ខេត្តប៉ៃលិន ៖ នរណាៗក៏ដឹងដែរថា ខេត្តប៉ៃលិន ជាតំបន់ត្បូងពេជ្រ មានកំណប់ទ្រព្យមហាសាល ស្ថិតនៅភាគខាងលិចនៃប្រទេសកម្ពុជា ជាប់នឹងព្រំដែនប្រទេសថៃ ជាដីតំបន់ខ្ពង់រាបសម្បូរទៅដោយភ្នំ និងជួរភ្នំវែងអន្លាយដែលមានដីកសិកម្ម សម្រាប់ធ្វើស្រែចម្ការតិចតួចបំផុត ។ ទំហំខេត្តនេះស្ទើរតែតូចជាងគេក្នុងចំណោមខេត្តទាំងអស់ទូទាំងប្រទេស ដោយមានស្រុក១ ក្រុង១ប៉ុណ្ណោះ គឺស្រុកសាលាក្រៅ និងក្រុងប៉ៃលិន ដែលបំបែកចេញពីខេត្តបាត់ដំបង គ្របដណ្តប់ទៅដោយភ្នំជាច្រើន ហើយបើតាមការស្រាវជ្រាវរបស់កោះសន្តិភាពឃើញមានរហូតដល់ជាង១៥០ភ្នំ ។
លោកគឹម សុខា ប្រធានមន្ទីរបរិស្ថានខេត្តប៉ៃលិន បានឱ្យដឹងកាលពីពេល ថ្មីៗកន្លងមកថា រហូតមកដល់ពេលនេះតាមដែលលោកដឹងនៅក្នុងខេត្តប៉ៃលិន មានភ្នំទាំងអស់ចំនួនជាង១៥០ភ្នំ រៀបរាប់ស្ទើរមិនអស់ ភ្នំខ្លះមានឈ្មោះ ខ្លះទៀតគ្មានឈ្មោះពិតប្រាកដទេ គេហៅទៅតាមការចំណាំ តៗគ្នាមកដល់សព្វថ្ងៃនេះ ។
ភ្នំទាំងនោះមានឈ្មោះដូចជា ជួរភ្នំខៀវ ភ្នំស្ពុង ភ្នំប៉ោត ភ្នំសារវ៉ាន់ ភ្នំដោះក្រមុំ ភ្នំយ៉ាត ភ្នំកូនភ្នំ ភ្នំដំបង ភ្នំរាំង ភ្នំបឹងព្រលិត ភ្នំកេះ ភ្នំក្រិញ ភ្នំដើមពុទ្រា ភ្នំចេក ភ្នំអូរប្រើស ភ្នំអូរខ្ទីង ភ្នំឫស្សី ភ្នំទុរេន២ដើម ភ្នំទឹកធ្លាក់ក្បាលដំរី …។
មានភ្នំមួយឈ្មោះភ្នំធំស្ថិតនៅក្នុងភូមិភ្នំស្ពុង ឃុំសាលាក្រៅ ស្រុកសាលាក្រៅ ដែលជាភ្នំដ៏ធំមួយពេញទៅដោយថ្ម គេកំពុងជីកកកាយដាក់គ្រឿងផ្ទុះគាស់យកថ្មទៅប្រើប្រាស់សម្រាប់អភិវឌ្ឍខេត្ត ហើយក៏មានភ្នំ តូចៗ ជាច្រើនទៀតដែរ ដូចជាភ្នំកូនភ្នំស្ថិតនៅភូមិកូនភ្នំ សង្កាត់អូរតាវ៉ៅ ក្រុងប៉ៃលិន ។ មានភ្នំមួយចំនួនទៀតស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ។
លោកគឹម សុខា បានបញ្ជាក់ថា ជួរភ្នំខៀវមានផ្ទៃដីព្រៃ៣៨.២០៩ហិកតា ស្ថិតនៅជួរភ្នំក្រវាញ ជាតំបន់អភិរក្សព្រៃឈើ ដោយភ្ជាប់ពីប៉ៃលិនឆ្ពោះទៅទិសខាងត្បូង ដល់ស្រុកសំឡូត រហូតដល់ប្រទេសថៃ ។ បើគិតទៅតាមលក្ខណៈកម្ពស់ខ្នងភ្នំមានចាប់ពី២០០ម៉ែត្រដល់៣០០ម៉ែត្រ ជាជួរភ្នំដ៏វែងមិនមានឈ្មោះពិតប្រាកដសម្រាប់សម្គាល់ទេ ហើយក៏គ្មានការស្រាវជ្រាវជាផ្លូវការ និងការអភិរក្សនៅឡើយ ។
បច្ចុប្បន្ននេះដីស្ថិតនៅតំបន់ភ្នំជាប់នឹងព្រំដែនកម្ពុជាថៃ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ កំពុងតែមានហាងឆេងខ្ពស់ ហើយក៏មានប្រជាពលរដ្ឋជាច្រើនសម្រុកទិញ និងលក់ដូរ មានគួកជេរទិញលក់ខណៈជនជាតិចិនជាច្រើនកំពុងដើររកទិញដីនៅត្រង់ចំណុចនោះ និងស្នាក់នៅតំបន់ព្រំដែនផងដែរ ។ ជាពិសេសជនជាតិចិនចំណូលថ្មីទាំងនោះបានសហការជាមួយម្ចាស់កាស៊ីណូក្នុងខេត្ត បើកដំណើរការយ៉ាងគគ្រឹកគគ្រេងគួរឱ្យកត់សម្គាល់ ៕
ចែករំលែកព័តមាននេះ