ខេត្តព្រៃវែង ៖ កាលព្រឹកថ្ងៃទី២១ ខែតុលា ឆ្នាំ២០១៨ មន្ត្រីសាខាកាំកុងត្រូលខេត្តព្រៃវែង សហការជាមួយមន្ត្រីមន្ទីរពាណិជ្ជកម្ម និងគណៈកម្មការផ្សារបានចុះត្រួតពិនិត្យទំនិញដែលដាក់តាំងលក់នៅផ្សារសាមគ្គី កអណ្តើក ដែលស្ថិតនៅតាមបណ្តោយផ្លូវជាតិលេខ១ ក្នុងភូមិប្រាសាទ ឃុំប្រាសាទ ស្រុកកំពង់ត្របែក ខេត្តព្រៃវែង ។
ក្នុងការត្រួតពិនិត្យនេះមន្ត្រីជំនាញបានធ្វើតេស្តបឋមទៅលើសរសៃគុយទាវ នំបញ្ចុក នំបាញ់ហយ ត្រីប្រលាក់ ស្ករត្នោត សណ្តែកបណ្តុះ សរុប៨គំរូ ហើយជាលទ្ធផលមន្ត្រីជំនាញបានរកឃើញគុយទាវសរសៃតូចចំនួន១២គីឡូក្រាម មានដាក់លាយសារធាតុគីមីហាមឃាត់ប៉ូរ៉ាក់ (Borax) ។
បន្ទាប់មកមន្ត្រីកាំកុងត្រូលបានធ្វើការណែនាំដល់ម្ចាស់គុយទាវ ដែលជាអ្នកផលិតផ្ទាល់ និងអោយធ្វើកិច្ចសន្យាកែប្រែក្នុងការផលិត ដោយឈប់ដាក់លាយសារធាតុប៉ូរ៉ាក់នេះទៀត និងបានធ្វើកំណត់ហេតុដកហូតគុយទាវទាំងនោះយកទៅកំទេចចោលផងដែរ ។
ដោយឡែក ក្រៅពីរកឃើញគុយទាវដែលដាក់លាយសារធាតុគីមីនេះ មន្ត្រីជំនាញក៏បានរកឃើញទំនិញខូចគុណភាព ហួសថ្ងៃកំណត់ប្រើប្រាស់ចំនួន១២,៦៥គីឡូក្រាម ដែលក្រុមអាជីវករបានដាក់តាំងលក់នៅក្នុងផ្សារសាមគ្គីកអណ្តើកនេះផងដែរ ហើយទំនិញខូចគុណភាពទាំងនោះ ក៏ត្រូវបានដកហូតយកទៅរក្សាទុកនៅស្នាក់ការសាខាកាំកុងត្រូលខេត្ត ទុកធ្វើការដុតកំទេចចោលនៅពេលក្រោយ ។
ជាមួយគ្នានោះដែរ មន្ត្រីកាំកុងត្រូលក៏បានចែកផ្ទាំងរូបភាព ដែលណែនាំអំពីប្រភេទទំនិញខូចគុណភាព សារធាតុគីមីដែលច្បាប់ហាមឃាត់ និងទំនិញដែលមានគុណភាព ដល់ក្រុមអាជីវករ និងប្រជាពលរដ្ឋ ឲ្យបានយល់ដឹងអំពីសុវត្ថិភាពម្ហូបអាហារផងដែរ ៕
ចែករំលែកព័តមាននេះ