ទីក្រុងសិង្ហបុរី ៖ តម្លៃប្រេងនៅមានលំនឹងល្អកាលពីថ្ងៃចន្ទកន្លងមក ព្រោះតែការបារម្ភពីការដាក់ទណ្ឌកម្មអាមេរិកលើការនាំចូលប្រេងឆៅរបស់អ៊ីរ៉ង់ ប៉ុន្តែតម្លៃបានរងការប៉ះពាល់ពីកំណើនសកម្មភាពបូមប្រេងនៅអាមេរិក ។
តម្លៃប្រេងរបស់ Brent ស្មើ ៧៩,៧៤ដុល្លារក្នុង១ធុង ឬទាបជាងសប្តាហ៍មុនប្រមាណ៤សេន ខណៈដែលតម្លៃប្រេងរបស់ West Texas Intermediate ស្មើ៦៩,០៧ដុល្លារក្នុង១ធុង ឬទាបជាងសប្តាហ៍មុន ៥សេន ។ ការដាក់ទណ្ឌកម្មអាមេរិកលើប្រទេសអ៊ីរ៉ង់នឹងចាប់ផ្តើមនៅថ្ងៃទី៤ ខែវិច្ឆិកាខាងមុខនេះ ។
ខណៈដែលអង្គការនៃប្រទេសនាំចេញប្រេង (OPEC) បានព្រមព្រៀងគ្នាកាលពីខែមិថុនាថា នឹងបង្កើនផលិតកម្មប្រេងដើម្បីជួយបំពេញទីផ្សារជំនួសអ៊ីរ៉ង់ពិតមែនក្តី ឯកសារមួយចំនួនបានឲ្យដឹងថា OPEC កំពុងតែជួបការលំបាកក្នុងការផលិតប្រេងបន្ថែម ព្រោះតែការធ្លាក់ចុះនៃការនាំចេញប្រេងពីអ៊ីរ៉ង់ វេណេស៊ុយអេឡា និងអង់ហ្គោឡា ។
ពាណិជ្ជករបានឲ្យដឹងថា អតិថិជនប្រេងធំៗកំពុងតែទិញស្តុកដោយគិតថា ទីផ្សារអាចតូចចង្អៀតជាងមុន ប៉ុន្តែលោក Stephen Innes ប្រធានផ្នែកពាណិជ្ជកម្មប្រចាំអាស៊ីប៉ាស៊ីហ្វិកនៅ Oanda បានឲ្យដឹងថា ការផ្គត់ផ្គង់ប្រេងបច្ចុប្បន្ននៅគ្រប់គ្រាន់ក្នុងការជួបនឹងតម្រូវការ ។
មានមុខសញ្ញាបង្ហាញពីកំណើនផលិតកម្មខ្លះដែរ ជាពិសេសនៅអាមេរិកខាងជើង។ ក្រុមហ៊ុន Baker Hughes បាននិយាយកាលពីថ្ងៃសុក្រថា ក្រុមហ៊ុនអាមេរិកបានបន្ថែមតំបន់បូមប្រេងចំនួន ៤ទៀតក្នុងសប្តាហ៍មុន ដែលធ្វើឲ្យចំនួនតំបន់បូមប្រេងសរុបស្មើ ៨៧៣កន្លែង ។
ការព្រួយបារម្ភពីជម្លោះពាណិជ្ជកម្មរវាងសហរដ្ឋអាមេរិកនិងប្រទេសចិន ដែលនឹងប៉ះពាល់ដល់ការលូតលាស់សេដ្ឋកិច្ចជុំវិញពិភពលោកអាចនឹងប៉ះពាល់ដល់ទស្សនវិស័យតម្លៃប្រេងដែរ ។
ធនាគារ Emirates NBD បានឲ្យដឹងថា ៖«ឥទ្ធិពលពេញលេញនៃសង្គ្រាមពាណិជ្ជកម្មរវាងសហរដ្ឋអាមេរិកនិងប្រទេសចិន នឹងកើតមានឡើងនៅឆ្នាំ២០១៩ ហើយអាចប៉ះពាល់ដល់តម្រូវការប្រេងនៅឆ្នាំក្រោយដែរ ដែលអាចធ្វើឲ្យទីផ្សារខិតទៅរកភាពវិជ្ជមានវិញ ៕
ចែករំលែកព័តមាននេះ