សម្តេចតេជោ ៖ ដរាបណាសម រង្ស៊ី នៅចង់កាន់អំណាចសម្តេចនៅតែបន្តដឹកនាំ
- ភ្នំពេញ
រាជធានីភ្នំពេញ ៖ សម្តេចតេជោ ហ៊ុន សែន នាយរដ្ឋមន្ត្រីបានបញ្ជាក់ថា សម្តេច នៅតែកាន់អំណាចដរាបណា លោក សម…
រាជធានីភ្នំពេញ ៖ សម្តេចតេជោ ហ៊ុន សែន នាយរដ្ឋមន្ត្រីបានបញ្ជាក់ថា សម្តេច នៅតែកាន់អំណាចដរាបណា លោក សម រង្ស៊ី នៅតែចង់កាន់អំណាចនោះ ។
សម្តេចតេជោលើកឡើងក្នុងជំនួបសំណេះសំណាលជាមួយសមាគមនិស្សិតនៅថ្ងៃទី២១ តុលានេះយ៉ាងដូច្នេះថា «ខ្ញុំមិនភ្ញាក់ផ្អើលនោះទេ ពេលខ្ញុំទៅនេះទៅនោះគេធ្វើបាតតុកម្ម ។ ក្មួយៗគិតមើល តាំងពីឆ្នាំ១៩៩៨ តើពូបានធ្វើអ្វីទៅបានគេហៅអាមេរិកបាញ់មីសស៊ីលចូលផ្ទះពីនៅតាខ្មៅ ? មនុស្សដល់ថ្នាក់នឹងហើយបានគេហៅមនុស្សទៅទេគេវាសត្វ ។ ប្រទេសសន្តិភាពមួយកំពុងដំណើរការបោះឆ្នោតពេលបោះឆ្នោតចាញ់បែរហៅអាមេរិកបាញ់មីសស៊ីលចូលក្នុងផ្ទះ ។ វាមិនស្លាប់ហ៊ុន សែន ទេ គេប្រជាពលរដ្ឋ» ។ សម្តេចលើកឡើងថា ការប្រឆាំងនៅថ្ងៃនេះគ្មានចម្លែកនោះទេសម្រាប់សម្តេចព្រោះ កាលពីឆ្នាំ១៩៩៨ ហ៊ានហៅអាមេរិកបាញ់មីសស៊ីលនៅផ្ទះខ្ញុំនៅតាខ្មៅ ហើយមុននេះគេ (សម រង្ស៊ី) ដើរទៅប្រទេសជប៉ុន អាមេរិក…ឲ្យផ្តាច់ជំនួយនៅកម្ពុជាថែមទៀត ។
នេះជារឿងដដែលរបស់ក្រុមប្រឆាំងដែលតែងតែធ្វើឡើងចំពោះសម្តេច ។ ជាមួយគ្នានោះដែរ សម្តេចតេជោក៏បានហៅសកម្មភាពរបស់ក្រុមប្រឆាំងដែលតែងតែធ្វើបាតុកម្មប្រឆាំងនេះសម្តេច គឺជារុយក្បាលខៀវ ។ សម្តេចតេជោថា៖« ពួកនឹងដូចជារុយ ក្បាលខៀងអញ្ចឹងតាមធ្វើបាតុកម្ម ។ ពូអត់ឆ្ងល់ទេព្រោះ កម្រិតដល់ថ្នាក់ហៅអាមេរិកបាញ់មីសស៊ីលចូលក្នុងស្រុកខ្លួនឯងអីញ្ចឹងវាចប់ហើយ គេអាចហៅ ថា«អាជៅមនុស្ស» ។ អីញ្ចឹងទេចង់ធ្វើដឹកនាំគុណធម៌យ៉ាងម៉េច»។ សម្តេចតេជោបានគូសបញ្ជាក់«ពូនៅប្តូរផ្តាច់ជាមួយអាមួយនេះ (សម រង្ស៊ី) អត់ទេ ដរាបណាអាមួយនឹងមានមហិចតាចង់កាន់អំណាច! ពូនៅតែបន្តដឹកនាំ ។ អាឡូវបរទេសមួយចំនួនមើលឡើងវិញនូវសភាពការណ៍នៅកម្ពុជា ។ ហ៊ានឲ្យអាមេរិកបាញ់មីសស៊ីលចូលប្រទេសវាជាឃាតករឈាមត្រជាក់» ។
សម្តេចលើកឡើងថា លោកសម រង្ស៊ី គឺជាមនុស្សថោកទាបបំផុតដែលឲ្យបរទេសឈ្លានពានប្រទេសរហូតដល់ឲ្យគេបាញ់មីសស៊ីលចូលក្នុងប្រទេសខ្លួនថែមទៀត ។ សម្តេចតេជោក៏បានរំឮកពីការធ្វើបាតុកម្មរបស់ក្រុមប្រឆាំងដែលដឹកនាំដោយលោក សម រង្ស៊ី កាលពីឆ្នាំ២០១៣ ឲ្យហ៊ុន សែន ចុះចេញពីដំណែងនោះគ្មានផ្លូវទេ ។ សម្តេចតេជោបាននិយាយខ្លាំងទៅកាន់លោក សម រង្ស៊ី ដែលចង់បានអំណាចដោយធ្វើបាតុកម្មជាច្រើនលើកច្រើនសារយ៉ាងដូច្នេះថា«គេថាខ្ញុំក្រាញអំណាចចុះសព្វថ្ងៃនេះ ហ្អែងធ្វើដើម្បីចង់អំណាច ហ្អែងធ្វើជានាយករដ្ឋមន្ត្រីហ្វេសប៊ុកទេអាពៅ ! ។ វាចង់ណាស់ ដេកក៏យល់សុបិន្តថា ពេលធ្វើនាយករដ្ឋមន្ត្រីបង្កើតអង្គរក្សការពារ និងអ្វីៗទៀត» ។
សម្តេចលើកឡើងថា គ្មានអ្នកណាដេកផ្ទះឈ្នះឯងនោះទេ ។ ៨៣ភាគរយទៅបោះឆ្នោត១៧%មិនទៅបោះមិនមែនថា អ្នកមិនទៅបោះឆ្នោតគាំទ្រគណបក្សប្រឆាំងនោះទេ ក្នុងនោះក៏មានអ្នកគាំទ្រគណបក្សប្រជាជនកម្ពុជាដែរ ដែលពួកគេមានការជាប់រវល់ទៅណាមកណា ។ សម្តេចបន្ថែមថា អ្នកដែលទៅបោះឆ្នោតអាណត្តិទី៦រដ្ឋសភានេះ គឺចង់បានសន្តិភាព និងការអភិវឌ្ឍន៍ពិតប្រាកដពិតមែន ៕
ចែករំលែកព័តមាននេះ