ខេត្តកណ្ដាល ៖ ផ្ទះបណ្ដែតទឹកវៀតណាមជាច្រើនសង់នៅតាមបណ្ដោយព្រែកប៊ិន យី ជាតំបន់ប្រឈមត្រូវបានប្រជាពលរដ្ឋនៅតំបន់ជ្រៃធំបានចោទថា ការសាងសង់ផ្ទះទឹករបស់វៀតណាម បណ្ដាលឲ្យចរន្តទឹកហូរមកបុកខាងដីខ្មែរ បណ្ដាលឲ្យបាក់ច្រាំងបាក់ផ្លូវលំ និងដីចម្ការ នៅជាប់ព្រែកនោះបន្តបន្ទាប់…
ខេត្តកណ្ដាល ៖ ផ្ទះបណ្ដែតទឹកវៀតណាមជាច្រើនសង់នៅតាមបណ្ដោយព្រែកប៊ិន យី ជាតំបន់ប្រឈមត្រូវបានប្រជាពលរដ្ឋនៅតំបន់ជ្រៃធំបានចោទថា ការសាងសង់ផ្ទះទឹករបស់វៀតណាម បណ្ដាលឲ្យចរន្តទឹកហូរមកបុកខាងដីខ្មែរ បណ្ដាលឲ្យបាក់ច្រាំងបាក់ផ្លូវលំ និងដីចម្ការ នៅជាប់ព្រែកនោះបន្តបន្ទាប់ ។
ប្រជាពលរដ្ឋមានដីចម្ការនៅជាប់ព្រែកប៊ិនយី រឺ ព្រែកជ្រៃធំតំបន់ជ្រៃធំ ស្ថិតនៅភូមិលេខ៩ ឬ ភូមិជ្រៃធំ ឃុំសំពៅពូន ស្រុកកោះធំ បានឲ្យដឹងថា នៅម្ខាងព្រែកខាងវៀតណាមជនជាតិវៀតណាមបានសង់ផ្ទះ និងផែបណ្ដែតទឹកជាច្រើន តាមបណ្ដោយព្រែកជាបន្តបន្ទាប់តាំងពីយូរឆ្នាំមកហើយ មកដល់បច្ចុប្បន្ននេះ ។ ការសង់ផ្ទះបណ្ដែតទឹកវៀតណាមនេះវាបានធ្វើឲ្យមានផលប៉ះពាល់ចរន្តទឹកហូរបុកខ្លាំងមកខាងដីខ្មែរ បណ្ដាលឲ្យបាក់ច្រាំងបាក់មកដល់ផ្លូវលំ និងដីចម្ការប្រជាពលរដ្ឋនៅជាប់មាត់ព្រែកខាងដីខ្មែរ ។ ពេលនេះផ្លូវលំនៅតាមមាត់ព្រែកបានបាក់អស់ដោយកន្លែង មិនអាចធ្វើដំណើរបាន គឺត្រូវធ្វើដំណើរវាងតាមដីចម្ការប្រជាពលរដ្ឋ ឬវាងតាមផ្លូវធ្វើថ្មីទៅស្ពានជ្រៃធំ ។
ប្រជាពលរដ្ឋលើកឡើងថា ខាងវៀតណាមហាក់ដូចជា ដើរខ្សែលើមកលើខ្មែរពេកហើយ មកសង់ផ្ទះបណ្ដែតទឹកនៅតំបន់ជាប់ព្រំដែន ចំណែកខាងដីខ្មែរអត់មានផ្ទះបណ្ដែតទឹកទេ ។
បើតាមមន្ត្រីនគរបាលការពារព្រំដែននៅតំបន់ជ្រៃធំបានប្រាប់ឲ្យដឹងថា ផ្ទះបណ្ដែតទឹកដែលវៀតណាមសង់នោះ គឺនៅតំបន់ប្រឈម គឺមិនទាន់កំណត់ព្រំដែនច្បាស់លាស់នៅឡើយទេ ហើយប៉ុន្មានឆ្នាំចុងក្រោយនេះមិនមានផ្ទះទឹកវៀតណាមមកសង់នៅតំបន់ប្រឈមនេះទៀតបន្ថែមទេ គឺនគរបាលបានទប់ស្កាត់ និងហាមមិនឲ្យមានសង់ផ្ទះទឹកបន្ថែមឡើយ ។
ចំណែកលោក អេង មោក អភិបាលស្រុកកោះធំបានប្រាប់ឲ្យដឹងថា បញ្ហាបាក់ច្រាំង នៅតាមបណ្ដោយព្រែកតំបន់ជ្រៃធំកន្លងទៅនេះអាជ្ញាធរទប់ស្កាត់ ដោយបោះបង្គោលក្នុងទឹកបាំងរលល និងចរន្តទឹក ហើយកំពុងសិក្សាថា តើការបាក់ច្រាំងនេះវាបណ្ដាលមកពីការសង់ផ្ទះ បណ្ដែតទឹករបស់វៀតណាម ឬយ៉ាងណា ការបាក់ដីច្រាំងនៅតំបន់នេះកើតមានជាបន្តបន្ទាប់ កន្លងមក តែពេលនេះមានបាក់តិចតួច ។ លោកអភិបាលស្រុកថា ចំពោះខាងភាគីខ្មែរមិនមានប្រជាពលរដ្ឋទៅសង់ផ្ទះបណ្ដែតទឹកនៅតំបន់ប្រឈមតាមព្រែកដែលមានបាក់ច្រាំងនោះទេ ។ លោកថា ការដោះស្រាយនៅតំបន់ប្រឈមនេះ លោកអភិបាលខេត្តក៏មានកិច្ចសហប្រតិបត្តិការទ្វេភាគីជាមួយអាជ្ញាធរវៀតណាម ដើម្បីដោះស្រាយដែរ ។ ហើយកិច្ចការនេះអាជ្ញាធរក៏បានរាយការណ៍ទៅថ្នាក់ជាតិ ដើម្បីដោះស្រាយផងដែរ ៕
ចែករំលែកព័តមាននេះ