ខេត្តកំពង់ឆ្នាំង ៖ នាយឧត្តមសេនីយ៍ មាស សុភា ទេសរដ្ឋមន្ត្រីទទួលបន្ទុកកិច្ចការមីន គ្រាប់មិនទាន់ផ្ទុះ និងការងារវិស្វកម្ម នៃកងយោធពលខេមរភូមិន្ទ មានប្រសាសន៍ថា…
ខេត្តកំពង់ឆ្នាំង ៖ នាយឧត្តមសេនីយ៍ មាស សុភា ទេសរដ្ឋមន្ត្រីទទួលបន្ទុកកិច្ចការមីន គ្រាប់មិនទាន់ផ្ទុះ និងការងារវិស្វកម្ម នៃកងយោធពលខេមរភូមិន្ទ មានប្រសាសន៍ថា អ្នកកប់មីនខ្លះបានស្លាប់ និងខ្លះទៀតមិនបានប្រាប់ទីតាំងដែលខ្លួនបានកប់ ដូច្នេះមីនគឺជាឃាតករលាក់មុខដែលចាំតែឆក់យកអាយុជីវិតប្រជាពលរដ្ឋគ្រប់ពេលវេលា និងគ្រប់ទីកន្លែង ។
នេះជាបុព្វហេតុដែលយើងទាមទារអ្នកដោះមីនត្រូវតែមានជំនាញខ្ពស់ ដើម្បីរំដោះដីជូនប្រជាពលរដ្ឋសម្រាប់បង្កបង្កើនផល ក៏ដូចជាសម្រាប់ការអភវឌ្ឍន៍របស់រាជរដ្ឋាភិបាលក្នុងការសាងសង់ផ្លូវ និងស្ពាន ជាដើម ។
មានប្រសាសន៍បែបនេះក្នុងពេលដែលលោកអញ្ជើញជួបសំណេះសំណាលសាកសួរសុខទុក្ខ និងពិនិត្យស្ថានភាពការហ្វឹកហ្វឺនរបស់វិទ្យាស្ថានជាតិកំចាត់មីនស៊ីម៉ាក់ ខេត្តកំពង់ឆ្នាំងនាព្រឹកថ្ងៃទី២២ ខែតុលា ឆ្នាំ២០១៨ នេះ ។
លោកបានបន្តថា «ថ្ងៃនេះខ្ញុំពិតជាមានក្តីសប្បាយរីករាយ និងកោតសើសើរចំពោះ ការហ្វឹកហ្វឺននៅទីនេះ ព្រោះថា កាលដើមឡើយយើងដោះមីនគឺប្រើដោយដៃសុទ្ធសាធ តែបច្ចុប្បន្ននៅទីនេះគឺបានស្រាវជ្រាវ និងបណ្តុះបណ្តាលដល់សិក្ខាកាមដោះមីនដោយប្រើសត្វសុខន សត្វកណ្តុរ រហូតដល់របៀបបញ្ជារតាមត្រូន (Drone) ទៀត ពិតជាមិនធម្មតាទេ ព្រោះត្រូនមានភាពនិយមច្រើនជាង ។ ការដោះមីន មិនមែនទាមទារត្រឹមតែកម្រិតខ្ពស់នោះទេ គឺទាមទារការលះបង់ខ្ពស់ និងត្រូវសិក្សាស្វែងយល់ជាបន្តបន្ទាប់ពីមួយថ្ងៃទៅមួយថ្ងៃអោយកាន់តែប្រសើរឡើង» ។
លោកបានបញ្ជាក់ថា «ភារកិច្ចរបស់ក្រុមកំចាត់មីនស៊ីម៉ាក់គឺទូរលំទូលាយខ្លាំងណាស់ ដូចជាផ្នែកមនុស្សធម៌ គឺកំចាត់មីន រំដោះផ្ទៃដីជូនប្រជាពលរដ្ឋ ជូនសហគមន៍ និងរាជរដ្ឋាភិបាល ។ ហេតុនេះ សាលានៅទីនោះ ត្រូវតែពង្រីកហើយពង្រឹងអោយមានសមត្ថភាពកាន់តែខ្ពស់ ដូចយើងបានហើយដឹងថា រាជរដ្ឋាភិបាលបានសម្រេចផ្តល់អោយមន្ត្រីស៊ីម៉ាក់ចូលជាក្របខណ្ឌកងយោធពលខេមរភូមិន្ទគឺមានក្រមខណ្ឌត្រឹមត្រូវ» ។
ក្នុងឱកាសនោះលោក ហេង រតនា ប្រតិភូរាជរដ្ឋាភិបាលទទួលបន្ទុកអគ្គនាយកកំចាត់មីនស៊ីម៉ាក់បានរាយការណ៍ថា នៅសាលាហ្វឹកហ្វឺនបោសសំអាតមីននៅទីនេះគឺបានស្រាវជ្រាវ និងរិះរកវិធីគ្រប់យ៉ាងដើម្បីពន្លឿនក្នុងការដោះមីនអោយកាន់តែមានភាពប្រសើរឡើង ដើម្បីរំដោះផ្ទៃដីជូនប្រជាពលរដ្ឋទាន់ពេលវេលាក៏ដូចជារួមចំណែកកាត់បន្ឋយភាពក្រីក្ររបស់ប្រជាពលរដ្ឋផងដែរ ។
នៅទីនេះមានការបង្វឹកសត្វសុនខ សត្វកណ្តុរ ដើម្បីដោះមីន មានកន្លែងសំរាប់ព្យាបាលសត្វមានកន្លែងសំរាប់បន្សាបសារធាតុផ្ទុះហើយយើងក៏បានយកកាក់សំណល់ទាំងនោះមកកែច្នៃសម្រាប់យកទៅបន្សាបឬកម្ទេចគ្រាប់មីន និងគ្រាប់មិនទាន់ផ្ទុះផ្សេងៗដែលមិនអាចលើកយកចេញពីដីបាននៅតាមទីតាំងមួយចំនួន ។
នៅទីនេះផងដែរយើងក៏មានការហ្វឹកហាត់ដល់អ្នករាវរកអាវុធយុទ្ធភណ្ឌមិនទាន់ផ្ទុះនៅក្នុងទឹក ដែលការងាយនេះមិនមែនងាយស្រួលឡើយគឺយើងត្រូវប្រើបច្ចេកវិជ្ជាដើម្បីកំណត់ទីតាំងច្បាស់លាស់ទើបអោយអ្នកមុជទឹកចុះទៅរុករក ព្រោះថា យើងមិនអាចចេះតែមុចរាវរកដោយទទេៗនោះឡើយ ៕
ចែករំលែកព័តមាននេះ