត្តកំពង់ឆ្នាំង ៖ បើទោះបីសង្គ្រាមនៅប្រទេសកម្ពុជា បានបញ្ចប់ផុតរលត់ជាង៤០ឆ្នាំទៅហើយ ក៏ពិតមែនប៉ុន្តែប្រទេសមួយនេះនៅតែប្រះឃើញគ្រាប់មីន គ្រាប់មិនទាន់ផ្ទុះ រួមទាំងគ្រាប់បែកធំៗ ទម្លាក់ពីលើយន្តហោះនៅតែមាននៅក្នុងដីគ្រប់ទីកន្លែង ។
ជាក់ស្តែងនៅចំណុចភ្នំបួរ ស្ថិតក្នុងភូមិជំពារ ឃុំព្រៃគ្រី ស្រុកជលគីរី កាលពីវេលាម៉ោង៥និង១៥នាទីរសៀលថ្ងៃទី២២ ខែតុលា ឆ្នាំ២០១៨ មានការភ្ញាក់ផ្អើលមួយ ដោយសារតែប្រជាពលរដ្ឋដែលកំពុងប្រើគ្រឿងចក្រជីកយកអាចម៍ដីចាក់ក្នុងភូមិបានប្រទះឃើញប្រភេទគ្រាប់ទម្លាក់ពីលើយន្តហោះ ដែលមានប្រវែងជាង១ម៉ែត្រ កន្លះ ។ ក្រោយការប្រទះឃើញក៏បានរាយការណ៍ជូនអាជ្ញាធរមានសមត្ថកិច្ចមូលដ្ឋានបន្ត ដើម្បីការពារកន្លែងកើតរង់ចាំមន្ត្រីស៊ីម៉ាក់ទៅទទួលយក ។
បើតាមបុរសឈ្មោះ វី មានទីលំនៅភូមិព្រៃគ្រី ឃុំព្រៃគ្រី ស្រុកជលគីរីបានឱ្យដឹងថា គាត់ជាអ្នកស៊ីឈ្នួលជីកដីឲ្យគេ នៅចំណុចភូមិសាស្ត្រខាងលើ ស្រាប់តែបានប្រទះឃើញប្រភេទគ្រាប់មិនទាន់ផ្ទុះដែលជាប្រភេទគ្រាប់ទម្លាក់ពីលើយន្តហោះ មានប្រវែងប្រមាណជាង ១,៦០ម៉ែត្រ ។ ក្រោយពីការប្រទះឃើញគាត់ក៏បានរាយការណ៍ទៅសមត្ថកិច្ច ដើម្បីយករាយការណ៍បន្តទៅមន្ត្រីស៊ីម៉ាក់ឲ្យទៅទទួលយកទៅរក្សាទុកជៀសវាងគ្រោះថ្នាក់ណាមួយជាយថាហេតុ ។ បុរសខាងលើបានបញ្ជាក់ថា នេះលើកទី២ហើយដែលគាត់ជីកដីប្រទះឃើញគ្រាប់ទម្លាក់ពីលើយន្តហោះមិនទាន់ផ្ទុះបែបនេះ ដោយកាលពីជាង២ខែមុន គាត់ជីកដីប្រទះឃើញគ្រាប់ប្រភេទនេះដែរ ហើយបានរាយការជូនសមត្ថកិច្ច និងមន្ត្រីស៊ីម៉ាក់យកទៅរក្សាទុករួចហើយ ។
ដោយឡែកបើតាមមន្ត្រីជំនាញស៊ីម៉ាក់បានប្រាប់តាមទូរស័ព្ទថា គាត់បានឃើញ ហើយតាមរយៈគេផ្ញើតាមទូរស័ព្ទដៃ ហើយតាមការពិនិត្យមើលតាមរូបភាព គឺជាគ្រាប់ប្រភេទ MK-82 នេះហៅតាមភាសាបច្ចេកទេស តែបើហៅតាមភាសាសាមញ្ញា គឺជាគ្រាប់បែកទម្លាក់ពីលើយន្តហោះ B 52 ។ លោកបានបន្តថា កាលពីជាង២ខែមុន លោកក៏ធ្លាប់បានទទួលបានគ្រាប់ប្រភេទនេះ១គ្រប់ដែរ ពីចំណុចភ្នំបួរនេះ ។ ប៉ុន្តែគ្រាប់ដែលបានប្រទះឃើញ កាលពីជាង២ខែមុន គឺជាប្រភេទគ្រាប់ MK-83 ធំជាង MK- 82 ប្រភពពីមន្ត្រីស៊ីម៉ាកដដែលបានបន្តថា គ្រាប់ប្រភេទដូច0គ្នានេះមាន MK 81 , MK82, MK83, និងMK84 សុទ្ធតែជាប្រភេទគ្រាប់ទម្លាក់ពីលើយន្តហោះ របស់អាមេរិកទាំងអស់ ។
គួរបញ្ជាក់ដែរថា គ្រាប់បែកប្រភេទទម្លាក់ពីលើយន្តហោះគេតែងតែឃើញគ្រប់ទីកន្លែងក្នុងប្រទេស ព្រះរាជាណាចក្រកម្ពុជា ហើយគ្រាប់ទាំងនោះ គឺបានបន្សល់ទុក កាលពីសម័យសង្គ្រាមឆ្នាំ១៩៧០-៧៥ ដែលជាគ្រាប់បែកទម្លាក់របស់អាមេរិកគាំទ្រទាហានលន់នល់ ក្នុងការប្រឆាំងនឹងទាហានខ្មែរក្រហម ៕
ចែករំលែកព័តមាននេះ